მედია აპრილი წარმოგიდგენთ “უკანონო” პოდკასტს

საქართველო დამოუკიდებლობის მოპოვებიდან მოყოლებული ვერ იქცა სახელმწიფოდ, რომელშიც კანონი უზენაესია, ბოლო დროს კი, ელვის სისწრაფით ცხადდება უკანონოდ ყველაფერი, რაც გუშინ გამოხატვის თავისუფლების ნაწილი იყო. ამ პოდკასტში ხელისუფალთა უკანონობებზე ვისაუბრებთ, იმაზეც, როგორია საზოგადოების რეაქცია რეპრესიებსა და ტერორზე ან როგორ წარმოგვიდგენია, ჩვენი ქვეყნის სახელმწიფოდ გარდაქმნა.

“ქართული ოცნება” რიგი საკანონმდებლო ცვლილებებით ცდილობს, ორგანიზაციებსა და მედია საშუალებებს კონტროლი დაუწესოს და მათი საქმიანობა შეაფერხოს. რეჟიმის მცდელობები განსაკუთრებით აზიანებთ რეგიონულ ორგანიზაციებს, რომლებიც შეზღუდული რესურსებით მუშაობენ. ამ ეპიზოდის სტუმრები რადიო “მარნეულის” მთავარი რედაქტორი, კამილა მამედოვა და “სოლიდარობის თემის” აღმასრულებელი დირექტორი, თორნიკე აბულაძე არიან. რადიო “მარნეული” ეთნიკური უმცირესობებით დასახლებულ რეგიონში მაუწყებლობს და ადგილობრივებს უცხო გავლენისგან თავისუფალ ინფორმაციას ხელმისაწვდომ ენაზე აწვდის, “სოლიდარობის თემი” კი აჭარაში საქმიანობს და ზრუნავს, როგორც ქართულ-ისლამური კულტურის ძეგლებზე, ისე მაღალმთიან აჭარაში მცხოვრები ადამიანების, მათ შორის, ქალების რეპროდუქციულ უფლებებზე.

პოდკასტის ახალი ეპიზოდი გამოქვეყნდება ყოველ სამშაბათს, 19:00 საათზე, ჩვენს Youtube-ისა და Spotify-ის არხებზე.

განსაკუთრებული მადლობა პროექტ 64-ს სივრცის დათმობისა და ტექნიკური მხარდაჭერისთვის.