Massive Attack ადამიანის ფუნდამენტურ უფლებებზე სახელმწიფოს თავდასხმის გამო საქართველოში კონცერტს აუქმებს. ჯგუფის განცხადებით, რომელიც დღეს გამოქვეყნდა, სახელმწიფო საკუთრებაში არსებულ სივრცეში კონცერტის ჩატარება, შესაძლოა, საქართველოს მთავრობის მხარდაჭერად მიჩნეულიყო, რაც მათთვის მიუღებელია, რადგან “ეს ეწინააღმდეგება იმ ყველაფერს, რისაც ჩვენ გვჯერა”.
“გადავწყვიტეთ, გაგვეუქმებინა 28 ივლისს საქართველოში დაგეგმილი შოუ პროტესტის ნიშნად საქართველოს მთავრობის მიერ ადამიანის ფუნდამენტურ უფლებებზე თავდასხმის გამო. ამ მომენტში, სახელმწიფო საკუთრებაში არსებულ Black Sea Arena-ზე კონცერტის ჩატარება შესაძლოა მშვიდობიანი პროტესტებისა და საზოგადოების წინააღმდეგ ძალადობრივი ჩახშობის მხარდაჭერად ჩაითვალოს.
ცემა, დაკავება, დაშინება და ძალადობა მშვიდობიანი პროტესტანტების, აქტივისტების და ოპონენტების წინააღმდეგ, კანონებთან ერთად, რომელიც ლახავს სამოქალაქო საზოგადოებას და უარყოფს LGBTI უფლებებს, ეწინააღმდეგება იმ ყველაფერს, რისაც ჩვენ გვჯერა.
სოლიდარობას ვუცხადებთ მშვიდობიანი პროტესტის მონაწილეებს საქართველოში, რომლებიც ეწინააღმდეგებიან სახელმწიფოს ძალადობას და მიგვაჩნია, რომ მათი ხმა უნდა გაიგონ და მათი ბრძოლა უნდა იყოს საერთაშორისო ყურადღების ცენტრში. ჩვენ დავბრუნდებით და თქვენთან ერთად ჩავატარებთ კონცერტს თავისუფლებაში. #დაიცავიპროტესტი”, — ნათქვამია განცხადებაში.
Georgia. #ProtectTheProtest pic.twitter.com/PEdqNdrnH2
— Massive Attack (@MassiveAttackUK) June 12, 2024
Massive Attack-ის კონცერტი, Black Sea Arena-ზე, 28 ივლისს იყო დაგეგმილი. დღეს ცნობილი გახდა, რომ Starring Georgia-ს ფარგლებში დაგეგმილი კონცერტი გაუქმდა, თუმცა ორგანიზატორების განცხადებაში მიზეზი დასახელებული არ იყო.
აღსანიშნავია, რომ რუსული კანონის მოწინააღმდეგე მოქალაქეებმა Massive Attack-ს მრავალჯერ მიმართეს; აცნობეს, რომ კონცერტი ხელისუფლების მიერ იყო ორგანიზებული და ასევე, ჯგუფის წევრები საქმის კურსში ჩააყენეს ქვეყანაში არსებული ვითარების შესახებ. 3 მაისს ჯგუფმა სოციალურ ქსელში თბილისის პროტესტიდან ფოტოც გამოაქვეყნა და სოლიდარობა გამოუცხადა სტუდენტებს, რომლებიც ძალადობრივ სახელმწიფო რეპრესიებს ებრძვიან.