ამერიკის შეერთებული შტატების სენატის საგარეო ურთიერთობათა კომიტეტის თავმჯდომარე ბენ კარდინი, 14 ქვეყნისა და ევროკავშირის წარმომადგენელთან ერთად, ერთობლივი განცხადებით გმობს რუსული კანონის მიღებას. განცხადებაში ნათქვამია, რომ რუსული კანონი ვლადიმერ პუტინის პოლიტიკის ასახვაა; აქვე ვკითხულობთ, რომ კანონი არის სამოქალაქო საზოგადოებასა და დამოუკიდებელი მედიაზე თავდასხმა.
განცხადების ხელმომწერნი მხარდაჭერას უცხადებენ ქართველ ხალხს, “რომელმაც მამაცურად გამოავლინა თავისი მტკიცე ერთგულება დემოკრატიული ღირებულებებისადმი მშვიდობიანი წინააღმდეგობის გზით”.
“მიუხედავად მეგობრებისა და მოკავშირეების არაერთგზის გამოთქმული შეშფოთებისა, საქართველოს პარლამენტმა საგანგაშო და რეპრესიული ნაბიჯი გადადგა, რომელიც ძირს უთხრის დემოკრატიას და ეწინააღმდეგება მის გაცხადებულ მიზანს დასავლური ინტეგრაციის თაობაზე. როგორც ევროატლანტიკურ კანონმდებლებს, ჩვენ გვესმის, რომ პარლამენტის როლი ხალხის ნების ასახვაა და ქართველებმა ცალსახად უარყვეს ეს კრემლის მიერ შთაგონებული კანონი, როგორც შეუთავსებელი მათ იდენტობასთან, ევროპულ ღირებულებებთან და დემოკრატიულ პრინციპებთან. მარტივად რომ ვთქვათ, ეს ე.წ. “უცხოური აგენტის” კანონი ასახავს ვლადიმერ პუტინის პოლიტიკას, რომელიც საქართველოს ტერიტორიის 20%-ის უკანონო ოკუპაციას განაგრძობს.
იმგვარი პატივცემული ქართული ორგანიზაციები, როგორებიცაა საერთაშორისო გამჭვირვალობა საქართველო (TI), სამართლიანი არჩევნებისა და დემოკრატიის საერთაშორისო საზოგადოება (ISFED) და საქართველოს ახალგაზრდა იურისტთა ასოციაცია (საია), საქართველოს ევროატლანტიკური ინტეგრაციის გზაზე გადამწყვეტ როლს თამაშობენ. ეს კანონი სრულიად ეწინააღმდეგება ასეთ ღირსეულ ძალისხმევას და ემსახურება როგორც პირდაპირ თავდასხმას სამოქალაქო საზოგადოებასა და დამოუკიდებელ მედიაზე, ისე დემოკრატიის ნებისმიერ ფუნდამენტური ელემენტზე.
შეერთებული შტატები და ევროპა მათ მხარდაჭერას განაგრძობენ, რადგან მათი ლიდერობა და ხედვა საქართველოსთვის ნამდვილ პატრიოტიზმს ასახავს, მკვეთრი განსხვავებით პარლამენტის 84 წევრისგან, რომლებიც გუშინდელ კენჭისყრაზე რუსეთს შეუერთდნენ. ჩვენ არასოდეს მივატოვებთ ქართველ ხალხს, რომელმაც მამაცურად გამოავლინა თავისი მტკიცე ერთგულება დემოკრატიული ღირებულებებისადმი მშვიდობიანი წინააღმდეგობის გზით, და არ ვიყოყმანებთ, პასუხისმგებლობა დავაკისროთ მათ, ვინც პასუხისმგებელია რუსული სტილის კანონის ამოქმედებასა და არაძალადობრივი დემონსტრანტების მიზანში სასტიკ ამოღებაზე, მათ შორის, ბიძინა ივანიშვილს და მის ახლობლებს. ქართველ ხალხს ვუცხადებთ: თქვენ მარტო არ ხართ”, — აღნიშნულია განცხადებაში.
განცხადებას ხელს აწერენ ბელგიის, ჩეხეთის, ესტონეთის, ფინეთის, გერმანიის, ისლანდიის, ირლანდიის, იტალიის პარლამენტის საგარეო ურთიერთობათა კომიტეტის თავმჯდომარეები; ასევე, ევროკავშირი, ლატვია, ლიეტუვა, ნორვეგია, პოლონეთი, უკრაინა და გაერთიანებული სამეფო.