სოციალური სამართლიანობის ცენტრის განცხადებით, რუსული კანონის საპროტესტო აქციის მშვიდობიან მონაწილეს, ანდრო ჭელიძეს, რომელზეც პოლიციამ იძალადა, საქალაქო სასამართლომ ყველაზე მკაცრი ადმინისტრაციული სახდელი — პატიმრობა შეუფარდა.
ორგანიზაცია მიიჩნევს, რომ სასამართლოს გადაწყვეტილება დაუსაბუთებელია და რეპრესიული ფორმით აქციის მონაწილეების დაშინებასა და პროტესტის ჩახშობას ისახავს მიზნად.
აღნიშნავენ, რომ დაკავებული აქციის მიმდინარეობისას არ არღვევდა საზოგადოებრივ მშვიდობას და მხოლოდ რუსების მისამართით იგინებოდა, რაც სრულად ექცევა გამოხატვის თავისუფლებაში.
განცხადებაში ნათქვამია, რომ ანდრო ჭელიძე პოლიციამ წვრილმანი ხულიგნობისა და პოლიციელის შეურაცხყოფის შაბლონური საფუძვლით დააკავა და დაკავების მომენტში და ძველი თბილისის I სამმართველოში გადაყვანისას ამავე სამმართველოს თანამშრომლებმა ფიზიკურად იძალადეს.
სოციალური სამართლიანობის ცენტრის რეკომენდაციების თანახმად, მნიშვნელოვანია:
- შინაგან საქმეთა სამინისტრომ — შეწყვიტოს აქციის მონაწილეების უსაფუძვლო დაკავება და უზრუნველყოს პოლიციელის მოქალაქესთან კომუნიკაციის დროს სამხრე ვიდეო-კამერების ჩართვა ვალდებულება;
- პირველი და მეორე ინსტანციის სასამართლოებმა — ნეიტრალური და ობიექტური მტკიცებულებების არარსებობის პირობებში, შეწყვიტონ ადმინისტრაციული საქმის წარმოება;
- სპეციალურმა საგამოძიებო სამსახურმა — დროულად და ეფექტიანად გამოიძიოს სამართალდამცავების მხრიდან არაპროპორციული ძალის გამოყენების შემთხვევები და უზრუნველყოს საზოგადოების ინფორმირება გამოძიების მიმდინარეობაზე;
- საქართველოს სახალხო დამცველმა — განახორციელოს საპროტესტო აქციების მონიტორინგი უშუალოდ პარლამენტის მიმდებარე ტერიტორიაზე და საზოგადოებას პროაქტიულად მიაწოდოს ინფორმაცია პოლიციის მიერ ძალის გამოყენების აუცილებლობისა და პროპორციულობის შესახებ, ასევე, გააძლიეროს ძალისხმევა დაკავებულ პირთა რაოდენობის დადგენისა და მათი ადგილსამყოფელის მოძიების პროცესში;
- საქართველოს პარლამენტმა — გაიწვიოს ინიცირებული რუსული კანონპროექტი და მის ნაცვლად, რეალურად განახორციელოს ევროინტეგრაციის გზაზე განსაზღვრული პრიორიტეტული მიმართულებებით რეფორმები.