შინაგან საქმეთა სამინისტროს აწ უკვე ყოფილ მაღალჩინოსანს, იოსებ სიგუას, ცოლი, სოფია სიგუა ძალადობაში, სიცოცხლის მოსპობის მუქარასა და მკვლელობის მცდელობაში ადანაშაულებს. ამის შესახებ ქალმა TV პირველის ინტერვიუში, გადაცემა შაბათის ეთერში 4 ივლისს ისაუბრა. ამ დროს სოსო სიგუა თბილისის პოლიციის დეპარტამენტის დეტექტივების სამმართველოს უფროსის თანამდებობას იკავებდა.
“ბავშვები ტირიან, რომ “დედა მოგკლავს?” ეს ყველაფერი ხომ მათაც იციან და ეშინიათ, რომ დედა არ მოუკლას მამამ — მამამ, რომელიც პოლიციელია. […] როგორ შეიძლება, ჩინოვნიკმა დაჩაგროს ცოლი. ჩვეულებრივი ძალადობის მსხვერპლი ვიყავი მუდამ და ვიყავი ჩუმად.
ადამიანი ცოლს რომ ასეთი სისასტიკით ექცევა, ის გარეთ რას იზამს?! მე ის მინახავს აგრესიული ღონისძიებებზე და მე ეს ძალიან კარგად ვიცი, იმიტომ, რომ ჩემთან ისეთი არაადეკვატური სასტიკი სახით იბრძოდა და ისე მისწორდებოდა, სულ ვეუბნებოდი — დაკავებული ხომ არ ვარ, ასე რატომ მექცევი”.
[მეუბნებოდა] წაგიყვან, კასრში ჩაგდებ და დაგმარხავ, უგზო-უკვლოდ დაკარგულად გამოგაცხადებო. ყოველთვის თავს იზღვევდა, ამ ყველაფერს როცა აკეთებდა — ტელეფონს მართმევდა, ჯიბეში თვითონ იდებდა და მერე იწყებოდა რინგი. მე არასოდეს დაზიანება სახეზე არ მქონია. როგორც დაკავებულს, თავში მირტყამდა მუშტს.
ქალი ინტერვიუში ამბობს, რომ ემუქრებოდა მოკვლით და ჰქონდა მკვლელობის მცდელობაც.
“ყოველთვის მემუქრებოდა — იქნები გაუხსნელი მკვლელობა. ეგ ხომ იცი, ჩემზე უკეთ არავის გამოსდისო. სხვათა შორის, მცდელობა ჰქონდა — აივანზე დამსვა მოაჯირზე და მაგდებდა. ამის კადრებიც მქონდა, თუმცა თვითონ წამიშალა. უბრალოდ, რომ გახედა და დღის შუქი იყო, ბევრი სხვა მეზობელი, წინ კორპუსი იყო, მიხვდა, რომ არასარფიანი დრო შეარჩია”.
გარდა ამისა, როგორც სოფია სიგუა ჰყვება, ქმარი მას ფსიქიატრიულ საავადმყოფოში მოთავსებითაც ემუქრებოდა.
“[მითხრა] შენ თუ მე ახლა ოდესმე მიჩივლებ და ამ ყველაფერს გადაიტან სამართლებრივ ჭრილში, წაგიყვან საგიჟეთში [სტილი დაცულია], გაგიკეთებენ ისეთ წამალს, რომ სანამ შენ ალტერნატიულ ექსპერტიზას მოითხოვ, ისეთი ნივთერება გექნება, ექსპერტიზა დაადასტურებს, რომ ხარ შეურაცხადი და ამით მოგიშორებო”.
სიუჟეტის მიხედვით, სამართლებრივი ბრძოლა ქალმა 2026 წლის თებერვალში დაიწყო, 21 თებერვალს კი სიგუას შემაკავებელი ორდერი გამოუწერეს. ქალის თქმით, გაიმართა სასამართლო სხდომაც, სადაც მოსამართლემ მასზე ძალადობის ფაქტები მოისმინა. ძალადობის შესახებ აცნობა გენერალურ ინსპექციასაც. სოფია სიგუას თქმით, ამის შემდეგ მის იმჟამინდელ ადვოკატზე მუქარა და ზეწოლა დაიწყო, რომელსაც შინაგან საქმეთა მინისტრის მოადგილე, რონი მესხი ხელმძღვანელობდა. TV პირველთან მესხი ბრალდებებს უარყოფს და კითხვებს ასე პასუხობს — “ოჯახური კონფლიქტი აქვთ ორივეს”.
TV პირველის სიუჟეტში ასევე ნაჩვენებია შემაკავებელი ორდერის გამოწერიდან რამდენიმე დღეში, 4 მარტით დათარიღებული შეთანხმების დოკუმენტი. სიუჟეტის თანახმად, დოკუმენტში აღნიშნულია, რომ თუ ქალი პოლიციელი ქმრის წინააღმდეგ პროკურატურაში შეტანილ სარჩელს გამოიტანს და შემაკავებელი ორდერის გაუქმებას მოითხოვს, ქორწინებაში შეძენილი ქონების თანამესაკუთრე გახდება. სოფია სიგუას თქმით, გარიგებაზე იძულებითა და ზეწოლით დაითანხმეს. ტელეკომპანიის ცნობით, სამ თვეში სოსო სიგუამ შეთანხმების გაუქმება მოითხოვა, უარი თქვა შვილებისთვის ალიმენტის გადახდაზე და სარჩელით სოფია სიგუას მშობლების ქონების დაყადაღება მოითხოვა.
ამ სიუჟეტიდან რამდენიმე დღეში სოსო სიგუა დააწინაურეს და ის ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს უფროსად დანიშნეს. 11 ივლისს კი ცნობილი გახდა, რომ გამოძიების დაწყების შემდეგ, სიგუას ელექტრონული სამაჯური გაუკეთეს, რის შემდეგად მან ახალი თანამდებობა დატოვა.
13 ივლისს ქალთა უფლედამცველმა ორგანიზაციამ, საფარმა განცხადება გამოაქვეყნა, სადაც აღნიშნულია, რომ სიგუა ცოლზე 13 წლის განმავლობაში ძალადობდა. მათი ცნობით, ქალმა ორგანიზაციას მიმდინარე წლის 8 ივლისს მიმართა, რის შემდეგაც საქმეში იურისტი ჩაერთო და პროკურატურამ სისხლის სამართლის გამოძიება დაიწყო. საფარის ინფორმაციით, პარალელურად, ქალი 112-ს დაუკავშირდა და შემაკავებელი ორდერის გამოცემა მოითხოვა, თუმცა რეაგირება არ მომხდარა: “მეტიც, გაირკვა, რომ ორდერის მოთხოვნაზე უკვე თავად იოსებ სიგუამაც გაიგო”.
მათივე ინფორმაციით, 10 ივლისს დაზარალებულმა კვლავ მიმართა 112-სა და შსს-ის გენერალურ ინსპექციას — უწყებამ, რისკების გათვალისწინებით, შემაკავებელთან ერთად, ელექტროსამაჯურის დაყენების საჭიროება გამოავლინა. ორგანიზაციის ინფორმაციით, საჭირო პროცედურები საღამოს 8 საათზე დასრულდა, თუმცა ქალი სპეციალური აპარატის დამონტაჟებას კიდევ 5 საათი ელოდა.
“შსს-ში დარეკვისას მას პასუხობდნენ, რომ გარკვეულ პროცედურებსა და მოძალადესთან დაკავშირებას დრო სჭირდებოდა. გვიან ღამით, უკვე 11 ივლისს, ელექტრონული ზედამხედველობის აპარატი ამოქმედდა”, — ნათქვამია განცხადებაში.
საფარი წერს, რომ იმავე დღეს შსს-ის წარმომადგენელმა, პროტოკოლის მიხედვით, ელექტრონული ზედამხევდელობის დასამტკიცებლად სასამართლოს მიმართა. 12 ივლისს გამართულ სხდომაზე სასამართლომ საფარის პოზიცია სრულად გაიზიარა და მოთხოვნა 1 თვის ვადით დააკმაყოფილა.
საფარის ცნობითვე, სოსო სიგუა და მისი ადვოკატები მიზანმიმართულად ავრცელებენ ინფორმაციას, თითქოს საქმე ქონებრივ დავას ეხება.
“ამგვარი ცრუ ნარატივით დაცვის მხარე ცდილობს დაჩრდილოს და მეორეხარისხოვანი გახადოს მსხვერპლის 13-წლიანი ძალადობრივი გამოცდილება, რაც სოფია სიგუას დისკრედიტაციას და საზოგადოების შეცდომაში შეყვანას ისახავს მიზნად. მოვუწოდებთ მედია საშუალებებს, გადაამოწმონ ინფორმაცია და თავი შეიკავონ ცალმხრივი გაშუქებისგან”, — აღნიშნავენ ისინი.
ამ ხნის განმავლობაში სოსო სიგუას განცხადება არ გაუკეთებია. 11 ივლისს გამართული სხდომის შემდეგ, მისმა ადვოკატმა, თეონა გვაზავამ ჟურნალისტებთან ბრალდებები უარყო. ამ ეტაპზე საქმეზე გამოძიება სისხლის სამართლის კოდექსის 126-ე პრიმა მუხლის პირველი ნაწილით მიმდინარეობს, რაც ოჯახში ძალადობას გულისხმობს.
იოსებ სიგუას სახელი ხორავას საქმეს უკავშირდება, სადაც ის გამომძიებლის რანგში იყო. დავით სარალიძის ოჯახი მას მკვლელობის ფალსიფიცირებაში ადანაშაულებდა. სიგუა საზოგადოებას 2018 წელს ამ საქმესთან დაკავშირებით პარლამენტში შექმნილი საგამოძიებო კომისიის სხდომიდან ახსოვს, სადაც მისი გამოსვლა კრიტიკის საგანი გახდა. მომდევნო სხდომაზე ის აღარ გამოცხადდა, მიზეზად კი ჯანმრთელობის მდგომარეობა დასახელდა.