პროკურატურის ინფორმაციით, ბათუმის საქალაქო სასამართლომ შეზღუდული შესაძლებლობის მქონე პირის გაუპატიურების ბრალდებით დაკავებულს აღკვეთის ღონისძიების სახით გირაო შეუფარდა. უწყება ამბობს, რომ ბრალდებულისთვის პატიმრობას ითხოვდნენ, თუმცა სასამართლომ 50 000-ლარიანი გირაო გადაწყვიტა, რასაც არ ეთანხმებიან და სააპელაციოში გაასაჩივრებენ.
სამართალდამცავებმა ბრალდებული 7 თებერვალს დააკავეს. მას ბრალდება საქართველოს სისხლის სამართლის კოდექსის 137-ე მუხლის მესამე ნაწილის “დ” და 138-ე მუხლის მეორე ნაწილის “დ” ქვეპუნქტებით წარედგინა, რაც წინასწარი შეცნობით შეზღუდული შესაძლებლობის მქონე პირის გაუპატიურებას და სექსუალური ხასიათის სხვაგვარ ქმედებას გულისხმობს. დანაშაული ისჯება თავისუფლების აღკვეთით ვადით ათიდან ცამეტ წლამდე.