“თანასწორობის მოძრაობამ” ქვიარ აკადემიის მომდევნო ნაკადისთვის განაცხადების მიღება დაიწყო. წლევანდელი ქვიარ აკადემიის მთავარი თემაა “იმპერიები და ქვიარ მოძრაობა”. ახალი კურსის მიზანია მსჯელობის თავისუფალი სივრცის შექმნა საქართველოსა და მის ირგვლივ მიმდინარე პოლიტიკური პროცესებისა და მოვლენების ანალიზისთვის.
“2023 წელი საკმაოდ მძიმე და პოლიტიკურად დატვირთული წელი აღმოჩნდა საზოგადოებისთვის. “რუსული კანონის” ინიცირებამ, სიტყვისა და გამოხატვის თავისუფლების შეზღუდვის მცდელობებმა და ზოგადად, ულტრა-კონსერვატიული პოლიტიკის გააქტიურებამ ახალი კითხვები, წუხილები და წინააღმდეგობები გააჩინა საზოგადოებაში. აღნიშნული წელი, ასევე გამოირჩეოდა, იმპერიული დისკურსების იდენტიფიცირებისა და ანალიზის მცდელობებით. თუმცა, ულტრა-კონსერვატიული პოლიტიკის გაძლიერების ფონზე შეიკუმშა იმგვარი კრიტიკული სივრცეები, რომლებიც არსებული პოლიტიკის მრავალმხრივი, სისტემური და სტრუქტურული ანალიზის შესაძლებლობას გვაძლევს”, — აღნიშნულია ორგანიზაციის მიერ გამოქვეყნებული ღონისძიების აღწერაში.
“თანასწორობის მოძრაობის” განცხადებით, აკადემიის მიმდინარეობის განმავლობაში ისინი შეეცდებიან, შემდეგ კითხვებს უპასუხონ:
- როგორი პოლიტიკური დისკურსები და ძალაუფლებრივი ვერტიკალები იყრის თავს საქართველოს რეალობაში?
- როგორ ზეგავლენას ახდენს აღნიშნული პოლიტიკა ქვიარ მოძრაობის დღის წესრიგზე?
- სად არის საქართველო პოსტკოლონიურ, დეკოლონიურ და პოსტსოციალიზმის დებატებს შორის?
- როგორ შეიძლება აღიქმებოდეს და ორიენტირდებოდეს ქვიარ მოძრაობა ამ დებატებს შორის?
ორგანიზაციის ცნობით, დასმულ კითხვებზე პასუხის გაცემას ქვიარ აკადემია ახალ კურსზე ლექციების, პანელური დისკუსიების, ვორქშოპებისა და ფილმის ჩვენებების მეშვეობით შეეცდება. პროექტის ფარგლებში შეხვედრები ფიზიკურ სივრცეში ჩატარდება.
პროექტის დაწყების თარიღი 25 ოქტომბერია, ხოლო მასში მონაწილეობის მსურველებმა ეს ფორმა უნდა შეავსონ არაუგვიანეს 16 ოქტომბრისა.
კურსის “იმპერიები და ქვიარ მოძრაობა” სილაბუსის სრულად ნახვას ამ ბმულზე შეძლებთ.