სექსუალური ფანტაზიები ჩვენი შინაგანი სამყაროს ერთ-ერთი ყველაზე პირადი ნაწილია — ხშირად ძალიან ცხადი, ზოგჯერ უცნაური, ზოგჯერ კი ჩვენთვისვე მოულოდნელიც. მიუხედავად იმისა, თუ რამდენად გავრცელებულია ისინი, ბევრი ადამიანი ისე იზრდება, რომ ფიქრობს, თითქოს სექსუალური ფანტაზიების ქონა სასირცხვილო, საშიში ან ამორალურიც კია. იმ კულტურებში, სადაც სექსუალობა მკაცრად კონტროლდება ან ტაბუდადებულია, ასეთი ფანტაზიების ქონა შეიძლება პირად მარცხადაც კი აღიქმებოდეს.

Contents

თუმცა, სიმართლე ისაა, რომ თითქმის ყველა ადამიანს აქვს სექსუალური ფანტაზიები. განურჩევლად იმისა, ეს, უბრალოდ, წამიერი სურათია თუ უფრო დეტალურად წარმოსახული სცენარი, რომელიც გონებაში ტრიალებს — სექსუალური ფანტაზიები ადამიანის სექსუალობის ბუნებრივი ნაწილია. ისინი არა მხოლოდ ვნებასა და სურვილს, არამედ ასევე შეიძლება ძალაუფლებას, ცნობისმოყვარეობას, უსაფრთხოებას, დაუცველობას ან ემოციურ განკურნებასაც კი უკავშირდებოდეს. და ისინი ყოველთვის არ ასახავს იმას, თუ რა გვინდა რეალურ ცხოვრებაში. ზოგჯერ ფანტაზიები, უბრალოდ, ამბებია — ველური, ეროტიკული, სიმბოლური ამბები.

ამ სტატიაში განვიხილავთ, სინამდვილეში რას ნიშნავს სექსუალური ფანტაზიები, რატომ გვაქვს ისინი და როგორ შევძლოთ მათთან თანაცხოვრება, რადგან საკუთარი ეროტიკული წარმოსახვის შესწავლაში არაფერია სამარცხვინო — განურჩევლად იმისა, მათ მხოლოდ საკუთარ თავთან საიდუმლოდ ვტოვებთ თუ ვუზიარებთ პარტნიორს.

რა არის სექსუალური ფანტაზიები?

სექსუალური ფანტაზიები არის მენტალური სურათები, ფიქრები ან სცენარები, რომლებიც სექსუალურ თუ ეროტიკულ აღგზნებას ან მღელვარებას იწვევენ. ისინი შეიძლება იყოს მოკლე და სპონტანური, როგორც წამიერი ფიქრი, ან დეტალურად წარმოდგენილი ამბები, რომლებიც გონებაში ისევ და ისევ ბრუნდება. ზოგი ფანტაზია ვიზუალურია, ზოგი — ემოციური ან სიტუაციური. მასში შეიძლება მონაწილეობდნენ რეალური ადამიანები, წარმოსახვითი პერსონაჟები ან საერთოდაც არავინ.

ფანტაზიას ფანტაზიად ის აქცევს, რომ ის წარმოსახვაში ვითარდება და არა — რეალობაში. შესაძლოა, წარმოიდგინოთ რომანტიკული შეხვედრა საყვარელ ადამიანთან, ან სრულიად არარეალური და ტაბუდადებული სცენარი. ფანტაზიები ხშირად უფრო კონკრეტულ შეგრძნებებთან არის დაკავშირებული, ვიდრე სიუჟეტთან ან პერსონაჟებთან — მაგალითად, ასეთი შეიძლება იყოს განცდა იმისა, რომ ხარ სასურველი, ძლიერი, მორჩილი, თავისუფალი ან ემოციურად დაცული.

ფანტაზიები შეიძლება იყოს:

სოლო — წარმოსახვითი სცენარები, რომლებიც მარტოობაში გვიჩნდება, ხშირად მასტურბაციის ან ფიქრებში წასვლის დროს;
გაზიარებული — ის ფანტაზიები, რომლებიც პარტნიორთან განიხილება ან თამაშდება (ცხადია, თანხმობის საფუძველზე);
სიმბოლური — რომლებიც გადატანითი მნიშვნელობით უნდა გავიგოთ და გამოხატავს რაღაც უფრო ღრმა თემას (მაგალითად: კონტროლს, ნდობას, რისკს დაცულ გარემოში).

ყველა ჩვენგანს განსხვავებული ფანტაზიები და ხშირად მათი მრავალფეროვანი სპექტრი აქვს — ზოგი ნაზი, ზოგი ინტენსიური, ზოგი უფრო სახალისო და ზოგიც შეიძლება ბნელი. არ არსებობს ფანტაზირების „სწორი“ გზა და არც სავალდებულოა, რომ იმას, რაც აღგაგზნებთ, რაიმე კონკრეტული მნიშვნელობა მიანიჭოთ.

სექსუალური ფანტაზიების ქონა ნორმალურია?

დიახ. სექსუალური ფანტაზიების ქონა არა მხოლოდ ნორმალური, ის თითქმის უნივერსალურია.

კვლევები მუდმივად აჩვენებს, რომ ადამიანების უმრავლესობას, ყველა გენდერისა თუ სექსუალური იდენტობის, აქვს სექსუალური ფანტაზიები. ზოგი ყოველდღიურად ფანტაზირებს, ზოგი — მხოლოდ დროგამოშვებით, მაგრამ ეს ადამიანის სექსუალობის სრულიად ბუნებრივი ნაწილია. მეტიც, სექსუალური ფანტაზიების ნაკლებობა შეიძლება მიუთითებდეს სტრესზე, ტრავმაზე ან ჯანმრთელობის გარკვეულ პრობლემებზე — და არა პირიქით.

ერთ-ერთ დიდ კვლევაში ადამიანების 90%-ზე მეტმა განაცხადა, რომ აქვთ სექსუალური ფანტაზიები. ყველაზე გავრცელებული თემები იყო ინტიმურობა, თავგადასავალი, ძალაუფლების თამაში და სიახლე. მნიშვნელოვანია ისიც, რომ ბევრ ადამიანს აქვს ფანტაზია იმაზე, რისი რეალურად განხორციელებაც არასდროს ენდომებოდათ — და ეს სრულიად მისაღებია. ფანტაზია არ ნიშნავს განზრახვას.

ისმის კითხვა: მაშინ რატომ გრძნობს ამდენი ადამიანი უხერხულობას ან სირცხვილს ფანტაზიებთან დაკავშირებით? საქმე ისაა, რომ საზოგადოება, რომელშიც ვცხოვრობთ, სექსუალურ სურვილებს მკაცრად აკონტროლებს — განსაკუთრებით ქალებისთვის, ქვიარ ადამიანებისთვის და ყველასთვის, ვისი აღგზნების წყაროც არ ჯდება „ნორმის“ ჩარჩოებში. გვასწავლიან, რომ ზოგი ფანტაზია „ზედმეტია“ „ბინძურია“ ან, უბრალოდ, „არასწორია“ — მაშინაც კი, როცა ის მხოლოდ ჩვენს წარმოსახვაში ხდება — ეს კი იწვევს არასაჭირო სირცხვილს ან ფარულობას.

თუმცა, სიმართლე ისაა, რომ ფანტაზიები არ განსაზღვრავს თქვენს მორალს, ღირებულებებს ან იდენტობას. ისინი გამოხატულებებია და არა — მხილებები. ფანტაზიები ხშირად გვაჩვენებს იმას, თუ რა აღგვაფრთოვანებს, გვამშვიდებს ან გვაძლიერებს — და არა იმას, თუ რას ვიზამდით რეალურ ცხოვრებაში თანხმობის გარეშე. სწორედ ამიტომ, ფანტაზიები სრულიად ნორმალურია. მნიშვნელოვანია არა მათი ქონა, არამედ ის, თუ როგორ მიუდგებით მათ: ინტერესითა და თვითსიყვარულით, თუ შიშითა და სირცხვილით.

რატომ გვაქვს სექსუალური ფანტაზიები?

სექსუალური ფანტაზიები მრავალ ფსიქოლოგიურ, ემოციურ და ფიზიოლოგიურ მიზანს ემსახურება. ისინი მიუთითებს არა მხოლოდ სურვილზე, არამედ ასევე წარმოსახვაზე, განცდებზე, კონტროლზე და ზოგჯერ განკურნებაზეც.

ქვემოთ მოცემულია რამდენიმე საკვანძო მიზეზი იმისა, თუ რატომ გვაქვს სექსუალური ფანტაზიები:

სურვილების შესწავლა — ფანტაზიები საშუალებას გვაძლევს, უსაფრთხოდ გამოვიკვლიოთ ის, რაც აღგვაგზნებს — მაშინაც კი, როცა რეალურ ცხოვრებაში ამისთვის მზად არ ვართ ან არ გვინდა. ისინი ჩვენი პრეფერენციების, აღგზნების წყაროებისა და ცნობისმოყვარეობის უკეთ გაცნობაში გვეხმარება, ყოველგვარი გაკიცხვისა და ზიანის გარეშე;
ემოციური ან ფსიქოლოგიური თვითგამოხატვა — ფანტაზიები ხშირად გამოხატავს დაუკმაყოფილებელ ემოციურ საჭიროებებს, როგორებიცაა, მაგალითად, სასურველობის ან ძალაუფლების შეგრძნება, მზრუნველობის მიღება ან თავისუფლება. მაგალითად, როდესაც ვინმე თავს უგულებელყოფილად გრძნობს, მას შეიძლება ჰქონდეს ფანტაზია იმაზე, რომ ვიღაც მისი გულის მოგებას ცდილობს და თაყვანს სცემს;
კონტროლი უსაფრთხო სივრცეში — ფანტაზიები გვაძლევს შესაძლებლობას, ვაკონტროლოთ ისეთი სცენარები, რომლებიც რეალურ ცხოვრებაში საშიში, უხერხული ან ტაბუდადებული შეიძლება იყოს. შეგიძლიათ, წარმოიდგინოთ თავი დომინანტად ან მორჩილად, დაარღვიოთ წესი ან წახვიდეთ რისკზე — სრული თავისუფლებითა და რეალური შედეგების გარეშე;
რეალობისგან გაქცევა და სტრესისგან გათავისუფლება — მსგავსად სიზმრებისა, ფანტაზიები შეიძლება იყოს ემოციური განტვირთვის ან დროებითი გაქცევის გზა. ისინი გვაძლევს შესაძლებლობას, მენტალურად გადავიდეთ ისეთ სამყაროში, სადაც ვართ ძლიერი, მოდუნებული, აღგზნებული ან დაცული — განსაკუთრებით მაშინ, როცა ვართ სტრესში, მარტოობაში ან მოწყენილობაში;
განკურნება და ძალის დაბრუნება — ზოგჯერ ფანტაზიები ემსახურება ტკივილის გადამუშავებას, ძველი ტრავმის გადახედვას ან დაკარგული ძალის ხელახლა მოპოვებას. ეს პროცესი ღრმად პირადულია და ყოველთვის არ არის გაცნობიერებული — და ეს იმას არ ნიშნავს, რომ ფანტაზია „ცუდი“ ან „არასწორია“;
ბიოლოგიური აღგზნება და სტიმულაცია — ფიზიკურ დონეზე, სექსუალური ფანტაზიები ზრდის აღგზნებას და ხელს უწყობს სხეულის მზადყოფნას სექსისთვის. ისინი ტვინისა და სხეულის მხრიდან საკუთარ სურვილებზე კომუნიკაციის ნაწილია — მაშინაც კი, როცა ამაში პარტნიორი არ მონაწილეობს.

ფანტაზიები ყოველთვის მოწესრიგებული არ არის და მათ არ სჭირდებათ „ლოგიკა“, მაგრამ მათ აქვთ „ემოციური ლოგიკა“ ჩვენი თავის იმ ნაწილისთვის, რომელიც რაღაცის განცდას, გამოკვლევას ან რაღაცისგან გაქცევას ცდილობს.

სექსუალურ ფანტაზიებში არსებული ხშირი თემები

სექსუალური ფანტაზიები წარმოუდგენლად მრავალფეროვანია, თუმცა გარკვეული საერთო თემები მაინც იკვეთება. ეს საერთო თემები არ ნიშნავს, რომ ყველას აქვს ეს ფანტაზიები — ისინი, უბრალოდ, ილუსტრირებს იმას, თუ ხშირად როგორ უბრუნდება ჩვენი წარმოსახვა მსგავს ემოციურ ლანდშაფტებს: ძალაუფლებას, სიახლოვეს, სიახლეს, რისკსა და დანებებას.

ქვემოთ მოცემულია რამდენიმე თემა, რომლებიც ხშირად გვხვდება სექსუალურ ფანტაზიებში.

ძალაუფლება და კონტროლი

დაბმულ მდგომარეობაში ყოფნა, როცა ხარ უძრავი, მაგრამ სრულიად უსაფრთხოდ;
დომინანტურ როლში ყოფნა და სხვებისთვის მითითებების მიცემა;
ფანტაზია გატაცებაზე ან დაკავებაზე — სიუჟეტურად გაწერილ, შეთანხმებულ სცენარში.

ეს ფანტაზიები ხშირად ასახავს სურვილს, სრულიად გასცე საკუთარ თავზე კონტროლი ან, პირიქით, თავად შენ გქონდეს კონტროლი — ისინი არ წარმოადგენს რეალური ზიანის მიღებისა თუ მიყენების სურვილს. აქ მნიშვნელოვანია სწორედ კონტროლის განცდა ფანტაზიის შიგნით, და არა — მის გარეთ.

ტაბუ ან აკრძალული სცენარები

უცნობთან სექსი მატარებელში, ბარში, პარკში და სხვა;
ფარული ურთიერთობა ვინმესთან, ვინც ასაკით უფროსია ან სტატუსით „ხელმიუწვდომელია“;
სექსი სამსახურში, რაიმე სახის შეკრებაზე ან ისეთ სივრცეში, სადაც ეს მიღებული არ არის.

ასეთ ფანტაზიებში ხშირად მთავარი ემოციური მღელვარებაა — რაღაც „მიუღებლის“ კეთება აღგზნებას აძლიერებს, მიუხედავად იმისა, რომ რეალურ ცხოვრებაში შეიძლება ამ ხაზის გადაკვეთა არასდროს გვინდოდეს.

ბევრი პარტნიორი ან ჯგუფური სცენარები

ყურადღების ცენტრში ყოფნა ხალხით სავსე ოთახში, სადაც ყველას შენ უნდიხარ;
როცა უყურებთ, როგორ აქვს თქვენს პარტნიორს სექსი სხვასთან, ან როცა თქვენ გიყურებენ იმავეს დროს;
„სექს-წვეულება“, სადაც ყველა ხელმისაწვდომი და ენთუზიაზმით აღსავსეა და ყველა საზღვარი შეთანხმებული და დაცულია.

ეს ფანტაზიები შეიძლება გამოხატავდეს სიუხვის, მიმღებლობის ან სექსუალური თავისუფლების სურვილს. სხვებისთვის ეს შეიძლება იყოს წნეხის მოხსნის გზა — როცა სასურველი ხარ, შენ კი არ გიწევს არჩევანის გაკეთება.

რომანტიკული ან იდეალიზებული კავშირი

ნელი, მგრძნობიარე ინტიმური კავშირი ტყით გარშემორტყმულ ქოხში, ჭექა-ქუხილის ფონზე;
მოულოდნელი მასაჟი, რომელიც თბილ და ვნებიან ღამეში გადაიზრდება;
ხანგრძლივი განშორების შემდეგ პარტნიორთან რომანტიკული შეხვედრა სრულყოფილ, გამოგონილ სცენარში.

ასეთ ფანტაზიებში მთავარი არის ემოციური უსაფრთხოება და განცდა, რომ ვიღაც ნამდვილად გვხედავს — და ისინი შეიძლება ისეთივე ეროტიკული იყოს, როგორც სხვა, უფრო გამბედავი სცენარები.

ტრანსფორმაცია ან როლების გაცვლა

მორიდებული ადამიანი, რომელიც ხდება თავდაჯერებული და დომინანტი;
გენდერის ან სხეულის შეცვლა და ინტიმურობის გამოკვლევა ამ ახალი იდენტობით;
გამოგონილ პერსონაჟად გადაქცევა (მაგალითად: ვამპირი, უცხოპლანეტელი, დიდგვაროვანი), განსხვავებული წესებით, უნარ-ჩვევებითა თუ შესაძლებლობებით.

ასეთი ფანტაზიები ხშირად დაკავშირებულია იდენტობასთან, გათავისუფლებასთან და იმ ტიპის დინამიკებთან, რომლებიც რეალურ ცხოვრებაში მიუწვდომლად გვეჩვენება.

► მნიშვნელოვანია, გვახსოვდეს: ფანტაზია არ არის გეგმა. შეიძლება, რაღაც აღგვაგზნებდეს წარმოსახვაში, მაგრამ რეალურ ცხოვრებაში ის არასდროს გვინდოდეს. ბევრ ადამიანს აღაგზნებს სცენარები, რომლებსაც წარმოსახვის მიღმა არასდროს გამოცდიდა — და ეს სრულიად ნორმალურია.

ფანტაზია და რეალობა

სექსუალურ ფანტაზიებთან დაკავშირებით ერთ-ერთი ყველაზე გავრცელებული მცდარი წარმოდგენა ისაა, რომ ისინი აუცილებლად ასახავს იმას, რაც ადამიანს რეალურ ცხოვრებაში სურს. სინამდვილეში, ფანტაზიასა და რეალობას შორის ზღვარი ერთდროულად ცხადიც არის და მნიშვნელოვანიც — და უმეტესობისთვის, ეს ორი რამ ძალიან განსხვავდება ერთმანეთისგან.

შესაძლოა, ადამიანს ფანტაზიები ჰქონდეს იმაზე:

რისი განხორციელებაც რეალურად არასდროს უნდა;
რაც რეალურ ცხოვრებაში სახიფათო ან არაეთიკური იქნებოდა;
რაც მხოლოდ იმიტომ აღაგზნებს, რომ ის წარმოსახვითია;
რაც ფანტაზიაში იძლევა ემოციურ კმაყოფილებას, მაგრამ ცხოვრებაში — არა.

და ეს ყველაფერი სრულიად მისაღებია. მაგალითად, ვიღაცას შეიძლება:

აღაგზნებდეს ფანტაზია, რომელშიც მასზე დომინირებენ, მაგრამ რეალურ ცხოვრებაში ერჩივნოს ნაზი, თანასწორი სექსი;
ჰქონდეს ჯგუფური სექსის ფანტაზია, მაგრამ მისთვის რეალობაში ეს მეტისმეტი იყოს ან საერთოდაც არ აინტერესებდეს არამონოგამიური ურთიერთობები;
მოსწონდეს ტაბუდადებული თემები (მაგალითად, აკრძალული კავშირები), მაგრამ რეალურ ცხოვრებაში მკაცრად ეწინააღმდეგებოდეს მათ და არასდროს ჰქონდეს მათი განხორციელების განზრახვა.

ეს ფანტაზიები სულაც არ ხდის ადამიანს სახიფათოს, „არანორმალურს“, თუ გარყვნილს. ეს მხოლოდ იმას ნიშნავს, რომ მას კრეატიული გონება და მდიდარი შინაგანი ეროტიკული სამყარო აქვს.

ფანტაზიები შეიძლება იყოს სიმბოლური, გაზვიადებული ან სრულიად გამოგონილი. ზუსტად ისევე, როგორც შეიძლება მოგვწონდეს საშინელებათა ფილმი, მაგრამ ვგმობდეთ ძალადობას, ან ვკითხულობდეთ კრიმინალურ ნაწარმოებებს და არ ვიყოთ კრიმინალი — შეგვიძლია, მოგვწონდეს ფანტაზია ისე, რომ მისი განხორციელება საერთოდ არ გვინდოდეს.

რა თქმა უნდა, ზოგჯერ ფანტაზიები შეიძლება რეალური ექსპერიმენტის შთაგონების წყაროც გახდეს — და ეს შეიძლება იყოს ჯანსაღი, ამაღელვებელი და უსაფრთხო, თუკი ის თანხმობით სრულდება. მთავარია გულწრფელი კომუნიკაცია, ნდობა და ცხადი საზღვრები.

► ფანტაზიის ქონა არ ნიშნავს, რომ ჩვენ ეს ფანტაზია ვართ. ეს არის მენტალური სივრცე თამაშისთვის, თვითგამორკვევისა და სიამოვნებისთვის და არა — მორალური ღირებულება.

სექსუალური ფანტაზიების გაზიარება პარტნიორთან

საკუთარ სექსუალურ ფანტაზიებზე პარტნიორთან საუბარი შეიძლება სარისკო და შიშის მომგვრელი ჩანდეს ან თავს მოწყვლადად გაგრძნობინებდეთ, თუმცა ის ასევე შეიძლება ძალიან დამაჯილდოებელიც აღმოჩნდეს. როცა ეს მზრუნველობითა და თანხმობით ხდება, ფანტაზიების გაზიარებამ შეიძლება გააძლიეროს ნდობა, გააღრმაოს ინტიმურობა და გახსნას ახალი გზები კავშირისა და გართობისთვის.

მაგრამ როგორ ვქნათ ეს ისე, რომ თავი უხერხულად, გაკიცხულად ან გადატვირთულად არ ვიგრძნოთ?

დაიწყეთ ნდობით და არა — შოკით

სექსუალური ფანტაზიები პირადულია, ზოგჯერ ძალიანაც კი. სანამ მათ ვინმეს გაუზიარებთ, ჰკითხეთ საკუთარ თავს: ამ ადამიანთან თავს უსაფრთხოდ ვგრძნობ? შეგვიძლია, ერთად გამოვიკვლიოთ ჩვენი ცნობისმოყვარეობა შიშისა და სირცხვილის გარეშე? თუ პასუხი დადებითია, შეგიძლიათ, გააგრძელოთ.

არ ღირს ფანტაზიის გაჟღერება სექსის დროს ან კამათში. შეარჩიეთ მშვიდი, ინტიმური მომენტი. მაგალითად, შეიძლება რამე მსგავსი ფრაზა/კითხვა დაგეხმაროთ საუბრის დაწყებაში:

„შეიძლება, რაღაც მოგიყვე, რასაც ხანდახან წარმოვიდგენ ხოლმე გასართობად?“
„საინტერესო სტატია წავიკითხე სექსუალურ ფანტაზიებზე და რაღაც ჩემიც გამახსენდა…“
„ხომ არ გინდა, განვიხილოთ, რა ფანტაზიები აღგვაგზნებს, თუნდაც მხოლოდ წარმოსახვაში?“

დაადგინეთ ძირითადი წესები

სანამ მთლიანად ამ საუბარში გადაეშვებოდეთ, შეგიძლიათ, წინასწარ შეთანხმდეთ:

ფანტაზიები არ არის მოთხოვნები;
ყველაფერი გაზიარებული რჩება მხოლოდ თქვენ შორის;
ნებისმიერ თქვენგანს შეუძლია თქვას „არა, მადლობა“ ყოველგვარი გაკიცხვის გარეშე;
მოსმენა არ ნიშნავს თანხმობას.

ეს პირობები ქმნის სივრცეს გულწრფელობისთვის და არა — ვალდებულებისთვის.

დაინტერესდით მათი სურვილებითაც

მხოლოდ საკუთარი ფანტაზიების გაზიარება არ არის საკმარისი — მიეცით პარტნიორს საშუალება, არა მხოლოდ მოგისმინოთ, არამედ თავადაც გაგიზიაროთ. შეგიძლიათ, ინტერესი გამოხატოთ ასეთი ან მსგავსი კითხვებით:

„შენ ოდესმე გქონია ფანტაზია, რომლის გაჟღერებისაც მოგრიდებია?“
„გაქვს რამე ფანტაზია, რომელიც წარმოგიდგენია, მაგრამ არასდროს გამოგიცდია?“

ხშირად, ასეთი მარტივი კითხვებიც კი აჩვენებს, რომ პარტნიორის შინაგანი სამყარო და მისი სურვილები გაინტერესებთ და მზად ხართ მათ მოსასმენად.

როლური თამაში თუ რეალობა?

ზოგ წყვილს ძალიან მოსწონს ფანტაზიების რეალობაში მოყვანა, სხვებს კი ურჩევნიათ, ამაზე მხოლოდ საუბრით შემოიფარგლონ ან ისინი სექსის დროს გონებაში წარმოიდგინონ აღგზნების გასაძლიერებლად. არ არსებობს ერთი „სწორი“ გზა. შეგიძლიათ:

გამოიყენოთ ფანტაზიები, როგორც ეროტიკული დიალოგის ნაწილი;
სცადოთ ფანტაზიის მსუბუქი ვერსია (მაგალითად: მსუბუქად დაბმა, სრული დომინაციის მაგივრად);
პარტნიორთან ერთად გამოიგონოთ პერსონაჟები ან სცენარები და გაითამაშოთ ისინი.

რაც არ უნდა გადაწყვიტოთ — ეს უნდა იყოს თანხმობაზე დაფუძნებული, სახალისო და წნეხისგან თავისუფალი.

► ფანტაზიების გაზიარება შეიძლება თავისთავადაც გახდეს ინტიმურობის ფორმა. მათგან სიამოვნების მისაღებად სულაც არ არის აუცილებელი მათი რეალურად განხორციელება — ზოგჯერ შეიძლება ყველაზე ეროტიკული, სულაც, ის იყოს, რომ გრძნობთ, რომ თქვენი პარტნიორი გხედავთ და მას მიღებული ჰყავხართ.

როდესაც ფანტაზიები დისკომფორტს იწვევს

ფანტაზიების უმეტესობა უვნებელია, თუნდაც ისინი ინტენსიური, უცნაური ან ტაბუდადებული იყოს. მაგრამ ზოგჯერ ფანტაზიებმა შეიძლება გამოიწვიოს ემოციური დისკომფორტი, სირცხვილი ან დაბნეულობა. თუ ასე გრძნობთ თავს — იცოდეთ, რომ მარტო არ ხართ, და ეს არ ნიშნავს, რომ „რამე გჭირთ“.

ქვემოთ მოცემულია რამდენიმე გავრცელებული მიზეზი, რომელთა გამოც ფანტაზიები შეიძლება ჩვენთვის არაკომფორტული იყოს.

„რატომ მაქვს ამაზე ფანტაზიები?“

საკმაოდ გავრცელებულია შიში, რომ ფანტაზია შეიძლება ასახავდეს ადამიანის მორალს, იდენტობას ან წარსულს. ბევრი ფიქრობს: „ნუთუ ეს ნიშნავს, რომ ღალატი მინდა?“ ან „ცუდი ადამიანი ვარ?“ მაგრამ, როგორც უკვე განვიხილეთ, ფანტაზიები სიმბოლური და გაზვიადებულია და მათ ხშირად რეალურ სურვილებთან არ აქვთ კავშირი.

ტვინი ხშირად აერთიანებს ძალაუფლების, რისკისა და დაძაბულობის თემებს, რათა აღგზნების მექანიზმი აამუშაოს — ეს ამ თემებს მორალურად „ჭეშმარიტად“ არ აქცევს.

შემაწუხებელი და არასასურველი ფანტაზიები

ზოგჯერ ფანტაზიები შეიძლება შემაწუხებელი იყოს ან არ შეგვეძლოს მათი კონტროლი, განსაკუთრებით მაშინ, როდესაც ისინი შეუსაბამო დროს ან დისკომფორტის მომგვრელი შინაარსით ჩნდება. ეს შესაძლოა მიუთითებდეს შფოთვაზე, ობსესიურ-კომპულსიურ აშლილობაზე, ტრავმაზე ან დაუმუშავებელ ემოციურ მასალაზე და არა — თქვენს რეალურ სურვილებზე.

თუკი ფანტაზიები უფრო მეტად აკვიატებული ხდება, ვიდრე სასიამოვნო, ან ხელს გიშლით ყოველდღიურ ცხოვრებაში, შესაძლოა, უმჯობესი იყოს სექსუალურად პოზიტიურ და მზრუნველ ფსიქოთერაპევტთან საუბარი.

ფანტაზიები, რომლებიც ეწინააღმდეგება თქვენს ღირებულებებს

შესაძლოა, ფანტაზიების მიღება რთული იყოს, თუკი ისინი ეწინააღმდეგება თქვენს ღირებულებებს (მაგალითად, რელიგიურ, ეთიკურ, ფემინისტურ). ამან შეიძლება გააჩინოს ბრალეულობის შეგრძნება ან შინაგანი კონფლიქტი მაშინაც კი, როცა რეალურად არავისთვის ზიანი არ მიგიყენებიათ.

ასეთ შემთხვევებში შეიძლება დაგეხმაროთ:

საკუთარი თავისთვის იმის შეხსენება, რომ წარმოსახვა არ უდრის მოქმედებას;
იმაზე დაფიქრება, თუ რეალურად რას სიმბოლიზირებს ეს ფანტაზია ემოციურად;
ისეთ ფსიქოთერაპევტთან საუბარი, რომელიც სექს-პოზიტიურია.

არ არის საჭირო იმის შეცვლა, თუ რა აღგაგზნებთ, მაგრამ შეგიძლიათ, ისწავლოთ, როგორ თანაიცხოვროთ ამ ფანტაზიებთან ერთად და როგორ მიიღოთ საკუთარი თავი თუ სურვილები.

თუ ფანტაზია იწვევს უფრო მეტ სირცხვილს, ვიდრე სიამოვნებას, მას მეტი ყურადღება სჭირდება და არა — განკითხვა. ადამიანის სექსუალური ფიქრები და სურვილები კომპლექსური, მრავალშრიანი და ღრმად ადამიანურია. მათი ცნობისმოყვარეობითა და მზრუნველობით გამოკვლევა საკუთარი თავის უკეთ გაგებისა და განკურნების გზაა და არა — ზიანის.

წყაროები: Verywell Mind, Healthline, Psychology Today, Hims, WomanLog