პრემიერმინისტრ კობახიძის ინფორმაციით, ამერიკის შეერთებული შტატების სახელმწიფო მდივნის თანაშემწეს ევროპისა და ევრაზიის საკითხებში, ჯეიმს ო’ბრაიენს ბიძინა ივანიშვილმა შეხვედრაზე უარი უთხრა. ამ შეხვედრასთან დაკავშირებით მას ჟურნალისტებმა ჰკითხეს მას შემდეგ, რაც პროპაგანდისტულმა ტელევიზიამ, იმედმა ჯერ გაავრცელა, შემდეგ კი წაშალა ინფორმაცია იმის შესახებ, რომ ო’ბრაიენს, რომელიც საქართველოში ჩამოდის, “ჩამოაქვს ბიძინა ივანიშვილის სანქცირების კონკრეტული პაკეტი”.
“იყო ბიძინა ივანიშვილის მიმართ თხოვნა შეხვედრასთან დაკავშირებით, რაზეც ბიძინა ივანიშვილმა უარით უპასუხა. ამას ჰქონდა თავისი ახნა და განმარტება. […] გასული თვეების განმავლობაში იყო შემთხვევები, როდესაც სხვა უცხოელ დიპლომატებს და პოლიტიკოსებსაც უთხრა უარი ბიძინა ივანიშვილმა შეხვედრაზე. ყველა შემთხვევაში უარის მიზეზი იყო ერთი და იგივე – ბიძინა ივანიშვილი აცხადებდა, რომ ის ისედაც არის დე ფაქტო სანქციების ქვეშ, მას აქვს გაყინული ორი მილიარდი დოლარი, რომელიც მან დასავლეთს რეალურად მიანდო და სამწუხაროდ, ეს თანხა, მაგრამ აღმოჩნდა გლობალური ომის პარტიის ხელში. აქედან გამომდინარე, ბიძინა ივანიშვილის პოზიციაა, რომ შანტაჟის ქვეშ ის ვერავითარ შეხვედრას ვერ გამართავს. როგორც კი დასრულდება ეს შანტაჟი და დე ფაქტო სანქციები, მაშინვე, რა თქმა უნდა, ნებისმიერი შეხვედრა შეიძლება შედგეს”, — აცხადებს კობახიძე.
რაც შეეხება იმას, თუ საიდან აქვს ინფორმაცია ქვეყნის პრემიერმინისტრს არაფორმალურ მმართველ ბიძინა ივანიშვილთან დაგეგმილი შეხვედრების შესახებ, კობახიძე აღნიშნავს, რომ მას უწევდა “გარკვეული საკითხების შეთანხმება”.
ჟურნალისტებმა კობახიძეს ასევე ჰკითხეს, მოაქვს თუ არა სანქციების პაკეტი ო’ბრაიენს, რაზეც მან უპასუხა:
“მე არაფერი არ ვიცი. მე საერთოდ არ ვიცი, რასთან დაკავშირებით მოდის ბატონი ო’ბრაიენი. არავითარი კომუნიკაცია შეხვედრის შინაარსთან დაკავშირებით არ ყოფილა”.
კობახიძეს არც დღეს დაუკონკრეტებია, ვინ არის “გლობალური ომის პარტია”.
- რუსულ კანონთან დაკავშირებული ყველა სიახლე ერთ გვერდზე — თვალი ადევნეთ მედია აპრილის განახლებად ინფორმაციას: ხალხი რუსული კანონის წინააღმდეგ.