საქართველოს სახალხო დამცველის განცხადებით, ამ ეტაპზე (29 აპრილი, 00:30) არ არსებობს შეკრების შეწყვეტის წინაპირობა და აქცია ატარებს მშვიდობიან ხასიათს. ომბუდსმენი მიმართავს შინაგან საქმეთა სამინისტროს, არ გამოიყენოს ძალა შეკრების მშვიდობიანი მონაწილეებს მიმართ და არ შეუშალოს მათ ხელი კონსტიტუციით გარანტირებული უფლებით სარგებლობაში.
გარდა ამისა, სახალხო დამცველი ხაზგასმით აღნიშნავს, რომ შეკრების თავისუფლებაში ჩარევა დასაშვებია მხოლოდ იმ შემთხვევაში, თუ აქცია მიიღებს ძალადობრივ ან/და კანონსაწინააღმდეგო ხასიათს, რა დროსაც ხელისუფლების მხრიდან შეკრების შეწყვეტა უკანასკნელ საშუალებად უნდა იქნას გამოყენებული, ხოლო აღნიშნულის ფარგლებში ძალის გამოყენება უნდა აკმაყოფილებდეს აუცილებლობისა და პროპორციულობის მკაცრ ტესტს. ამავე დროს, ომბუდსმენი მოუწოდებს აქციის ორგანიზატორებსა და მონაწილეებს, არ გასცდნენ მშვიდობიანი შეკრების ფარგლებს.
საქართველოს პარლამენტთან მოქალაქეები რუსულ კანონს აპროტესტებენ. 28 აპრილის აქციის ორგანიზატორებმა აქციის პარალელურად გაავრცელეს განცხადება, რომლის მიხედვით, საქართველოს პარლამენტის მიერ რუსული კანონის მიღება არის ხელისუფლების გასვლა კონსტიტუციური ჩარჩოდან. ისინი კატეგორიულად მოუწოდებენ ხელისუფლებას, არ ჩანიშნოს პლენარული სხდომა კანონის მეორე მოსმენის გასამართად 29 აპრილს, რადგან ეს იქნება კონსტიტუციის საწინააღმდეგო თვითნებობა, რასაც ისინი წინ აღუდგებიან.
გარდა ამისა, რესპუბლიკის მოედნიდან პარლამენტთან მარშით მისულმა მოქალაქეებმა ადგილზე მყოფ პოლიციას მიმართეს, ქართული ოცნების მიერ დამონტაჟებულ სცენაზე აეშვათ მედროშეები, რომლების სცენაზე აღმართავდნენ საქართველოსა და ევროკავშირის დროშებს. მათ ამის საშუალება არ მიეცათ და ადგილზე შსს-ის წარმომადგენლების რაოდენობა გაიზარდა. ამის შემდეგ პარლამენტთან გამოჩნდა სპეცრაზმი და წყლის ჭავლის მანქანა. ადგილზე რამდენჯერმე გაუშვეს, სავარაუდოდ, წიწაკის სპრეი. არსებული ინფორმაციით, დაკავებულია რამდენიმე ადამიანი. შინაგან საქმეთა სამინისტრო ადასტურებს, რომ რუსთაველის გამზირზე “სპეციალური საშუალება” გამოიყენა. უწყება ამტკიცებს, რომ აქციამ მიიღო “ძალადობრივი ხასიათი”.
განცხადება გაავრცელა თბილისის მერიამაც, რომელმაც შეკრებას “არასანქცირებული” უწოდა, მიუხედავად იმისა, რომ საქართველოს კანონმდებლობით, აქციის ჩატარებას სანქცია ან ნებართვა არ სჭირდება.