საქართველოს პრემიერმინისტრმა, რომელსაც არაერთხელ დაუდანაშაულებია დასავლელი პარტნიორები მუქარასა და შანტაჟში და მათ მიმართ უამრავი კრიტიკული განცხადება გაუკეთებია, მაინც მოახერხა საზოგადოება გაეოცებინა. ირაკლი კობახიძემ ფეისბუქპოსტში ევროკომისრის მხრიდან მკვლელობის მცდელობის მუქარაზე ილაპარაკა და რა თქმა უნდა, გლობალური ომის პარტიაც ახსენა. რამდენიმესაათიანი გაურკვევლობის შემდეგ, ევროკომისარმა, ოლივერ ვარჰეიმ თავად თქვა, რომ კობახიძე მას სდებდა ბრალს და ხაზგასმით აღნიშნა, რომ მისი საუბარი კონტექსტიდან იყო ამოგლეჯილი.
“საზოგადოება აკვირდება გამჭვირვალობის შესახებ კანონის გარშემო განვითარებულ მოვლენებს და ხედავს, რომ მთელი რიგი მაღალი რანგის უცხოელი პოლიტიკოსები არ ერიდებიან ღია შანტაჟსაც კი ქართველი ხალხის და მის მიერ არჩეული ხელისუფლების წინააღმდეგ. ამგვარ შეურაცხმყოფელ შანტაჟს დიდი ხანია მიჩვეული ვართ და მან საზოგადოებისთვისაც და ხელისუფლებისთვისაც არსებითად უკვე დაკარგა აქტუალობა.
თუმცა, ხანგრძლივი შანტაჟის ფონზეც კი, გამაოგნებელი იყო მუქარა, რომელიც ერთ-ერთ ევროკომისართან სატელეფონო საუბრისას გაჟღერდა. კერძოდ, ჩემთან საუბარში, ევროკომისარმა ჩამოთვალა მთელი რიგი ზომები, რომლებიც დასავლელმა პოლიტიკოსებმა გამჭვირვალობის კანონზე ვეტოს დაძლევის შემდეგ შეიძლება მიიღონ და ამ ზომების ჩამოთვლისას ახსენა — “ხომ ნახეთ ფიცოს რა დაემართა და ძალიან ფრთხილად უნდა იყოთო”, — ეწერა კობახიძის პოსტში.
კონტექსტისთვის განვმარტავთ, რომ ფიცო სლოვაკეთის პრემიერმინისტრია, რომელზეც რამდენიმე დღის წინ თავდასხმა განხორციელდა. სწორედ ამიტომ კობახიძე წერდა, რომ უკიდურესად შემაშფოთებელია, როცა მას ახსენებენ გამჭვირვალობის შესახებ კანონთან დაკავშირებული შანტაჟის კონტექსტში. აქვე ჩვენმა პრემიერმინისტრმა სლოვაკეთის პრემიერმინისტრზე თავდასხმაში დამნაშავეების იდენტიფიცირებაც შეძლო და ტრადიციულად, ესეც გლობალური ომის პარტიას დააბრალა.
“ხაზს გავუსვამ იმასაც, რომ წინასწარი ინფორმაციით, პრემიერ-მინისტრზე თავდასხმის უკან იკვეთება ერთ-ერთი ქვეყნის სპეცსამსახურის კვალი, რომელიც გლობალურ ომის პარტიასთან განსაკუთრებით მჭიდროდ არის დაკავშირებული.
პრევენციის მიზნით, თავი ვალდებულად მივიჩნიე, ამ მუქარის შესახებ ინფორმაცია ქართული საზოგადოებისთვის მიმეწოდებინა. რობერტ ფიცოს მკვლელობის მცდელობასთან გავლებული პარალელი შეგვახსენებს, რომ გლობალური ომის პარტიის სახით, საქმე გვაქვს უაღრესად საშიშ ძალასთან, რომელიც საქართველოში არეულობის შემოსატანად ყველაფერზეა წამსვლელი”, — დაწერა კობახიძემ და ისევ გაურკვეველი დატოვა, ბოლოს და ბოლოს ვის აერთიანებს გლობალური ომის პარტია.
კობახიძის ბრალდებას ევროკომისრის პასუხი მოჰყვა, რაც ევროპული კომისიის ვებგვერდზე
გამოქვეყნდა და იწყება ფრაზით “მინდა გამოვხატო გულწრფელი მწუხარება, რომ ჩემი სატელეფონო საუბრის გარკვეული ნაწილი კონტექსტიდან ამოღებულია”. ამის შემდეგ ევროკომისარს მოუწია განემარტა, რომ პროფესიული მოვალეობიდან გამომდინარე უწევს კონტაქტი სახელმწიფოს მეთაურებთან და მათ შორის კობახიძესთანაც.
ვარჰეის მტკიცებით, ის საქართველოს პრემიერმინისტრს რუსული კანონის პრობლემურობაზე და ქვეყანაში დაძაბულობაზე ესაუბრებოდა და სწორედ ამ კონტექსტში ახსენა სლოვაკეთის მაგალითი.
“საქართველოს ამჟამინდელ პოლიტიკურ ვითარებაში დიდ ძალისხმევას ვდებ, რომ გადავაფიქრებინო ქვეყნის პოლიტიკური ხელმძღვანელობას უცხოური გავლენის გამჭვირვალობის კანონის მიღება, რომელმაც შეიძლება შეარყიოს საქართველოს გზა ევროპისკენ.გაცნობიერებული მაქვს რა, რა ძლიერია ქართული საზოგადოების პრო-ევროპული მისწრაფება, სატელეფონო საუბრისას საჭიროდ ჩავთვალე პრემიერ-მინისტრის ყურადღება მიმეპყრო, რომ ისედაც მყიფე ვითარების გაღვივება არ მომხდარიყო იმგვარი კანონის მიღებით, რომელმაც შესაძლოა გამოიწვიოს მეტი პოლიტიზება და შესაძლო უკონტროლო სიტუაცია თბილისის ქუჩებში.
სწორედ ამ კონტექსტში ვახსენე სლოვაკეთში მომხარი ტრაგიკული შემთხვევა, როგორც მაგალითი იმისა, საით მიჰყავს საზოგადოება ამგვარ პოლარიზაციას ევროპაშიც კი”, — წერს ვარჰეი.
ამის შემდეგ კი ევროკომისარი კიდევ ერთხელ გამოხატავს წუხილს, რომ მისი სატელეფონო ზარის ნაწილი არა მხოლოდ მთლიანად იქნა ამოღებული კონტექსტიდან, არამედ საზოგადოებისთვის წარმოდგენილი იყო ისე, რომ შეიძლება გამოიწვიოს სატელეფონო ზარის თავდაპირველი მიზნის სრულად არასწორი ინტერპრეტაცია.
“მე ისევ მოვუწოდებ საქართველოს ხელისუფლებას, არ მიიღოს ეს კანონი. ამას ვითხოვ ისე, როგორც საქართველოს კარგად ნაცნობი და ამ დრომდე პატივცემული მეგობარი. მე ვაგრძელებ ქართველების მხარდაჭერას, რომლებიც ევროპული მომავლისკენ ისწრაფვიან”, — ასე ასრულებს განცხადებას ევროკომისარი.
ცნობისთვის, ამ დრომდე ევროკომისარ ვარჰეის მიმართ მმართველ გუნდს პრეტენზიები არ გამოუხატავს. მეტიც, ვარჰეის გამოესრჩლენ, როცა თბილისში ვიზიტისას ქართულმა ოპოზიციამ გააკრიტიკა და უნგრეთის პრემიერთან, ვიქტორ ორბანთან კავშირების გამო მის პრორუსულობაზე ალაპარაკდა.
