“ქართული ოცნების” ლიდერმა, მამუკა მდინარაძემ დღეს გამართულ ბრიფინგზე თქვა, რომ მთელი რიგი რეგულაციების გამკაცრებას გეგმავენ, როგორც ადმინისტრაციულ სამართალდარღვევათა, ისე სისხლის სამართლის კოდექსში, რაც კიდევ უფრო შეზღუდავს მოქალაქეების გამოხატვის თავისუფლებას.
მისი თქმით, დახურულ სივრცესა და და შენობებში მესაკუთრის წინასწარი თანხმობის გარეშე აქციის ჩატარება იკრძალება, ადმინისტრაციული პატიმრობის მაქსიმალური ვადა 60 დღემდე იზრდება, საჯარო უწყებებში დასაქმებული პირების მიმართ სიტყვიერი შეურაცხყოფისთვის კი მკაცრი სანქციები განისაზღვრება.
აღსანიშნავია, რომ “ნაციონალურმა მოძრაობამ” 2009 წლის 17 ივლისს მიიღო ცვლილება, რომლითაც ადმინისტრაციული პატიმრობის ვადა სამჯერ გაიზარდა და 90 დღით განისაზღვრა. 2014 წელს, “ქართულმა ოცნებამ” ადმინისტრაციული პატიმრობის ვადა 15 დღემდე შეამცირა, ახლა კი ეს ვადა ოთხჯერ გაზარდა და 60 დღით განისაზღვრება.
მამუკა მდინარაძემ განაცხადა, რომ წვრილმანი ხულიგნობის, ვანდალიზმისა და სამართალდამცავის მოთხოვნის დაუმორჩილებლობისთვის, მათი შეურაცხყოფისთვის, სასამართლოს შესასვლელების ბლოკირებისა და სხვა მსგავსი ადმინისტრაციული დარღვევებისთვის ჯარიმები იზრდება.
საერთაშორისო სტანდარტით, საჯარო პირს თმენის ვალდებულება აქვს და მოქალაქეების მხრიდან სიტყვიერი შეურაცხყოფა ამ სტანდარტს ექვემდებარება, თუმცა “ოცნებამ” დაანონსა, რომ ეს ასე აღარ იქნება.
“ადმინისტრაციულ სამართალდარღვევად განისაზღვრება სახელმწიფო პოლიტიკური თანამცდებობის პირის, საჯარო მოსამსახურის სიტყვიერი შეურაცხყოფა მის საქმიანობასთან დაკავშირებით, რისთვისაც ასევე მკაცრი სანქციების განისაზღვრება”, — განაცხადა მდინარაძემ.
ცვლილება, რომლის მიხედვითაც 30 დღიანი ადმინისტრაციული პატიმრობის ვადა 90 დღემდე გაიზარდა, ადმინისტრაციულ სამართალდარღვევათა კოდექსში 2009 წლის 17 ივლისს შევიდა.
მდინარაძის თქმით, სისხლის სამართლის კოდექსშიც მთელი რიგი ცვლილებები შევა, რაც მისი მტკიცებით, “ფსევდო-ლიბერალების ფაშისტური ქმედებების პრევენციის მიზნით” არის განპირობებული.
“კერძოდ, ძალადობრივი ქმედებებისკენ საჯაროდ მოწოდება აქამდე ისჯებოდა მხოლოდ ჯარიმით და საზოგადოებისთვის სასარგებლო შრომით. ამ დანაშაულისთვის განისაზღვრება პატიმრობა 3 წლამდე ვადით; იზრდება სისხლის სამართლებრივი პატიმრობის ვადა პოლიციელების მიმართ წინააღმდეგობის, მუქარისა და ძალადობისათვის და ეს გადავა მძიმე დანაშაულთა კატეგორიაში, 5-დან 6 წლამდე ამ კონკრეტულ შემთხვევაში; ასევე, მკაცრდება სანქცია პოლიციელზე, ხელისუფლების წარმომადგენელზე და მათი ოჯახის წევრებზე თავდასხმისთვის — ჯგუფურობის, არაერთგზისობის, საშიში საშუალებით განხორციელების შემთხვევაში, ანუ ეს კონკრეტული გარემოებები იქნება დამამძიმებელი”, — დააანონსა მდინარაძემ და ისიც თქვა, რომ პოლიციელის ჯანმრთელობის ხელყოფის ფაქტზეც გაიზრდება სასჯელი და ასევე — “სისხლის სამართლის წესით დაისჯება პოლიტიკური თანამდებობის პირზე, სახელმწიფო მოსამსახურეზე, ასევე საჯარო მოსამსახურეზე თავდასხმის ან ძალადობის მუქარის ჩამდენი პირიც”.
მდინარაძემ განაცხადა, რომ საკანონმდებლო ცვლილებების სრული პაკეტი სხვა ბევრ საკითხსაც ითვალისწინებს და მხოლოდ ძირითადზე გაამახვილა ყურადღება, მისი თქმით, ინიციატივა დღეიდან იქნება ხელმისაწვდომი პარლამენტის ვებგვერდზე. რეპრესიული კანონების მიღებას “ოცნება” დამოუკიდებლად აპირებს. პარლამენტის ლეგიტიმაციას არც საერთაშორისო პარტნიორები აღიარებენ, არც მოქალაქეების დიდი ნაწილი თუ სამოქალაქო საზოგადოება.
არჩევნების შემდგომ პერიოდში დაწყებული უწყვეტი აქციების პარალელურად, “ოცნებამ” მთელი რიგი რეპრესიული კანონები მიიღო, რომლითაც, მათ შორის, აიკრძალა აქციაზე ფოიერვერკისა და ლაზერის გამოყენება თუ ნიღბის ტარება, სისხლის სამართლის წესით დასჯადი გახდა მაგისტრალების ბლოკირება. ახლა დაანონსებული ცვლილებებით, კანონმდებლობა კიდევ უფრო ხისტი გახდება.