გერმანიის ელჩი საქართველოში პეტერ ფიშერი გამოეხმაურა გუშინ რუსული კანონის საწინააღმდეგო აქციაზე სამართალდამცავების მხრიდან მშვიდობიან მოქალაქეებზე თავდასხმისა და ძალადობის ფაქტს.
„ამ ღამით თბილისის საპროტესტო აქციებზე ძალადობას და ფიზიკურ დაზიანებებს ჰქონდა ადგილი. ძალადობა უნდა შეწყდეს. ის არასდროსაა გამოსავალი. გერმანია და ევროკავშირი მიმდინარე მოვლენებს თვალს ადევნებენ და აფასებენ. ჩვენ საქართველოს პარტნიორები და მეგობრები ვართ მშვიდობაში, თავისუფლებასა და განვითარებაში“, — დაწერა პეტერ ფიშერმა X-ზე (ყოფილ ტვიტერზე).
Violence and personal injuries this night at #TbilisiProtests. The violence should stop. It is never a solution. 🇩🇪 and 🇪🇺 are following and evaluating these events closely. We are partners and friends of 🇬🇪 for peace, freedom and development.
— Peter Fischer (@Diplo_Peter) May 1, 2024
რუსული კანონის საპროტესტო აქცია პარლამენტში მიმდინარე პლენარული სხდომის პარალელურად დაიწყო. სხდომაზე რუსულ კანონს მეორე მოსმენით მუხლობრივად განიხილავდნენ. აქციის მონაწილეებმა პარლამენტის სხვადასხვა შესასვლელისკენ გადაინაცვლეს, საიდანაც ქართული ოცნების დეპუტატები უნდა გამოსულიყვნენ, თუმცა პოლიციამ ჩიტაძის ქუჩა ჩაკეტა. შსს-მ მოქალაქეებს მოუწოდა, დაეტოვებინათ პარლამენტის შენობის შესასვლელი და გამოსასვლელი სივრცეები.
მოგვიანებით, გავრცელდა კადრები, რომლებშიც მკაფიოდ ჩანდა, როგორ ძალადობდა სპეცრაზმი მოქალაქეებზე და გაფრთხილების გარეშე, სხვადასხვა სპეციალურ საშუალებას იყენებდა. ტერიტორიაზე გაუშვეს წყლის ჭავლიც, ამ შემთხვევაში იმ განსხვავებით, რომ რამდენიმე წამით ადრე ადგილზე შეკრებილი მოქალაქეები გააფრთხილეს. დაშავებულები არიან აქციის მონაწილეები და ჟურნალისტები, წვრილმანი ხულიგნობისა და პოლიციის მოთხოვნის დაუმორჩილებლობის ბრალდებით დაკავებულია 63 ადამიანი.
შსს ამტკიცებს, რომ რუსული კანონის წინააღმდეგ აქციაზე შეკრებილი მშვიდობიანი მოქალაქეები სამართალდამცველებს სიტყვიერად და ფიზიკურად დაუპირისპირდნენ და მათი მიმართულებით სხვადასხვა საგანი ისროლეს.