ზუგდიდელი აქტივისტი კერენ ესებუა, რომელსაც სასამართლო ირაკლი ზარქუას შეურაცხყოფას ედავებოდა, 3500 ლარით დააჯარიმეს. სასამართლოს გადაწყვეტილების შესახებ ინფორმაცია აქტივისტმა, მარიამ სიჭინავამ გაავრცელა, რომელსაც იმავეს ედავებიან.
საქმე უკავშირდება 21 მაისს ოცნების დეპუტატ ზარქუასა და მისი თანმხლები პირების ზუგდიდში, ერთ-ერთ სასტუმროში სტუმრობას, სადაც მას აქტივისტები დახვდნენ და პროტესტი გამოხატეს.
კერენ ესებუასა და მარიამ სიჭინავას წინააღმდეგ გამოძიება ადმინისტრაციულ სამართალდარღვევათა კოდექსის 173-ე 16 პრიმა მუხლის პირველი ნაწილით დაიწყო, რაც საჯარო თანამდებობის პირის შეურაცხყოფას გულისხმობს და 4 ათას ლარამდე ჯარიმას ან 45 დღემდე პატიმრობას ითვალისწინებს.
როგორც მარიამ სიჭინავამ განაცხადა, მისი სასამართლო პროცესი 1 საათით გადაიდო. აქტივისტის განმარტებით, მოსამართლემ არ დააკმაყოფილა შუამდგომლობა ორივე საქმის გაერთიანებაზე და რადგან ერთი ადვოკატი ჰყავდათ, პროცესი გადადეს.
კერენი, რომელიც შეზღუდული შესაძლებლობის მქონე დედისთვის ერთადერთი მზრუნველია, მედია აპრილს სასამართლო პროცესამდე ესაუბრა და აღნიშნა, რომ მისი მოლოდინით, პატიმრობას შეუფარდებდნენ.
“ვთვლი, რომ ე.წ. მთავრობას სურს ჩვენი სამაგალითოდ დასჯა, რადგან ძალიან კარგად იციან რომ ხალხის ბრაზი მატულობს და რეალურად ქუჩაში გავლის ეშინიათ, აღარ ენდობიან საკუთარ თავს, აღარ იციან რას ჩაებღაუჭონ და როგორ მართონ მოვლენები მათთვის სასარგებლოდ, ე.წ. მთავრობა იმდენად შეშინებულია ორი აქტივისტი ქალით ზუგდიდიდან, რომ საჭიროდ ჩათვალეს ამ მოვლენას გამოხმაურებოდნენ თვითმარქვია მთავრობის სრული შემადგენლობით”, — აღნიშნა მან მედია აპრილთან საუბრისას.
ესებუამ განგვიცხადა ისიც, რომ გადაწყვეტილება მისი დაპატიმრების შესახებ დედამისის გაწირვაც იქნებოდა.
“მე ვეხმარები ყველა საქმეში. მისთვის არ შეიძლება ნერვიულობა, რადგან არსებობს ბადურის ჩამოშლის საფრთხე და ეს ექიმის დადგენილებაა. მისთვის არ შეიძლება სამ კილოზე მეტი წონის აწევა, ქუჩაში მარტო გადაადგილება, ის ყოველდღიურად წამლებზეა. მაშანტაჟებენ და მეუბნებიან ან დედაშენს გავწირავთ ან გაჩუმდი, იმიტომ, რომ ჩემთვის თავისუფლების აღკვეთა დედაჩემის გაწირვაა, მათი მხრიდან ამას განვიხილავ პირდაპირ მუქარად ჩემი მშობლის უსაფრთხოების მიმართ“.
კერენი თვლის, რომ ზარქუასა და მისი თანმხლები პირების მხრიდან შეურაცხყოფის სამიზნედ იქცა, ამასთან, 21 მაისის კადრებშიც ჩანს, რომ ზარქუას თანმხლებმა პირმა კერენ ესებუას კუთვნილი ტელეფონი ხელიდან გააგდებიან. კერენის თქმით, აღნიშნულზე ცალკე სამართალწარმოება მიმდინარეობს.