აქტიურ ქალებს, რომლებიც, ნებისმიერი წინააღმდეგობის მიუხედავად, არ ერიდებიან საკუთარი აზრის დაფიქსირებას და დაუღალავად ცდილობენ, დაიმკვიდრონ ადგილი კაცებით დომინირებულ სფეროებში, უკვე დიდი ხანია, გენდერული დეზინფორმაციის სხვადასხვა საშუალებით ებრძვიან. ეს ყოველივე 21-ე საუკუნეში არ დაწყებულა, თუმცა, ტექნოლოგიების განვითარებასთან ერთად, კიდევ უფრო მარტივი გახდა ქალების, განსაკუთრებით კი პოლიტიკური ლიდერების, სამიზნეში ამოღება და მათზე ცრუ ინფორმაციის, ტყუილებისა თუ შეთქმულების თეორიების გავრცელება.
გენდერული დეზინფორმაცია, როგორც წესი, ქალების ინტელექტუალურ შესაძლებლობებს აკნინებს, და მიზნად ისახავს, ქალები ჩამოაცილოს საჯარო ცხოვრებას და გადაწყვეტილების მიმღებ პოზიციებს პოლიტიკაში. ის ცდილობს, საჯაროდ აქტიური ქალები წარმოაჩინოს სულელებად, ამორალურებად, მატყუარებად და სუსტებად. ეს სტრატეგია ქალებს მნიშვნელოვნად აზიანებს და ხელს უშლის ძალაუფლებრივი პოზიციების დაკავებაში.
ჩვენს ქვიზში შეამოწმებ, რამდენად კარგად იცი და გახსოვს ის შემთხვევები, როდესაც ქალი პოლიტიკოსები დისკრედიტაციის, დელეგიტიმაციისა თუ უბრალოდ შეურაცხყოფის მიყენების მიზნით, გენდერული დეზინფორმაციის სამიზნეები გახდნენ.
{{#if image:description}}
გენდერული დეზინფორმაციის გავრცელების მხრივ, არც საქართველოა გამონაკლისი. მხოლოდ 2023 წელს მითების დეტექტორმა, რომელიც ფაქტების გადამოწმების პლატფორმაა, გენდერული დეზინფორმაციის 62 შემთხვევა გამოავლინა. 2024 წელს კი ორგანიზაცია საფარმა იკვლია გენდერული დეზინფორმაცია პოლიტიკოსი ქალების წინააღმდეგ. რესპონდენტები ერთხმად თანხმდებიან, რომ დეზინფორმაციას ყოველთვის აქვს მიზანი და მათ შორის ასახელებენ ქალი პოლიტიკოსების დისკრედიტაციას, გაჩუმებას, მათზე ფსიქოლოგიური გავლენის მოხდენას და პოლიტიკიდან განდევნას. ამ საკითხზე მეტი ინფორმაციის მიღებას ამ ბმულზე შეძლებ.
მასალა მომზადებულია ქალთა ფონდთან თანამშრომლობით.