რუსული კანონის 2023 წლის საპროტესტო აქციებისას შემდეგ დაკავებული ლაზარე გრიგორიადისი სასამართლომ ორივე წარდგენილ მუხლში დამნაშავედ ცნო და 9 წლით თავისუფლების აღკვეთა მიუსაჯა.
ერთწლიანი სასამართლო განხილვის შემდეგ, სასამართლო პროცესის დასკვნითი სხდომა, რომელიც არაერთხელ გადაიდო, დღეს გაიმართა. მოსამართლე ზვიად შარაძემ ეს გადაწყვეტილება რამდენიმე წუთის წინ გამოაცხადა.
შარაძემ გრიგორიადისი დამნაშავედ სისხლის სამართლის კოდექსის შემდეგი 2 მუხლით ცნო:
- 353-ე პრიმა მუხლის მეორე ნაწილით (პოლიციელის ჯანმრთელობის ხელყოფა მის სამსახურებრივ საქმიანობასთან დაკავშირებით);
- 187-ე მუხლის მეორე ნაწილის “ა” ქვეპუნქტით (სხვისი ნივთის განადგურება, ცეცხლის წაკიდებით).
როგორ შარაძემ განაცხადა, გრიგორიადისი 29 მარტს დააკავეს, შესაბამისად, სასჯელის ათვლა მისი დაკავების დღიდან იწყება.
ოჯახი და ადვოკატები აპირებენ, პრეზიდენტ სალომე ზურაბიშვილს შეწყალებისთვის მიმართონ. განაჩენის გამოცხადების შემდეგ ლაზარეს დედამ, თამთა კალანდაძემ განაცხადა, ის პრეზიდენტის ადმინისტრაციისკენ უკვე მიემართება, რათა გრიგორიადისის შეწყალების თხოვნით მიმართოს.
“მოლოდინი გვქონდა, რომ ეს განაჩენი დადგებოდა […] ახლავე მივდივართ პრეზიდენტთან”, — განაცხადა თამთა კალანდაძემ.
ლაზარე გროგიადისის ბაბუა გია კალანდაძე იმედოვნებს, რომ სალომე ზურაბიშვილი ლაზარეს შეიწყალებს.
“განაჩენი იყო სრულიად უსაფუძვლო და არასწორი, რომელზეც ძალიან განერვიულებული ვარ. რაც შეეხება იმას, რა გზას მივმართავთ — ახლა აქ ვართ, პრეზიდენტის სასახლეში და ქ-ნ პრეზედენტს მივმართავთ თხოვნით, რომ ლაზარე შეიწყალოს. მე იმედს ვიტოვებ, რომ სწორ გადაწყვეტილებას მიიღებს ქ-ნი პრეზიდენტი და შეიწყალებს ლაზარეს”, — აღნიშნა გია კალანდაძემ.
ლაზარე გრიგორიადისი 2023 წლის 29 მარტს დააკავეს. პროკურატურის მტკიცებით, გრიგორიადისმა 7-9 მარტის აქციებზე პოლიციელების წინააღმდეგ ქვები და ე.წ. მოლოტოვის კოქტეილები გამოიყენა. 31 მარტს სასამართლომ გრიგორიადისს აღკვეთის ღონისძიების სახით პატიმრობა შეუფარდა. გამამტყუნებელი განაჩენის შემთხვევაში ლაზარეს 7-დან 9 წლამდე პატიმრობა ემუქრება.
საქმის მიმდინარეობის პროცესში ლაზარეს ახალი ბრალიც წარუდგინეს, რომელიც 2021 წელს მამის დაჭრას ეხება. აქტივისტს ბექა გრიგორიადისის განზრახ მსუბუქ დაზიანებასა და კუთვნილი ავტომანქანის დაზიანებას ედავებოდნენ. 25 სექტემბერს ლაზარე ამ საქმეზე სასამართლომ დამნაშავედ ცნო და 1 წლითა და 6 თვით თავისუფლების აღკვეთა მიუსაჯა. ბექა გრიგორიადისი ამბობდა, რომ ამ საქმის ახლა წამოწევა პოლიტიკური ნიშნით მოხდა.
სასამართლო პროცესების პარალელურად, ქართული ოცნება მუდმივად ცდილობდა ლაზარესთვის რეპუტაციული ზიანი მიეყენებინა და მის წინააღმდეგ დისკრედიტაციის კამპანიას აწარმოებდა. კერძოდ, “ქართული ოცნების” წევრებმა გრიგორიადისი მყისიერად დაუკავშირეს ოპოზიციას. გარდა ამისა, ჰომოფობიური ქვეტექსტით “ორიენტაციაარეულად” მოიხსენიებდნენ.