განახლება: ფეისბუქგვერდზე სახელწოდებით Cgra – Cgvs, რომელიც, სავარაუდოდ, ბელგიის ლტოლვილთა და მოქალაქეობის არმქონე პირთა გენერალურ კომისარს ეკუთვნის, გავრცელდა განცხადება, რომლის მიხედვით, უწყება წერილის ავთენტურობას არ ადასტურებს. მედია აპრილი ცდილობს დაკავშირებას კომისართან, რათა დააზუსტოს დეტალები. განახლებულ ინფორმაციას მიღებისთანავე შემოგთავაზებთ და მასალაც შესაბამისად ჩასწორდება.
ბელგიის ლტოლვილთა და მოქალაქეობის არმქონე პირთა გენერალური კომისრის განცხადებით, ბელგიაში ლტოლვილად ჩაბარებულ ქართველებს თავისუფლად შეუძლიათ ბელგიაში საქართველოს საელჩოში მისვლა არჩევნებში ხმის მისაცემად.
ეს საკითხი ბევრი ქართველი ემიგრანტისთვის კითხვის ნიშნის ქვეშ იდგა, ვინაიდან ბელგიაში ლტოლვილად ჩაბარებისას ქვეყანაში დარჩენის საბუთის მიღებასთან ერთად მათ მიუვიდათ წერილი იმის თაობაზე, რომ ეკრძალებოდათ საქართველოს საელჩოსთან ნებისმიერი ტიპის ურთიერთობა. აქედან გამომდინარე, ბევრმა ქვიარმა ემიგრანტმა არჩევნებთან დაკავშირებით კითხვით მიმართა კომისარს.
კომისარმა წერილში განმარტა, რომ საელჩოსთან ურთიერთობის აკრძალვა დაკავშირებული იყო თავშესაფრის მაძიებლის პირადი მონაცემებისა და ადგილმდებარეობის დაცვასთან და ემიგრანტებს კანონთან პრობლემები არ შეექმნებათ საელჩოში ხმის მიცემის დროს. მისი თქმით:
- საარჩევნო სივრცე არის ნეიტრალური ტერიტორია, რომელსაც ასევე ნეიტრალური ორგანო, ცენტრალური საარჩევნო კომისია, მართავს;
- არჩევნების დღე ნეიტრალური დღეა, როდესაც ძალაუფლება ხალხის ხელშია და არა — ხელისუფლების ან პოლიტიკური სუბიექტის;
- კანონის ან რეკომენდაციის ნებისმიერ ცვლილებას ყოველთვის აქვს კონკრეტული მოტივი და ის უნდა იქნას განმარტებული მხოლოდ ამ მოტივის საფუძველზე. ამ კონკრეტული ცვლილების მოტივი არის თავშესაფრის მაძიებლების პერსონალური მონაცემებისა და ადგილმდებარეობის მესამე პირისგან დაცვა. რეკომენდაციის მოტივი არ არის, ხელი შეუშალოს ლტოლვილებს ადამიანის უფლებებისა და დემოკრატიის გაძლიერებისთვის ბრძოლაში;
- პერსონალური ინფორმაციის ინსტიტუტებსა და განსაკუთრებით სახელმწიფოებს შორის გადაცემა მკაცრად კონტროლდება. პერსონალური ინფორმაციის გადაცემა ჩვენს სტრუქტურასა და საქართველოს საგარეო საქმეთა სამინისტროს შორის შესაძლებელია მხოლოდ სპეციალური ორდერისა და მოთხოვნის საფუძველზე.
კომისარმა ასევე მხარდაჭერა გამოუცხადა საქართველოს ევროპულ მომავალს და გამოთქვა იმედი, რომ არჩევნები დარღვევების გარეშე ჩაივლის.
„ბელგიის სამეფო მტკიცედ უჭერს მხარს საქართველოს ევროპულ მომავალს. თვალყურს ვადევნებთ საქართველოში განვითარებულ მოვლენებს და იმედი გვაქვს, რომ არჩევნები ყოველგვარი დარღვევების გარეშე ჩაივლის“, — ეწერა ბელგიის ლტოლვილთა და მოქალაქეობის არმქონე პირთა გენერალურმა კომისრის პასუხში.