დღეს, 15 ნოემბერს თბილისში, თანასწორობის კვირეულის გახსნა გაიმართება, რომლის მიზანია მრავალფეროვნების აღნიშვნა და თანასწორობის ხელშეწყობა საქართველოში.
თანასწორობის კვირეული უკვე მეხუთედ იმართება. დღეს, გახსნითი ღონისძიების ფარგლებში წარმოდგენილი იქნება გამოფენა “წინააღმდეგობის ძაფები”.
“გამოფენა შვიდი ავტორის ნამუშევარს აერთიანებს, რომლებიც განსხვავებულობის მრავალმხრივ გამოცდილებებს ასახავს და გვესაუბრება მის თანმდევ გრძნობებსა და ემოციებზე. გამოფენას წინააღმდეგობის, ხშირად უხილავი, მაგალითები გამოაქვს დღის სინათლეზე და წარმოადგენს ანდრო დადიანის, სალომეა ბაუერის, დინა ოგანოვასა და Chai Khana-ს ნამუშევრებს”, — აღნიშნულია ღონისძიების აღწერაში.
გამოფენის პარალელურად, ბექა გაბადაძე, ქამრან აფენდიევი და ნესტან ანანიძე წარდგებიან გამოსვლებით TED Talks-ის სტილში, თემაზე “ჩემი თანასწორობის ისტორია”. გამოფენის კურატორი, თუთა ჩხეიძე, სახელოვნებო ჯგუფიდან “კოლექტიური მარცხი”, აუდიტორიას თითოეული ნამუშევრის მიღმა არსებულ გზავნილს გააცნობს.
ღონისძიების გახსნას დაესწრებიან და იქ მყოფთ სიტვყით მიმართავენ ნატალია ვუტოვა, საქართველოში ევროპის საბჭოს ოფისის ხელმძღვანელი; ასევე, ბერგლიოტ ჰოვლანდი, ნორვეგიის სამეფოს ელჩი საქართველოში და მელინე არაკელიანი, ნიდერლანდების სამეფოს ელჩი საქართველოში.
თანასწორობის კვირეული ტოლერანტობის საერთაშორისო დღესთან, 16 ნოემბერთან დაკავშირებით იმართება და მიზნად ისახავს მრავალფეროვნებისა და თანასწორობის მნიშვნელობის შესახებ ცნობიერების ამაღლებას, ინკლუზიურობის ხელშეწყობასა და ამავდროულად, დისკრიმინაციის მსხვერპლთათვის ხელმისაწვდომი დაცვის მექანიზმების შესახებ საზოგადოების ინფორმირებას.
მიმდინარე წლის თანასწორობის კვირეულის ძირითადი გზავნილია “მე ვირჩევ თანასწორობას”. კამპანია ევროპის საბჭოს პროექტის “თანასწორობის დაცვისა და დისკრიმინაციის დაუშვებლობის ეფექტური მექანიზმების ხელშეწყობა საქართველოში“ მხარდაჭერით მიმდინარეობს. პროექტი საქართველოსთვის ევროპის საბჭოს 2020-2023 წლების სამოქმედო გეგმის ფარგლებშია დაფინანსებული.