Technovation Girls 2024-ზე რეგისტრაცია უკვე დაწყებულია. პროექტი ტექნოლოგიებით დაინტერესებულ 13-დან 18 წლამდე გოგოებსა და მოხალისე მენტორებს საქართველოს ნებისმიერი წერტილიდან ეძებს. ამის შესახებ ინფორმაციას ალტე უნივერსიტეტი ავრცელებს, რომელიც საქართველოში მიმდინარე წელსაც, არასამთავრობო ორგანიზაცია Techdro-სთან ერთადაა პროექტის ოფიციალური წარმომადგენელი.
Technovation Girls საერთაშორისო პროექტია, რომელიც პროგრამირებასა და მეწარმეობაში გოგოების მეტ ჩართულობას და ამ მიმართულებით მათი ცნობიერების ამაღლებას ისახავს მიზნად. პროექტის ფარგლებში გოგოებმა გარშემო არსებული კონკრეტული პრობლემების გადაჭრის ტექნოლოგიური გზები უნდა იპოვონ. პროექტის მხარდამჭერია TBC ბანკი.
პროექტის ფარგლებში, გუნდები, საბოლოო ნამუშევრის სახით, მობილურ აპლიკაციას და/ან ხელოვნური ინტელექტის პროტოტიპს შექმნიან, დაწერენ ბიზნეს გეგმასა და წარადგენენ მას რეგიონული ჟიურის წინაშე.
“საქართველოს 2024 წლის გამარჯვებულები დაჯილდოვდებიან სპეციალური პრიზებით. საქართველოს მასშტაბით გამარჯვებული გუნდები გააგრძელებენ მონაწილეობას გლობალურ შეჯიბრში. საუკეთესო 20 გუნდი მონაწილეობას მიიღებს ტექნოლოგიურ ბანაკში, რომელიც ზაფხულში ჩატარდება”, — აღნიშნულია ალტე უნივერსიტეტის განცხადებაში.
პროექტი ორი ასაკობრივი ჯგუფისთვისაა განსაზღვრული — 13-15 წელი და 16-18 წელი. თითოეულ გუნდში შესაძლებელია 1-5 მოსწავლე იყოს. უფრო მეტი დეტალი შეგიძლიათ იხილოთ სარეგისტრაციო ფორმაში.
მონაწილეების გარდა, პროექტში ჩართვა შეუძლიათ მოხალისე მენტორებსაც, რომლებიც მონაწილეებს პროექტების დამუშავებაში დაეხმარებიან. უფრო მეტი დეტალისთვის შეგიძლიათ იხილოთ სარეგისტრაციო ფორმა.
რეგისტრაცია 28 ნოემბრის ჩათვლით გაგრძელდება.