2024 წლის ნოემბრის ბოლოდან ქვეყანაში უწყვეტი პროტესტია. 315 დღეა, დემონსტრაციების უმრავლესობაზე, თბილისსა თუ რეგიონში, ერთ ნაცნობ სახეს ნახავთ, კამერით ხელში. ეს ჟურნალისტი მარიამ ნიკურაძეა, რომელიც ამ პერიოდში, პროფესიული მოვალეობის შესრულებისას 4-ჯერ, ჯამში 20 000 ლარით დააჯარიმეს. შინაგან საქმეთა სამინისტრო მას “გზის გადაკეტვას” ედავება.

ჯარიმა ჟურნალისტების დევნის ერთადერთი მეთოდი არ არის, რომელსაც ქართული ოცნება იყენებს. ამას ახლავს ფიზიკური ძალადობა, ტექნიკის დაზიანება, გამოკითხვაზე დაბარება, რეპრესიული კანონები და ფინანსური სირთულეები. მარიამი ჟურნალისტიკაში 2009 წლიდან არის და როგორც რეპორტიორს, ასევე OC Media -ს თანადამფუძნებელსა და აღამასრულებელ დირექტორს, ყველა ამ სირთულესთან უწევს გამკლავება.
მაგალითად, 7 დეკემბერს, OC Media-მ გაავრცელა ინფორმაცია, რომ შესაძლოა, მარიამ ნიკურაძე იმ ადამიანების სიაში ყოფილიყო, ვის დაკავებასაც ქართული ოცნების ხელისუფლება გეგმავდა. შემდეგ დღეებში მარიამი კრიმინალურმა პოლიციამ გამოკითხვაზე დაიბარა. 10 დეკემბერს ჟურნალისტი თბილისის საქალაქო სასამართლოში მაგისტრატი მოსამართლის თანდასწრებით გამოიკითხა ჯგუფური ძალადობის საქმეზე, რომლის გამოძიებაც სისხლის სამართლის კოდექსის 225 და 239 პრიმა მუხლებით მიმდინარეობდა.
16 წლის განმავლობაში დოკუმენტური ფოტოგრაფიითა თუ მულტიმედია მასალებით მარიამმა მკითხველს არაერთი ამბავი უამბო საქართველოს სხვადასხვა კუთხიდან — ისტორიები, რომლებიც ხშირად ვერ ხვდებოდა ცენტრალური მედიების ყურადღების ქვეშ. წნეხისა და დაშინების მცდელობის მიუხედავად, ახლაც იმავეს აგრძელებს. რეგიონებიდან, სინდისის პატიმრების მშობლების გასვლებიდან თუ აქციებიდან ამბებს ხშირად საკუთარი სოციალური პლატფორმებით ავრცელებს და სხვა მედიებსაც აძლევს კონტენტის გამოყენების შესაძლებლობას.
მედია აპრილი მარიამს OC Media -ს დაფუძნებასა და განვითარებაზე, ჟურნალისტების უსაფრთხოების გაზრდილს რისკებსა და მედიის გაქრობის საფრთხეზე ესაუბრა.
როგორ დაიწყო ყველაფერი
“OC Media-ს შექმნის იდეა მე და დომინიკ ცაგარას, ჩემს კოლეგას და მეგობარს, გაგვიჩნდა 2016 წლის ბოლოსკენ. ერთად ვმუშაობდით სხვა გამოცემაში და იმ დროინდელი მედიის რეალობაში რაღაცები არ მოგვწონდა”, — გვიყვება მარიამი.

იმ დროს ონლაინ მედია სწრაფად იცვლებოდა: სოციალური ქსელები აქტიური ხდებოდა, ჩნდებოდნენ ე.წ. მოქალაქე ჟურნალისტები, იზრდებოდა კონკურენცია — ვინ გააშუქებდა ამბავს პირველი. როგორც მარიამი ამბობს, ეს ტენდენცია ამცირებდა სტატიების ზომას და ხარისხს — ჩნდებოდა ხუთწინადადებიანი ნიუსები, ჟურნალისტებს ხშირად აღარ უშვებდნენ ველზე სამუშაოდ და ოფისიდან ამზადებდნენ მასალას, რათა სისწრაფე არ დაეკარგათ.
“ამ ყველაფერმა ხარისხი დაწია. ეს ტრენდი ჩემს ნიუსრუმშიც გაჩნდა და ძალიან არ მომწონდა”, — იხსენებს მარიამი.
“ჟურნალისტიკაში ფულს ვერ იშოვი. აქ რომ მოდიხარ, მით უმეტეს, დღეს, ძალიან ბევრ რამეს რისკავ, ძალიან. ეს თუ გაქვს გააზრებული და მაინც მოტივირებული ხარ, მაშინ სწორ ადგილას ხარ”.
რესპონდენტებთან პირდაპირი კომუნიკაციისა და ველზე მუშაობის გარდა, მისი ერთ-ერთი მთავარი მოტივაცია კავკასიის თემების სრულყოფილად გაშუქების სურვილი იყო — განსაკუთრებით, ჩრდილო კავკასიის, რაც მაშინდელ ქართულ მედიაში პრაქტიკულად არ ჩანდა.
“როცა მე და დომინიკმა იდეები შევაჯერეთ, ასეთი ამბავი წამოვიდა: Open Caucasus Media — იგულისხმება კავკასია საზღვრების მიღმა, ანუ ერთიანად რომ შევხედოთ ამ რეგიონს. […] თავიდან მახსოვს, ჟურნალისტები ჩრდილო კავკასიის რესპუბლიკებშიც კი გვყავდა, მათ შორის, ჩეჩნეთში. თუმცა წლების განმავლობაში უფრო და უფრო გართულდა იქ ადგილზე ჟურნალისტების ყოლა. ზოგის ევაკუაციაც კი მოგვიხდა. ახლა მთლიანად კავკასიაში შეცვლილი მდგომარეობაა მედიის თავისუფლების თვალსაზრისით”, — ამბობს მარიამი.
იდეის გაჩენიდან მალევე, მარიამმა და დომინიკმა ეს ამბავი გაუზიარეს მეგობარს — ქეროლაინს, რომელიც ჩაიხანას დამფუძნებელი იყო. ქეროლაინი მათ საპილოტე დაფინანსების მოპოვებაში დაეხმარა. და ასე, ერთ თვეში, OC Media-ს საიტი ჩაეშვა, გუნდში ათზე მეტი ადამიანით.
“სულ მახსენდება ხოლმე, როგორ გულუბრყვილოდ ვუყურებდით რაღაცებს. მაგალითად, გვეგონა, რომ გვექნებოდა დღეების მიხედვით გაწერილი თემები. პირობითად, ორშაბათს იქნებოდა გარემოს დაცვის დღე, სამშაბათს ქალთა უფლებებზე გამოვაქვეყნებდით სტატიას, ოთხშაბათს კიდევ სხვა თემაზე, რაც გვაინტერესებდა, ანუ კონფლიქტი, ადამიანის უფლებები და ა.შ. გაწერილი გვექნებოდა და ასე მოვემზადეთ თავიდანვე. სტატიები წინასწარ გვქონდა დაწერილი, რომ ნელ-ნელა მივყოლოდით. მერე გაირკვა, რომ ასე ადვილი არ არის, თუნდაც, მაგალითად, გარემოს თემაზე ხშირად წერო, იმიტომ, რომ ძალიან რთულია ჩვენს რეგიონში რაღაც თემებზე მუშაობა”, — ამბობს მარიამი.
თავიდან საიტი ორ ენაზე — ინგლისურად და რუსულად ჩაუშვეს, რათა მარტივად მისულიყვნენ კავკასიის რეგიონში ადგილობრივ აუდიტორიამდე, ვისთვისაც რუსული მეორე ენა იყო. გუნდი ნახევარ რესურსს ინგლისურ ვერსიაზე ხარჯავდა, ნახევარს კი, რუსულზე. მარიამი იხსენებს, რომ ინგლისურენოვანი აუდიტორია ძალიან სწრაფად იზრდებოდა და დღესაც იზრდება, თუმცა რუსულმა რაღაც დონეს მიაღწია და გაჩერდა. იყო ექსპერიმენტების პერიოდი, მრავალი მცდელობა, რომ რუსულენოვანი აუდიტორიისთვისაც ამბები ხელმისაწვდომი ყოფილიყო, თუმცა საბოლოო ჯამში ამ მიზნის მიღწევა ვერ მოხერდა, ამიტომ გუნდმა გადაწყვიტა დამოკიდებულების შეცვლა და ასე გაჩნდა თანამშრომლობის იდეა.
“ახლა გვვყავს 6 პარტნიორი მედია სამხრეთ კავკასიაში, რომლებიც ოთხ ენაზე თარგმნიან ჩვენს კონტენტს: ქართულად, სომხურად, აზერბაიჯანულად და რუსულად, რისთვისაც ჩვენ ვუხდით თარგმნის თანხას. აქ არის ორი ფაქტორი: ერთი, რომ ჩვენთვის ეს არის წვდომა ადგილობრივ მკითხველთან, მათთვის კი, არის ის კონტენტი, რომელსაც გარკვეული მიზეზების გამო ვერ ქმნიან. მაგალითად, სომხეთსა და აზერბაიჯანს ერთმანეთის ქვეყნებში არ ჰყავთ ჟურნალისტები ადგილზე და ა.შ.”.
განმარტავს, რომ სომხური გამოცემა — CivilNet ხშირად აქვეყნებს სტატიებს აზერბაიჯანიდან, და პირიქით, აზერბაიჯანულ Meydan TV -ს ხშირად წაუღია სტატიები სომხეთიდან. პარტნიორობა საკმაოდ აქტიურია, ამბობს მარიამი — თვეში დაახლოებით 40-50 სტატიას თარგმნიან და ხშირად უთქვამთ კიდევაც, რომ OC Media-დან წაღებული სტატიები პერიოდულად ყველაზე კითხვადია.
ღირებულებები და ხედვა
“OC Media (Open Caucasus Media) გიყვებათ ახალ ამბებს ჩრდილოეთ და სამხრეთ კავკასიიდან, გთავაზობთ სათაურების მიღმა სიღრმისეულ ანალიზს იმ საკითხებზე, მოძრაობებზე, კონფლიქტებსა და ადამიანებზე, რომლებიც ქმნიან რეგიონის დღევანდელობას” — ასე პასუხობს კითხვას “ვინ ვართ ჩვენ” OC Media-ს გუნდი.
ვებ-გვერდზე გაწერილია ღირებულებები, რომლითაც გამოცემა ხელმძღვანელობს:
- პატიოსნება: ჩვენ პოლიტიკურად დამოუკიდებლები ვართ. ჩვენი დაფინანსება, როგორც ინსტიტუციური დონორების, ასევე მკითხველების მხრიდან, განაპირობებს სარედაქციო დამოუკიდებლობის შენარჩუნებასა და ჩვენი ღირებულებებისადმი ურყევ ერთგულებას. ჩვენ ვისწრაფვით მიუკერძოებელი, ზუსტი და პატიოსანი რეპორტაჟებისკენ. მივყვებით სიმართლეს, სადაც არ უნდა მივიდეს ის.
- სამართლიანობა: ჩვენ გვჯერა სოციალური და ეკონომიკური სამართლიანობის ყველასთვის.
- მშვიდობა: რეგიონში, რომელზეც გავლენას ახდენს თემთაშორისი და სახელმწიფოთაშორისი კონფლიქტები, ჩვენ მტკიცედ ვრჩებით ერთგული ყოვლისმომცველი მშვიდობისა, რომელიც თავისუფალია ძალადობის ყველა ფორმისგან.
- ინკლუზიურობა: ჩვენ ვიცავთ თანასწორობას ყველასთვის, ვაძლიერებთ კავკასიაში მცხოვრები ხალხის ხმას.
- თანამშრომლობა კონკურენციის ნაცვლად — OC Media-ს ერთ-ერთი მთავარი პრინციპი თავიდანვე იყო თანამშრომლობა სხვა მედიებთან.
“OC Media მარგინალიზებული ადამიანებისთვის ხმის მიცემის პლატფორმაა. ვისაც არ აქვს საშუალება, რომ დიდ აუდიტორიას მიწვდეს, მათთვის ხმის მიცემის საშუალება არის ეს. ბევრ სხვა რამესთან ერთად, ადამიანების ერთმანეთთან დაახლოება, დაკავშირება კავკასიის რეგიონში”, — ასე აჯამებს მარიამი მედიის ღირებულებსა და მთავარ მისიას.

OC Media-ს გუნდისთვის მნიშვნელოვანია, ყოველი ახალი თანამშრომელი იზიარებდეს საერთო ღირებულებებსა და მისიას. სხვა შემთხვევაში არასდროს გამოდის ხოლმე თანამშრომლობა — გვეუბნება მარიამი.
გამოწვევები და ბრძოლა რეჟიმების წინააღმდეგ
რედაქციამ წლების განმავლობაში არაერთი გამოწვევა გამოიარა: ჟურნალისტების ევაკუაცია, დაფინანსების დაკარგვა, რუსეთის მიერ “არასასურველ ორგანიზაციად” შერაცხვა და სხვა. რუსეთში ე.წ. აგენტების კანონი ჯერ კიდევ 2012 წელს მიიღეს. კანონის მოქმედების ფარგლები წლების განმავლობაში ეტაპობრივად გაფართოვდა და მოიცვა მედია, ინდივიდუალური აქტივისტები და არასამთავრობო ორგანიზაციებიც. 2015 წელს კი, რუსეთში კიდევ ერთი შემზღუდავი კანონი მიიღეს — “არასასურველი ორგანიზაციების შესახებ”.
ეს კანონი სხვადასხვა საერთაშორისო და უცხოურ მედიასა და ორგანიზაციას შეეხო, რომელიც რუსეთის გენერალური პროკურატურის აზრით “წარმოადგენს საფრთხეს ქვეყნის კონსტიტუციური წესრიგის საფუძვლებისთვის, თავდაცვისუნარიანობისთვის ან უსაფრთხოებისთვის”. ამ სიაში ისეთი ორგანიზაციებიც შეიძლება მოხვდეს, რომლებიც რეგისტრირებულნი არ არიან ე.წ. აგენტების კანონით, მაგრამ არასასურველები არიან, იმიტომ, რომ რუსეთს აშუქებენ ამა თუ იმ ფორმით. რახან OC Media ჩრდილო კავკასიას აქტიურად აშუქებდა, ამ სიაში მოვხვდით, გვეუბნება მარიამი.
“იმ სტატიაში, რომელიც ჩვენზე ეწერათ, ამ სიაში ჩასმის მიზეზად დასახელებული იყო ის, რომ მათი შეფასებით: “დასავლური დონორების მიერ დაფინანსებული ორგანიზაცია ავრცელებდა ანტირუსულ ნარატივებს” — მოკლედ, რაც ახლა ჩვენთან არის რეალობა, მაგრამ მაშინ ახალი იყო და ვფიქრობდით, რომ რა კარგია, საქართველოში ვართ რეგისტრირებულები, რომ ეს ჩვენ არასდროს დაგვემართება აქ. მალევე, ერთ-ორ წელში აგენტების კანონი პირველად შემოიტანეს საქართველოს პარლამენტში და უკვე გაჩნდა ეგ საფრთხეც, რომ რაღაც მომენტში უკვე საქართველოში გავხდებოდით ამ კანონების სამიზნეები და გავხდით კიდეც”.
საქართველოში პოლიტიკური დღის წესრიგისა და მედიებისადმი დამოკიდებულების ცვლილებების პარალელურად, რედაქციაში იცვლებოდა უსაფრთხოების პროტოკოლიც.
“პირველად ე.წ. გავრილოვის ღამის შემდეგ დავფიქრდით ფიზიკური აღჭურვილობის ყიდვაზე. 5 ივლისის შემდეგ უკვე განვიხილავდით, რა დროს სჯობდა პრესის ბეიჯით გასვლა ველზე და რა დროს — არა. აგენტების კანონების მერე კიდევ უფრო გართულდა რეალობა, რადგანაც პირდაპირ პოლიცია დაგვიპირისპირდა. ახლა თითო ჯერზე, როცა რაიმე დიდი აქციის გასაშუქებლად გავდივართ, ინდივიდუალურად განვიხილავთ, უსაფრთხოების რა ზომები დავიცვათ, რომ უკეთ ვიყოთ დაცულები, მაგრამ რთულია. ნოემბერ-დეკემბერში მე პირადად ორი კამერა დამიმტვრიეს, ტელეფონი არაერთხელ დამიგდეს, წყლის ჭავლში გარეული ნივთიერებით მოვიწამლე და ა.შ. ეს ყველაფერი ხდებოდა მიუხედავად ჩვენი მცდელობებისა, მაქსიმალურად დაცულები ვყოფილიყავით”.

“კანონის უზენაესობა აღარ არის ქვეყანაში, ამიტომ თუკი, ვთქვათ, ქართულ ოცნებას ვინმე არ მოსწონს და თავიდან მოშორება უნდა, სულ არ სჭირდება ე.წ. ფარას კანონი, ათასი გზა აქვს ამისთვის. ამიტომ შევეშვით მაგაში დროის კარგვას. რაღაცები შევცვალეთ, თუმცა საქმიანობას ძველებურად ვაგრძელებთ”.
ქართული ოცნების მიერ ამუშავებული არადემოკრატიული კანონების პარალელურად, რედაქცია მოულოდნელ გამოწვევებსაც შეეჩეხა — ე.წ. ფარას ძალაში შესვლამდე OC Media ოფისიდან გამოუშვეს. 6 წელი მუშაობდნენ იმ ადგილიდან, თუმცა ქირა აღარ გაუგრძელეს. ახალი ოფისის პოვნა გაუჭირდათ.
“როდესაც უკვე ვეძებდით სივრცეებს, რამდენიმე შემთხვევა იყო, სადაც ან პირდაპირ გვითხრეს, რომ არ მოგვაქირავებდნენ, რადგან მედია ვართ, ასევე, რაღაც მოგონილი მიზეზებით ბოლო მომენტში — კონტრაქტისთვის ხელი რომ უნდა მოგვეწერა, მაშინ გვეუბნებოდნენ უარს. ამან მიგვახვედრა, რამდენად მსუსხავი ეფექტი ჰქონდა ამ კანონს მიღებამდეც. ადამიანებს შეეშინდათ, ეთანამშრომლათ ისეთ ორგანიზაციასთან, რომელიც მიზანში ჰყავს ამ ახალ კანონს”.
მარიამი განმარტავს, რომ სხვა მედიებისგან განსხვავებით, კიდევ ერთი გამოწვევაა ის, რომ მათი გუნდის წევრების ნაწილი საქართველოს მოქალაქე არ არის: “რაც საზღვარზე შემოშვების პრობლემები გაჩნდა, ჩვენთვისაც გაიზარდა საფრთხე. გვაქვს შემთხვევები, როცა ჩვენს ჟურნალისტებს ან რედაქტორებს საზღვარზე აყოვნებენ. ჯერ შემოშვებაზე არავისთვის უთქვამთ უარი, მაგრამ ეს საფრთხე ჩვენთვის, სამწუხაროდ, აქტიური რჩება”.
მისი თქმით, OC Media-ს გუნდს განვითარებაში საერთო ღირებულებები, ურთიერთშეთანხმებით მიღებული გადაწყვეტილებები და ერთმანეთის გათვალისწინება ეხმარება.
წევრობის პროგრამა — მკითხველის მხარდაჭერის ძალა
“მედიის გარეშე ძალიან ბევრი რაღაც არ გვეცოდინებოდა. მედია არამხოლოდ ყოველდღიურ და პოლიტიკურ ამბებს, არამედ ბევრ ისეთ დაფარულ ისტორიას იძიებს და იკვლევს ხოლმე, რასაც ასე ჰაერიდან ვერ გავიგებდით. თუნდაც კორუფციული სქემები, ადამიანის უფლებების შელახვა, რომელიც გვაჩვენებს, ფარდის უკან ხდება”, – ამბობს მარიამი.
იხსენებს 2023 წლის გაზაფხულს, როცა სწორედ მედიამ და ჟურნალისტებმა დაიწყეს რუსულ კანონზე ხმაური. მაშინ სხვადასხვა დამოუკიდებელი მედიასაშუალების წარმომადგენლებმა პარლამენტში აქცია გამართეს და კამპანიები წამოიწყეს, რომლითაც აუდიტორიას უხსნიდნენ, რატომ იყო ეს კანონი პრობლემური და რა საფრთხეს შეუქმნიდა რიგით მოქალაქესა თუ მთლიანად ქვეყანას.
მარიამი ამბობს, რომ დღეს მედიას სჭრდება მკითხველის გვერდში დგომა. მიუხედავად სკეპტიკური დამოკიდებულებისა, რომ ჩვენს რეგიონში, მედიისთვის და ხარისხიანი ამბისთვის ფულს არავინ გადაიხდიდა, OC Media-მ გადაწყვიტა, მაინც ეცადა და ერთ-ერთი პირველი იყო, რომელმაც მკითხველს მხარდაჭერისკენ მოუხმო.
მედიამ დონაციის ღილაკი პირველად კოვიდის პერიოდში ჩართო. ამ დროს მარიამი უფრო ექსპერიმენტების სახელით იხსენებს, მაგრამ სწორედ ამ გზამ რედაქცია თანდათან წევრობის პროგრამის ჩაშვებამდე მიიყვანა. მკითხველების მხარდაჭერის საჭიროება განსაკუთრებით რუსული კანონის მეორედ მიღების პარალელურად გამოიკვეთა.
წევრობის პროგრამის დაწყებამდე, მედიას 50-მდე ლოიალური მკითხველი ჰყავდა, რომლებიც ყოველთვიურად ურიცხავდნენ ფულს მედიას.
“ცოტა უკეთეს მდგომარეობაში ვართ ადგილობრივი მედიისგან განსხვავებით, იმიტომ, რომ უცხოელი მკითხველი გვყავს და ბევრი მკითხველი დასავლური ქვეყნებიდან არის, სადაც უკვე განვითარებული კულტურაა ხარისხიანი ახალი ამბებისთვის ფულის გადახდა და მზად იყო ეს ნაწილი მაგისთვის. რაღაცნაირად უფრო ადვილად წავიდა ეს ე.წ. წევრობის პროგრამა”.
მარიამი განმარტავს, რით განსხვავდება წევრობის პროგრამა დონაციისგან: გამომწერები სანაცვლოდ ექსკლუზიურ კონტენტს იღებენ, საჩუქრებს ან სხვა ბენეფიტებს. მაგალითად, ექსკლუზიურ ნიუსლეთერს, ჩანთას, ბლოკნოტს და ა.შ.
“დღეს გვყავს 400-მდე გამომწერი, რომელიც ჩვენი შემოსავლის დაახლოებით 10%-ს ფარავს. გვეგონა, ვერასდროს მივაღწევდით ამას. მათი მხარდაჭერა კი ძალიან მნიშვნელოვანი აღმოჩნდა ამ რთულ პერიოდში. მკითხველი მხარში დაგვიდგა და ეს ძალიან გვაძლიერებს და გვაიმედებს”.
დამოუკდებელი მედიის საქმიანობა არის საპასუხო ბრძოლა რეჟიმის წინააღმდეგ და OC Media-შიც სჯერათ, რომ იქამდე იარსებებენ, სანამ ამის შესაძლებლობა ექნებათ — ფიზიკურად აქ თუ სხვა ფორმით.
OC Media-ს მიზანია, 2025 წლის ბოლოსთვის ვებგვერდზე 1000 გამომწერი ჰყავდეთ და თანდათან მკითხველებზე დაფუძნებული მედია გახდნენ.
“მისიამ და ღირებულებებმა მოგვიყვანა აქამდე. მათ შორის, მეც ვერ წარმომიდგენია სხვა რამის კეთება, უბრალოდ ინტერესი არ მაქვს, სხვა რამ ვაკეთო”, — ამბობს მარიამი.
“მედიის გაძლიერებისთვის დღეს და ახლა ყველაზე მთავარია მკითხველის მხარდაჭერა, არ ვგულისხმობ მხოლოდ ფინანსურად. ერთგულება, გაზიარება, ნდობა — ეს ყველაფერი ძალიან ეხმარება მედიებს და რაღაცნაირად ეს უნდა გაიზარდოს. მკითხველს უნდა ველაპარაკოთ მეტი, უნდა ავუხსნათ, რა მოხდება, თუ გავქრებით — ძალიან მარტივად რომ ვთქვათ, სიმართლის მთქმელი აღარავინ დარჩება”.
ამ ბმულზე გაიგებ უფრო მეტს, როგორ შეგიძლია დაეხმარო წევრობით OC Media-ს.
დღეს საქართველოში დამოუკიდებელი ონლაინმედია გადარჩენისთვის იბრძვის. რეპრესიული რეჟიმი ცდილობს ჩაახშოს ხმები, რომლებიც სიმართლეს ამბობენ. დამოუკიდებელი მედიების მხარდაჭერის მიზნით შეიქმნა ერთიანი პლატფორმა: sinatle.media.
22 ონლაინმედია მთელი საქართველოდან გავერთიანდით, რომ დავიცვათ ის, რაც ყველას გვეკუთვნის: თავისუფალი სიტყვა და დემოკრატია. კამპანიაში მონაწილე ონლაინ მედიებს შორის არის OC Media.
შენი მხარდაჭერა ამ ბრძოლაში გადამწყვეტია. გადარიცხე დამოუკიდებელი ონლაინმედიის მხარდასაჭერად და დაგვეხმარე ინფორმაციის გავრცელებაში
- თიბისი ბანკი: #GE76TB7548536080100013
- საქართველოს ბანკი: #GE06BG0000000609779465
- ემიგრაციიდან: https://www.gofundme.com/…/help-media-in-the-fight-for…