„თბილისი პრაიდი“ საქართველოში მოქმედი ქვიარ ორგანიზაციაა, რომელიც ლგბტქ+ ადამიანებისთვის თანასწორი და თავისუფალი გარემოს შექმნაზე მუშაობს თემის გამოწვევების პოლიტიკურ დღის წესრიგში დაყენების, თემის გაძლიერებისა და საზოგადოებრივი აზრის ცვლილების გზით. დასახული მისიისა და მიზნების მისაღწევად თბილისი პრაიდი მთავარ ინსტრუმენტად ხილვადობის პოლიტიკას იყენებს.
წარმოგიდგენთ თბილისი პრაიდის 2023 წლის ნოემბრის მიმოხილვას:
- ორგანიზაციის სტრატეგიული დაგეგმვის გასვლითი შეხვედრა ორგანიზაციის თანამშრომლებთან, ბორდის წევრებთან და აქტივისტებთან ერთად. 2-დღიანი სამუშაო შეხვედრის ფარგლებში თბილისი პრაიდის გუნდმა და მოკავშირეებმა შეაჯამეს გასული სამუშაო წელი, განიხილეს ქვიარ თემის პოლიტიკური და სოციალური გამოწვევები 2024 წლის ჭრილში, გამოკვეთეს მომდევნო ერთი წლის ყველაზე მნიშვნელოვანი და პრიორიტეტული საკითხები და ანალიზის საფუძველზე შეიმუშავეს ახალი სტრატეგია.
- The Drag Ball: Divas. „თბილისი პრაიდმა“ დრეგბოლის საორგანიზაციო ჯგუფთან ერთად დრეგ-მეჯლისის კიდევ ერთ ღამეს უმასპინძლა კლუბში „მტკვარზე“. ღონისძიება 25 ნოემბერს გაიმართა. თბილისი პრაიდის გუნდის წევრებმა აუდიტორიას სიტყვით მიმართეს და ისაუბრეს ქალთა და გოგონათა მიმართ ძალადობის წინააღმდეგ ბრძოლის მნიშვნელობაზე და დაასახელეს თბილისი პრაიდის რჩეული ქვინი „ვენომი“, რომელმაც გამორჩეულად ავთენტური, ემოციური, პოლიტიკური დრეგ პერფორმანსი წარუდგინა მაყურებელს. დრეგ ბოლის გამარჯვებული გახდა KY Cygni.
- პროექტ „ამაყი ოჯახების“ ფარგლებში ორგანიზაციამ დაიწყო ლგბტქ+ ადამიანების მშობლების და/ან ოჯახის სხვა წევრების ახალი ნაკადის მიღება. პროექტის ფარგლებში ოჯახები გაიცნობენ და გააძლიერებენ ერთმანეთს, ისარგებლებენ პროფესიონალი ფსიქოლოგების სერვისით და მიიღებენ მხარდაჭერას, რათა უფრო გააძლიერონ თავიანთი ოჯახის ქვიარ წევრები.
- თბილისი პრაიდმა ნოემბრის თვეში ოთხი სათემო შეხვედრა ჩაატარა, მათ შორის: კლდეზე ცოცვა, ფილმების ჩვენება და დისკუსია და დრეგის მეიქაფის ვორკშოპი დრეგ-ქვინ Gerilyn Stone-თან ერთად.
- თბილისი პრაიდის ვებგვერდზე გამოქვეყნდა სამი საინფორმაციო, ანალიტიკური სტატია, მათ შორის: ტრანსგენდერთა ხსოვნის დღესთან და შიდსთან ბრძოლის დღესთან დაკავშირებით. ასევე სტატია მომზადდა გენდერსა და სექსუალობაზე ქვიარ ადამიანების ოჯახებისთვის და სხვა დაინტერესებული პირებისთვის.