ბუნდესტაგის წევრი, ტომას ჰაკერი, რუსული კანონის წინააღმდეგ თბილისში გამართულ პროტესტებს კიდევ ერთხელ ეხმაურება და აცხადებს, რომ პარლამენტმა კანონპროექტის მიღება უნდა შეწყვიტოს.
“ქართულ ოცნებაზე” ჯერ კიდევ არ მოუხდენია შთაბეჭდილება ე.წ. უცხოური გავლენის გამჭვირვალობის შესახებ კანონის წინააღმდეგ გამართულ პროტესტს და დათმობის არანაირი ნიშანი არ ჩანს მათი მხრიდან. პრაქტიკაში, ეს კანონი მიზნად ისახავს კრიტიკული არასამთავრობო ორგანიზაციებისა და აქტიური სამოქალაქო საზოგადოების გაჩუმებას.
მმართველი პარტია სრულად არის განცალკევებული საქართველოს მოქალაქეების სურვილებისა და იმედებისგან. ის ბოიკოტს უცხადებს ქვეყნის ევროპულ მომავალს. პარლამენტმა დაუყოვნებლივ უნდა შეწყვიტოს კანონის მიღება” — აცხადებს ჰაკერი.
მისივე განცხადებით, თუ პარლამენტი არ შეწყვეტს რუსული კანონის განხილვას, წინააღმდეგ შემთხვევაში, ევროკავშირმა უნდა განიხილოს პერსონალური სანქციები ამ კანონის შემოქმედთა წინააღმდეგ და ასევე, განიხილოს საქართველოს კანდიდატის სტატუსის გაწვევა.
“ქართველი ხალხი, რომელიც ყოველდღიურად მამაცად აპროტესტებს ხელისუფლებასა და რუსეთის მიერ ძალით თავს მოხვეულ კანონს, ჩვენს პატივისცემასა და აღფრთოვანებას იმსახურებს. გუშინ მოვახერხე, გავყოლოდი მშვიდობიან აქციას ადგილზე და მივხვდი, რომ ამ დღეების განმავლობაში ევროპის გული თბილისში ფეთქავს”, — აცხადებს ჰაკერი.