ზურა მახარაძეს პროკურატურამ ჯგუფური ძალადობისთვის ბრალი წარუდგინა. ინფორმაცია ძალადობის ორგანიზატორმა, პრორუსული ალტ-ინფოს ეთერში დაადასტურა და თქვა, რომ მას და გიორგი გოგიას ბრალი წარუდგინეს.
პროკურატურის განცხადებით, ჯგუფური ძალადობის ფაქტი ურთიერთშელაპარაკების ნიადაგზე მოხდა.
“საქართველოს შინაგან საქმეთა სამინისტროს მიერ ჩატარებული გამოძიებით დადგენილია, რომ 23 მარტს, ზუგდიდში, რუსთაველის ქუჩის მიმდებარე ტერიტორიაზე, ურთიერთშელაპარაკების ნიადაგზე ერთ-ერთმა ბრალდებულმა ორი პირის, ხოლო მეორე ბრალდებულმა ერთ პირის მიმართ ფიზიკური ძალადობა განახორციელა. მათ ბრალდება საქართველოს სისხლის სამართლის კოდექსის 126-ე მუხლის პირველი პრიმა ნაწილის „ბ“ ქვეპუნქტით (ძალადობა, ჩადენილი ჯგუფურად) ხოლო ერთ ბრალდებულს ასევე „გ“ ქვეპუნქტით (ძალადობა, ჩადენილი ორი პირის მიმართ) წარეგინა. პროკურატურა ბრალდებულებისთვის აღკვეთის ღონისძიების შეფარდების შუამდგომლობით სასამართლოს კანონით დადგენილ ვადაში მიმართავს”, — წერს უწყება.
ზურა მახარაძეს ძალადობრივი ქმედებები აქამდეც ჩაუდენია და ორგანიზებაშიც ყოფილა ჩართული, მაგალითად, 2021 წლის 5-6 ივლისის იერიშისას მედიის თანამშრომლებსა და სამოქალაქო ორგანიზაციის ოფისებსა თუ აქტივისტებზე, თუ 2023 წლის ივლისში თბილისი პრაიდის საფესტივალო სივრცის დარბევისას. თუმცა, მიუხედავად, საჯაროდ გავრცელებული ინფორმაციისა ძალადობრივი თავდასხმების ორგანიზების შესახებ, არც ზურა მახარაძეს და არც რუსული ალტ-ინფოს სხვა ლიდერებს უგიათ პასუხი.