გაბრიელ ატალი პირველი ღიად ჰომოსექსუალი პოლიტიკოსია, რომელიც საფრანგეთის პრემიერმინისტრი გახდა. ამასთან, თანამდებობაზე დანიშვნით, 34 წლის ატალი ქვეყნის ისტორიაში ყველაზე ახალგაზრდა პრემიერმინისტრის პოზიციას იკავებს.
ატალი საფრანგეთის პრეზიდენტმა, ემანუელ მაკრონმა ახალ თანამდებობაზე 9 იანვარს მას შემდეგ დანიშნა, რაც ელიზაბეტ ბორნმა, ყოფილმა პრემიერმინისტრმა გადადგომის შესახებ განაცხადა.
პრემიერმინისტრის პოზიციის დაკავებამდე ატალი განათლების მინისტრი იყო, ხოლო მანამდე სამთავრობო თანამდებობები ეკავა. კერძოდ, ჯანდაცვის მინისტრის მრჩევლის, საჯარო ანგარიშების მინისტრისა და სხვა.
პოლიტიკოსი, საფრანგეთის პრეზიდენტის მსგავსად, მემარცხენე-ცენტრისტულ სოციალისტურ პარტიას მიაკუთვნებდა თავს. ატალი სოციალისტურ პარტიას 17 წლის ასაკში შეუერთდა, ხოლო 2016 წელს პარტია დატოვა და მაკრონის ცენტრისტული პოლიტიკურ მოძრაობის წევრი გახდა. ატალს ცვალებადი პოლიტიკური იდენტობითაც იცნობენ, რადგან ბოლო წლებში მისი პოზიცია მარჯვენა ფრთისკენაც იყო გადახრილი. ის საფრანგეთის პარლამენტარი 2017 წელს გახდა.
ჯანდაცვის სამინისტროში 23 წლის ასაკში დასაქმდა, ხოლო 29 წლის ასაკში განათლების სამინისტროში სახელმწიფო მდივნად დანიშნეს, რამაც იგი მეხუთე რესპუბლიკის მთავრობის ყველაზე ახალგაზრდა წევრი გახადა.
ატალმა საშუალო განათლება პარიზის კერძო სკოლაში მიიღო (École Alsacienne), რომელშიც მხოლოდ პრივილეგირებული მშობლების, უმეტესად პოლიტიკოსებისა და არტისტების შვილები სწავლობენ და რომელშიც ინგლისური ენის გაკვეთილების დაწყებითი კლასებიდანვე სავალდებულოა. ბაკალავრიატის დასრულების შემდეგ, მან სწავლა კვლავ პრესტიჟულ უნივერსიტეტში განაგრძო (Sciences Po University), რომელშიც მაგისტრის ხარისხი მიიღო საჯარო მმართველობაში.
როგორც მედიები წერენ, ატალის მსგავსად ბავშვობიდან პრივილეგირებული ადამიანისთვისაც კი, მისი კარიერული წინსვლა საოცრად სწრაფი და უპრეცედენტო იყო.
როგორც რამდენიმე ხნის წინ ატალმა ერთ-ერთ სატელევიზიო შოუში მოჰყვა, მას ხშირად აბულინგებდნენ სკოლაში. სწორედ ეს გახდა მიზეზი იმისა, რომ ატალისთვის, განათლების მინისტრის მოვალეობის შესრულებისას, ერთ-ერთი პრიორიტეტი სკოლებში ბულინგის შესახებ ცნობიერების ამაღლება და ქვეყნის მასშტაბით ამ გამოწვევის დაძლევა იყო.
პოლიტიკური ექსპერტების შეფასებით, მაკრონის მიერ ატალის დანიშვნის გადაწყვეტილება სტრატეგიულად მნიშვნელოვანია და მთავრობის ძირეულად შეცვლას ემსახურება, ხოლო ახალ პრემიერს იმ გამოწვევების წინაშე მოუწევს დადგომა, რომლებთან გამკლავებასაც მისი წინამორბედი ბორნი ცდილობდა.
“რესპუბლიკის პრეზიდენტმა დანიშნა გაბრიელ ატალი პრემიერმინისტრად და მას მთავრობის ჩამოყალიბება დაავალა”, — აღნიშნულია მაკრონის განცხადებაში, რომელიც გუშინ, 9 იანვარს გამოქვეყნდა.
“ვიცი, რომ შემიძლია თქვენი ენერგიისა და თქვენი ვალდებულების იმედი მქონდეს, რათა სამოქალაქო გადაიარაღებისა და რეგენერაციის პროექტი განვახორციელოთ, რომელიც მე დავაანონსე”, — წერს მაკრონი ატალს X-ზე (ყოფილ Twitter).
ამის საპასუხოდ ატალმა მადლობა გადაუხადა მაკრონს ნდობისთვის და პირობა დადო, რომ “განათავისუფლებს მათ ფრანგულ პოტენციალს”.
მაკრონისგან ატალის დანიშვნის გადაწყვეტილება მნიშვნელოვნად ფასდება იმ კუთხითაც, რომ პრეზიდენტმა ახალი პრემიერი ევროპის პარლამენტის არჩევნების წინ დაამტკიცა. სწორედ ამ არჩევნებზე შეეცდება მაკრონი მეორე მანდატის მოპოვებას, ხოლო ატალი ევროპის პარლამენტის ზაფხულში დაგეგმილ არჩევნებში საფრანგეთის მთავრობას უხელმძღვანელებს.
როგორც Ipsos-Le Point-ის ბოლო გამოკითხვამ აჩვენა, გაბრიელ ატალი მიმდინარედ საფრანგეთის ყველაზე პოპულარული პოლიტიკოსია, თუმცა ეს იმას არ ნიშნავს, რომ მოსახლეობის უმეტესობა მას მხარს უჭერს — პოლიტიკოსის მოწონების რეიტინგი 40%-ს შეადგენს.
საფრანგეთის ახალი პრემიერმინისტრი სამოქალაქო პარტნიორობაში 38 წლის სტეფან სეჟურნესთან იმყოფება. სეჟურნე ამჟამად ევროპარლამენტარი და მმართველი პარტიის გენერალური მდივანია.
აღსანიშნავია, რომ პრემიერს სექსუალობაზე საჯაროდ თავისი სურვილით არ ულაპარაკია. ის ძველი სკოლის თანამშომელმა დააქამინგაუთა 2018 წელს, როცა ატალი მაკრონის პირველი მანდატის დროს მინისტრად დასახელდა.
წყაროები: