სპეციალურმა საგამოძიებო სამსახურმა 13 წლის გოგოს პირადი ცხოვრების საიდუმლოს ხელყოფის ბრალდებით 28 წლის კაცი დააკავა.
უწყების ინფორმაციით, გამოძიებით დადგინდა, რომ 13 წლის დაზარალებულმა ბრალდებული სოციალურ ქსელში გაიცნო. ისინი ყოველდღიურად საუბრობდნენ ერთმანეთთან ვიდეოზარების საშუალებით, რა დროსაც ბრალდებული მუქარით არასრულწლოვანის შიშველ მდგომარეობაში ყოფნას მოითხოვდა.
„ვიდეოზარით კომუნიკაციისას არასრულწლოვანმა შენიშნა, რომ ბრალდებული ე.წ. „სქრინების“ გადაღებას ახდენდა. მან ბრალდებულს ინტიმური შინაარსის ფოტოების წაშლა მოსთხოვა. აპრილის თვეში დაზარალებულმა კომუნიკაცია შეწყვიტა ბრალდებულთან და სოციალურ ქსელში დაბლოკა, ასევე არ პასუხობდა მის ზარებს და მოკლე ტექსტურ შეტყობინებებს. აღნიშნულიდან მალევე სოციალურ ქსელ TikTok-ზე გავრცელდა არასრულწლოვანის ფოტოები, სადაც ის შიშველ მდგომარეობაში ჩანდა. გოგოს ინტიმური ხასიათის ფოტოები გადაუგზავნეს მის მეგობარსაც. ასევე, 13 წლის დაზარალებულს სოციალურ ქსელში უკავშირდებოდნენ მისთვის უცნობი ადამიანები, რომლებიც მისი ინტიმური ფოტოების დედასთან გადაგზავნით ემუქრებოდნენ“, — ნათქვამია სპეციალური საგამოძიებო სამსახურის განცხადებაში.
სპეციალური საგამოძიებო სამსახურის ცნობით, დაზარალებული არასრულწლოვანის მომართვის შემდეგ უწყებამ დაიწყო გამოძიება და დადგინდა ბრალდებულის ვინაობა და მისი ადგილსამყოფელი. პირადი ჩხრეკის შედეგად მისი მობილური ტელეფონიდან ამოიღეს 13 წლის გოგოს ინტიმური ხასიათის ვიდეოჩანაწერი და ფოტოები, ასევე სხვა არასრულწლოვანი გოგოების ინტიმური შინაარსის ფოტოებიც.
ბრალდებული დაკავებულია საქართველოს სისხლის სამართლის კოდექსის 157-ე პრიმა მუხლით, რაც პირადი ცხოვრების საიდუმლოს ხელყოფას გულისხმობს. დანაშაული 7 წლამდე თავისუფლების აღკვეთას ითვალისწინებს.