ზუგდიდელი აქტივისტი მარიამ სიჭინავა, რომელსაც სასამართლო ირაკლი ზარქუას შეურაცხყოფას ედავებოდა, 4000 ლარით დააჯარიმეს.
საქმე უკავშირდება 21 მაისს ოცნების დეპუტატ ზარქუასა და მისი თანმხლები პირების ზუგდიდში, ერთ-ერთ სასტუმროში სტუმრობას, სადაც მას აქტივისტები დახვდნენ და პროტესტი გამოხატეს.
გამოძიება ადმინისტრაციულ სამართალდარღვევათა კოდექსის 173-ე 16 პრიმა მუხლის პირველი ნაწილით დაიწყო, რაც საჯარო თანამდებობის პირის შეურაცხყოფას გულისხმობს და 4 ათას ლარამდე ჯარიმას ან 45 დღემდე პატიმრობას ითვალისწინებს.
გუშინ მარიამ სიჭინავამ გაავრცელა ინფორმაცია, რომ მის ფინანსურ ანგარიშებს ყადაღა დაედო. სიჭინავა ამბობდა, რომ მას რამდენიმე ათასის ოდენობის გადაუხდელი ჯარიმა დაუგროვდა და ანგარიშები ამის საფუძველზე დაუყადაღეს, თუმცა მისი შვილი მარჩენალდაკარგულის სოციალური სტატუსით სარგებლობდა, შესაბამისად, სახელმწიფოს უფლება არ ჰქონდა ანგარიშები დაეყადაღებინა.
მოგვიანებით, აქტივისტმა დაწერა, რომ ყადაღა მოუხსნეს.
“როცა ამაზე ხმაური ატყდა, სავარაუდოდ, მივიდა გადაწყვეტილების მიმღებ პირამდე ხმა, რომ არ შეიძლებოდა ანგარიშების დაყადაღება, კანონი წაიკითხეს და მოხსნეს ყადაღა”, — თქვა სიჭინავამ.
დღეს გაიმართა კერენ ესებუას პროცესიც, რომელსაც იმავეს ედავებიან. ესებუა 3500 ლარით დააჯარიმეს. აქტივისტების თქმით, მოსამართლემ არ დააკმაყოფილა შუამდგომლობა ორივე საქმის გაერთიანებაზე და რადგან ერთი ადვოკატი ჰყავდათ, ამიტომ მარიამ სიჭინავას პროცესი ერთი საათით გადადეს. მარიამის საქმეზე გადაწყვეტილება კი ცოტა ხნის წინ გამოცხადდა.