საერთაშორისო გამჭვირვალობა – საქართველოს განცხადებით, თბილისის სააპელაციო სასამართლოს თავმჯდომარე მიხეილ ჩინჩალაძე მისთვის დაკისრებულ მოსამართლის ფუნქციას არ ასრულებს. TI-ის ცნობით, მისი 16-წლიანი მოსამართლის კარიერიდან 4-წლიანმა მონაკვეთმა, კერძოდ, 2010-2013 წლებმა, ისე გაიარა, რომ მას არცერთი საქმე არ განუხილავს, თუმცა 448 020 ლარის ანაზღაურება აიღო.
“ეს იმ ფონზე, როცა სასამართლო სისტემაში მოსამართლეთა გადატვირთულობა და მათ შორის, ამ მიზეზით, საქმეთა გაჭიანურება მნიშვნელოვანი გამოწვევაა”, — ვკითხულობთ განცხადებაში.
ორგანიზაცია ყურადღებას ამახვილებს იმ ფაქტზეც, რომ დანარჩენ წლებშიც ჩინჩალაძე თვეში, საშუალოდ, მხოლოდ 2 ორ საქმეს განიხილავდა მაშინ “როდესაც სხვა მოსამართლეებს წლის განმავლობაში ასობით საქმის განხილვა უწევთ”.
“მაგალითისთვის, 2022 წელს თბილისის სააპელაციო სასამართლოს მოსამართლის მიერ განხილული საქმეების საშუალო მაჩვენებელი 273 იყო”, — აღნიშნულია განცხადებაში.
ორგანიზაციის განცხადებით, მიხეილ ჩინჩალაძე სასამართლო სისტემაში არსებულ მოსამართლეთა ე.წ. კლანის ხელმძღვანელი და აშშ-ს მიერ კორუფციისთვის დასანქცირებული მოსამართლეა.
“ევროკომისიის რეკომენდაციის თანახმად, მიხეილ ჩინჩალაძე კეთილსინდისიერების შემოწმებას უნდა დაექვემდებაროს, რასაც სასამართლო კლანი და ხელისუფლება აქტიურად ეწინააღმდეგება. არადა, ეს შემოწმება აუცილებელი წინაპირობაა, რათა საქართველომ შეძლოს ევროკავშირში გაწევრიანებაზე მოლაპარაკებების დაწყება”, — აღნიშნულია განცხადებაში.
ევროკომისიის გაფართოების ანგარიშში მოყვანილი რეკომენდაციის თანახმად, საქართველომ საერთო სასამართლოების შესახებ კანონში ცვლილებები უნდა შეიტანოს, რათა იგი ვენეციის კომისიის რეკომენდაციებთან თანხმობაში მოვიდეს.
კერძოდ, საჭიროა, რომ ერთი წლის ვადაში მთავრობამ საერთაშორისო ექსპერტების ჩართულობით დანერგოს კეთილსინდისერების შეფასების ექსტრაორდინალური მექანიზმი ყველა იმ კანდიდატისთვის, რომლებიც სასამართლო სისტემის, კერძოდ, იუსტიციის უმაღლესი საბჭოს, უზენაესი სასამართლოს და სხვა სასამართლოების საკვანძო თანამდებობის დასაკავებელ კონკურსებში მონაწილეობენ. გარდა ამისა, უნდა ჩამოაყალიბოს ქონებრივი დეკლარაციების მუდმივი და პერიოდული სისტემა, საერთაშორისო ექსპერტების ჩართულობით საზედამხედველო და საკონსულტაციო ფუნქციაში.
ამ რეკომენდაციის მიუხედავად, მმართველი პარტია უარს აცხადებს, რომ დანერგოს მექანიზმი, რომელიც სასამართლო სისტემაში მომუშავე მოსამართლეების კეთილსინდისიერების ხელახალ შეფასებას ითვალისწინებს.