საქართველოს სახალხო დამცველის განცხადებით, შეკრების თავისუფლებაში ჩარევა დასაშვებია მხოლოდ იმ შემთხვევაში, თუ აქცია მიიღებს ძალადობრივ ან/და კანონსაწინააღმდეგო ხასიათს. ომბუდსმენი მოუწოდებს შინაგან საქმეთა სამინისტროს, უზრუნველყოს ყველა მოქალაქის გამოხატვისა და შეკრების თავისუფლების დაცვა უსაფრთხო გარემოში და ძალის გამოყენების შემთხვევაში დაიცვას შესაბამისი საერთაშორისო სტანდარტები.
“საქართველოს სახალხო დამცველის აპარატი განაგრძობს თბილისში პარლამენტის მიმდებარე ტერიტორიაზე მიმდინარე შეკრების მონიტორინგს. 2024 წლის 16 აპრილს 22:00 საათისთვის საქართველოს შინაგან საქმეთა სამინისტრომ დაიწყო ძალის გამოყენება აქციის მონაწილეთა მიმართ. მედიით გავრცელებული ინფორმაციით, გამოყენებულია ე.წ. წიწაკის სპრეი.
საქართველოს სახალხო დამცველი კიდევ ერთხელ ხაზგასმით აღნიშნავს, რომ შეკრების თავისუფლებაში ჩარევა დასაშვებია მხოლოდ იმ შემთხვევაში, თუ აქცია მიიღებს ძალადობრივ ან/და კანონსაწინააღმდეგო ხასიათს, ამავე დროს ძალის გამოყენება უნდა აკმაყოფილებდეს აუცილებლობისა და პროპორციულობის მკაცრ ტესტს“, – აღნიშნულია ომბუდსმენის განცხადებაში.
აქციიდან გავრცელებულ კადრებში ჩანს, რომ პარლამენტთან შეკრებილი მშვიდობიანი მოქალაქეების წინააღმდეგ, რომლებიც რუსულ კანონს აპროტესტებენ, წიწაკის სპრეი უკვე გამოიყენეს, ხოლო სპეციალური დანიშნულების რაზმი ძალის გამოყენებით ცდილობს დემონსტრანტებს ტერიტორია დაატოვებინოს. აქციაზე არიან დაშავებულებიც, რომლებსაც პირველადი სასწრაფო დახმარება დასჭირდათ.