ევროკავშირი განცხადებით გამოეხმაურა ქართული ოცნების ხელახალ მცდელობას, მიიღოს რუსული კანონი “უცხოური გავლენის გამჭვირვალობის შესახებ”.
ევროკავშირის საგარეო ურთიერთობისა და უსაფრთხოების პოლიტიკის მთავარი სპიკერი, პიტერ სტანო წერილში აღნიშნავს, რომ კანონის ინიცირება განგაშის საფუძველს ქმნის.
“საქართველოს მმართველი პარტიის მიერ “უცხოური გავლენის გამჭვირვალობის შესახებ” კანონის ინიცირება განგაშის საფუძველს ქმნის. ევროკავშირი იხსენებს საქართველოს ხელისუფლების მიერ შარშან დადებულ პირობას, რომ კანონს “უპირობოდ გაიწვევდა”. ევროკავშირი დამწუხრებულია, რომ მას ისევ განიხილავენ, გასული წლის მარტში მძლავრი საზოგადოებრივი და საერთაშორისო რეაქციების მიუხედავად. დემოკრატიის ღერძი სამოქალაქო ორგანიზაციებისთვის ხელშემწყობი გარემოს შექმნა და შენარჩუნება და მედიის თავისუფლების გარანტიებია. ეს ასევე გადამწყვეტია ევროკავშირში გაწევრიანებისთვის”, — ნათქვამია განცხადებაში.
სპიკერი მიმოიხილავს გაწევრიანებისთვის შესასრულებელ რეკომენდაციებსაც.
“ევროკავშირი იხსენებს, რომ ევროსაბჭომ საქართველოს კანდიდატის სტატუსი იმის გათვალისწინებით მისცა, რომ კომისიის მიერ 2023 წლის 8 ნოემბერს გამოქვეყნებულ რეკომენდაციებს შეასრულებდა. მე-9 ნაბიჯი გულისხმობს რეკომენდაციას, რომ საქართველო უზრუნველყოფს სამოქალაქო საზოგადოების თავისუფლად მუშაობას, 1-ლი ნაბიჯი კი გულისხმობს ევროკავშირისა და მისი ღირებულებების საწინააღმდეგო დეზინფორმაციასთან ბრძოლას”, — აღნიშნულია წერილში და ნათქვამია ისიც, რომ “გამჭვირვალობა არ უნდა იქნეს გამოყენებული სამოქალაქო საზოგადოების თავისუფლად მუშაობის შეზღუდვის ინსტრუმენტად”.
ევროკავშირი ქართველ პოლიტიკურ ლიდერებს იმგვარი რეფორმების მიღებისა და აღსრულებისკენ მოუწოდებს, რომლებიც შეესაბამება ევროკავშირში გაწევრიანების გაცხადებულ მიზანს, რასაც საქართველოს დიდი უმრავლესობა უჭერს მხარს.
“ევროკავშირი მოუწოდებს საქართველოს, რომ დემოკრატიის, კანონის უზენაესობისა და ადამიანის უფლებების ვალდებულება დაიცვას”.
შეგახსენებთ, ქართულმა ოცნებამ გუშინ ისევ დააინიცირა რუსული კანონი, რომელიც უცხოური ინტერესების გამტარად მოიაზრებს ორგანიზაციებსა და მედია საშუალებებს, რომლებიც დაფინანსების 20%-ზე მეტს სხვა ქვეყნებიდან იღებენ. მიუხედავად იმისა, რომ წინა წელს მრავალათასიანი პროტესტის შემდეგ მისი გაწვევა მოუწიათ და პირობა დადეს, რომ მას აღარ მიიღებდნენ.
⇒ წაიკითხეთ: რა წერია ხელახლა ინიცირებულ რუსულ კანონში — დეტალურად
გარდა ამისა, ქართულმა ოცნებამ გუშინ დაარეგისტრირა საკონსტიტუციო ცვლილებებისა და კონსტიტუციური კანონის პაკეტი, რომელიც წინააღმდეგობაშია ადამიანის უფლებების დაცვის ვალდებულებასთან და ლგბტქი+ ადამიანების საწინააღმდეგო დათქმებს მოიცავს, მათ შორის, მასალების გავრცელებაზე დაწესებულ ცენზურას, იდენტობაზე თავდასხმასა და საჯარო სირცეში შეკრებისა და გამოხატვის თავისუფლების შემზღუდავ პირობებს.
⇒ წაიკითხეთ: სიძულვილი, ცენზურა, გამოხატვის თავისუფლების შეზღუდვა — ოცნების ინიციატივა პარლამენტშია