მალე, ვასო აბაშიძის სახელობის ახალ თეატრში რაინერ ვერნერ ფასბინდერის პიესა — პეტრა ფონ კანტის მწარე ცრემლები დაიდგმება.
ცნობილი გერმანელი რეჟისორისა და დრამატურგის, რაინერ ვერნერ ფასბინდერის პიესის სასცენო დადგმაზე რეჟისორი დავით მღებრიშვილი იმუშავებს. მანვე თარგმნა ფასბინდერის 1971 წელს დაწერილი პიესა, რომლის მიხედვით 1972 წელს კინო მოყვარულებისთვის კარგად ნაცნობი ფილმიც გადაიღო.
პიესის მთავარი თემები გრძნობებით მანიპულირება, სიყვარულისა და ვნებების მანიპულაციური ბუნება, მორჩილების, თავისუფლებისა და მარტოობის საკითხებია.
“სიუჟეტის მიხედვით, წარმატებული მოდის დიზაინერი პეტრა ფინ კანტი ცხოვრების რთულ პერიოდს გადის. მისი ორივე ქორწინება წარუმატებლად დასრულდა, მას სძულს ქალიშვილი, საკუთარი დედას არ ესმის მისი. პეტრას ერთადერთი ერთგული ადამიანი მისი თანაშემწე მარლენია, რომელიც მზად არის მოითმინოს მისგან ყველაფერი. პეტრას ახალგაზრდა გოგო კარინი შეუყვარდება. კარინს მხოლოდ მაღალი მოდის სამყაროში მოხვედრა სჭირდება — მზაკვრული მიზნების მისაღწევად, ის მზად არის თავისი მოსიყვარულე პეტრას მანიპულირებაც კი აიტანოს”, — ვკითხულობთ სპექტაკლის აღწერაში.
დავით მღებრიშვილის სპექტაკლში პეტრას როლს ბუბა გოგორიშვილი ასრულებს, მარლენის როლს — ნანა ბუთხუზი, კარინი კი ნანკა კალატოზიშვილი იქნება. ასევე, სპექტაკლში ვიხილავთ ნინო მითაიშვილს, ნინო გომართელსა და მერი შახოვს.
სპექტაკლის მუსიკალური გაფორმება დავით მღებრიშვილს ეკუთვნის, სცენოგრაფიასა და კოსტიუმებზე კი თამარა ოხიკიანმა იზრუნა.