ზაფხული ყველასთვის სხვადასხვა ტიპის დასვენებასთან ასოცირდება. ზოგს მთების და ზღვების შემოვლა და აქტივობებით დატვირთული დღეები უყვარს, ზოგი უფრო მშვიდ, საყვარელი ფილმებით და სერიალებით სავსე დღეებს ირჩევს. არც ისინი დავტოვოთ უყურადღებოდ, ვინც ორივეს გაერთიანებას ცდილობს და პაპანაქება სიცხეს გრილ ოთახში ეკრანთან ემალება, საღამოს კი ყველაფრის ერთად მოსწრებას ცდილობს.
როგორ დასვენებასაც არ უნდა ირჩევდეთ, სერიალების რეკომენდაცია არასდროსაა ზედმეტი. დღეს კი ქვიარ-ფემინისტური თემატიკის ისეთ სერიალებს გირჩევთ, რომლებიც დროს ნამდვილად სახალისოდ და მრავალფეროვნად გაგაყვანინებთ ყველგან, სადაც არ უნდა იყოთ: ზღვის სანაპიროზე, სოფელში ხის ჩრდილში, მთის ფერდობზე გაშლილ კარავში თუ უბრალოდ საძინებელ ოთახში წამოკოტრიალებული.
The Law According to Lidia Poët – კანონი ლიდია პოეტის მიხედვით
თუ გაინტერესებთ, რა გზას გადიოდნენ ქალები მე-19 საუკუნეში სწავლისა და მუშაობის უფლებისთვის, ლიდია პოეტი უნდა გაიცნოთ. შესაძლოა, სპოილერად ჩათვალოთ, მაგრამ ეს პირველივე სერიაში ჩანს, ამიტომ გავრისკავთ და გეტყვით — სერიალის სიუჟეტი რეალურ პიროვნებაზეა, პირველ ქალზე იტალიაში, რომელმაც იურისტის განათლება მიიღო, მაგრამ გენდერის ნიშნით დისკრიმინაციის გამო ლიცენზიას არ აძლევდნენ.
სიუჟეტი ნაწილობრივ მიყვება რეალურ მოვლენებს და გამოგონილ პერსონაჟებსაც გვთავაზობს, რაც ისტორიას უფრო ემოციურს ხდის. ლიდიას შემართება და კაცებით დომინირებულ სფეროში გზის გაკვალვა ისე არის გადმოცემული, რომ პროცესის მონაწილედ გრძნობთ თავს და ყოველი მომდევნო სერიით უფრო მეტად ინტერესდებით.
გრძელი კაბებით ტალახში გზის გაკვალვისას, ველოსიპედით დამნაშავეების დევნისას თუ გამკიცხავი მზერით სავსე ოთახში ყოფნისას ლიდიას თავდაჯერება და შეუპოვრობა ნამდვილად გახდება მიზეზი, რომლის გამოც ამ სერიალის აქტიური მაყურებელი გახდებით.
Pose — პოზა
თუ მედია აპრილის აქტიური გამომწერი ხართ, უკვე გეცოდინებათ, რომ რედაქციაში ეს სერიალი ძალიან გვიყვარს და ყველა შესაძლებლობას ვიყენებთ, რეკომენდაცია გავუწიოთ. ამიტომ არც ეს მასალა იქნება გამონაკლისი.
იმისთვის, რომ ბოლრუმის კულტურის სიდიადე და მრავალფეროვნება შეიგრძნოთ, ვოგის ჩამოყალიბების საწყისებთან და პოპულარობის ზენიტთან აღმოჩნდეთ და გაიცნოთ პერსონაჟები, რომლებიც ახლო მეგობრებივით შეგიყვარდებათ, ეს სერიალი უნდა ნახოთ.
სიუჟეტი 1980-90-იანი წლების ნიუ-იორკში ვითარდება, სადაც თავს იჩენს შიდსის ეპიდემია, დისკრიმინაცია და გარიყვა, რაც სიუჟეტს საკმაოდ მძიმეს და ემოციურს ხდის. მაგრამ მთავარი ამბავი მაინც ის არის, როგორ ებრძვიან ამ მიუღებლობას და აგრესიას ქვიარ ადამიანები და სად პოულობენ მხარდაჭერას — არჩეულ ოჯახში, სადაც ერთად იბრძვიან გადარჩენისა და ოცნებების რეალიზებისთვის.
ამიტომ თუ თქვენი კატეგორია ზაფხული, დასვენება და გართობაა, ჩართეთ Pose და მზად იყავით თვალისმომჭრელი კოსტიუმებისთვის, მრავალფეროვანი შოუებისთვის, ხელოვნების ნიმუშად ქცეული ცეკვებისთვის, ოჯახური სითბოსა და ძლიერი, თავდაჯერებული ტრანსგენდერი ქალებისთვის, რომლებიც საკუთარ და სხვების ცხოვრებას ცვლიან.
თან არ დაგავიწყდეთ, ეს სერიალი ნამდვილი რეკორდსმენია, რომლის როლებისთვისაც ტრანსგენდერი მსახიობების ყველაზე დიდი შემადგენლობაა შეკრებილი, რაც კი აქამდე რომელიმე სცენარის მქონე სერიალში ყოფილა.
The Bold Type – დიდი შრიფტით
თუ Devil Wears Prada და Sex and the City გიყვართ, მაშინ თქვენთვის სერიალი გვაქვს, რომელიც მოდაზეც არის, მედიაზეც, ლიდერობაზეც, მეგობრობასა და სასიყვარულო ისტორიებზეც, ანუ ცოტათი ორივეს გაგახსენებთ.
ამ მსუბუქ და სახალისო სერიალში სამი დაქალის — ჯეინის, კეტის და სატონის ისტორიას ნახავთ, რომლებიც ერთად იკვალავენ კარიერულ გზას, იბრძვიან ქალთა უფლებებისა და პრესის თავისუფლებისთვის, გადიან თვითგამორკვევის ეტაპებს და ხშირად რთული არჩევანის წინაშეც დგებიან, მაგრამ ერთმანეთის მხარდაჭერით ყველაფერს უმკლავდებიან. აქვე ვითარდება არაერთი, მათ შორის ქვიარ სასიყვარულო ისტორიაც და დიდი როლი ეთმობა სექსუალური შევიწროების, ტოქსიკური მასკულინობისა და ქალთა ჯანმრთელობის საკითხებს.
სერიალი კიდევ ერთხელ გაჩვენებთ, რამხელა ძალა აქვს ქალების მეგობრობას და როგორ შეიძლება თანადგომა ყველაფრის მიღწევაში დაგეხმაროს, მიუხედავად იმისა, რომ ერთმანეთისგან სრულიად განსხვავებული ქალების მიზნებსა და ოცნებებზეა საუბარი.
Heited Rivalry — გაცხარებული მეტოქეობა
ბოლო დროის ყველაზე ცხელ ქვიარ შოუს უყურადღებოდ ვერ დავტოვებთ. თან გაცხარებული მეტოქეობა ნამდვილად არის ის სერიალი, რომელიც მარტივად და სასიამოვნოდ გადაგაგორებინებთ ზაფხულის ცხელ დღეებს.
კანადური სერიალი იმდენად მსუბუქი სიუჟეტითაა, რომ თქვენი მთავარი საფიქრალი წყვილების ურთიერთობები და ჰოკეის წესების გარკვევა გახდება. თუ “ტვინის განიავება” და რთული თემებისგან ყურადღების გადატანა გსურთ, როზანოვისა და ჰოლანდერის სექსუალური ქიმია (რაც გულწრფელად რომ ვთქვათ, სერიალის ძირითადი ხაზია), იდეალური ფიქრების გამფანტავია.
მათ კი, ვისაც უკვე ნანახი გაქვთ ეს სერიალი, თან ამ სიაში ჯერ ვერაფერი ნახეთ ახალი და უკვე ბრაზდებით კიდეც, რომ დროს გაკარგვინებთ, უბრალოდ შეგახსენებთ, რომ მალე მეორე სეზონს ველოდებით და გადამეორება არასდროსაა ზედმეტი.
Overcompensating – ზედმეტად კომპენსირება
უნდა დამეთანხმოთ, რომ სახალისო და მსუბუქი სერიალების სია კოლეჯისა და სასიყვარულო ისტორიების გარეშე ვერ ჩაივლის. თუ მოგენატრათ სიუჟეტი წვეულებებით, ქაოსით და მეგობრების თავგადასავლებით, მაშინ ეს თქვენთვისაა.
აქ დაგხვდებათ ბევრი უხერხული სიტუაცია და აბსურდული იუმორი, იდენტობისა და სექსუალობის გააზრების მცდელობები, ზრდასრული ცხოვრების და დამოუკიდებლობის გამოწვევები და საკუთარი თავის ძიების რთული, მაგრამ საინტერესო პროცესი.
მზად ხართ სულ მცირეოდენი სპოილერებისთვის? აქვე გაიცნობთ ბენს, რომელიც ყველანაირად ცდილობს ჰეტეროსექსუალი კაცის იმიჯის მორგებას. ასევე, კარმენს, რომელიც კოლეჯის პოპულარულთა წრეში შეღწევისთვის რესურსს არ ზოგავს. ნახავთ მათი მეგობრობის ისტორიას და პერსონაჟებთან ერთად გაიგებთ, რამდენად უაზროდ იხარჯება ენერგია, როცა საკუთარი თავსაც და სხვებსაც ცდილობ მოაჩვენო თავი ისეთად, როგორიც არ ხარ.
მთავარი გმირი, თავადვე არის სერიალის შემქმნელი და სიუჟეტიც ნაწილობრივ ავტობიოგრაფიულია. როგორც კომიკოსმა ბენიტო სკინერმა აღნიშნა, თავისი გამოცდილებები გამოიყენა ბენის პერსონაჟის გადმოსაცემად.
Bridgerton — ბრიჯერტონი
ისევ ეპოქის შეცვლის დროა. თუ 80-იანი წლების ან თანამედროვე ეპოქის სერიალები მოგბეზრდათ, ფიქციურ შუა საუკუნეებში გადავინაცვლოთ — სუნთსქვის შეკვრამდე მოჭერილი კორსეტების, ფაშფაშა კაბების, ყოვლად წარმოუდგენელი პარიკების, ფრაკებისა და სიგარების კვამლის ეპოქაში. სიუჟეტი სავსეა ჰეტერონორმატიული და სტერეოტიპული პერსონაჟებითა და ისტორიებით, უამრავი უაზრო ტრადიციით და აკრძალვით — სწორედ ამ მოვლენების ფონზე ვხედავთ ბრძოლას სიყვარულისთვის.
აქ გაიცნობთ მდიდარ საგვარეულოებს და სამეფო კარს, რომელთა ყოველდღიურობა ახალგაზრდა გოგოებისთვის უსამართლო სტანდარტების დაწესება და “საქორწინო ბაზარზე” გაყვანაა; სადაც წარმატებული ქორწინება ქალებისთვის “ერთადერთ მიღწევად”, კაცებისთვის კი ვალდებულებად არის წარმოჩენილი. და ამ ყველაფრის მიუხედავად, გაიცნობთ პერსონაჟებს, რომლებიც იბრძვიან ცვლილებებისთვის ან პოულობენ სხვების თვალებისგან დამალულ, მაგრამ თავისუფალ სივრცეს, სადაც სიყვარული სიყვარულია და ვერცერთი მკაცრი წესი მას ვერ აჩერებს.
ასევე გაიცნობთ ჰეტერო, ბისექსუალ, გეი და ლესბოსელ პერსონაჟებს და წყვილებს და დარწმუნდებით, რომ სექსუალობა ერთფეროვანი არცერთ ეპოქაში არ ყოფილა.
თუ უკვე ნანახი გაქვთ სერიალი, იგივე რჩევის გამეორება მომიწევს — მალე ახალი სეზონი გამოვა. მანამდე კი დედოფალი შარლოტას, ლედი დენბერის, პენელოპე ფეზერინგტონის, დაფნი, ელოიზ და ფრანჩესკა ბრიჯერტონების და უამრავი სხვა საინტერესო და სახალისო პერსონაჟის გახსენების დროა.
დასასრულისთვის უნდა აღვნიშნოთ, რომ ეს რეკომენდაცია მხოლოდ ერთ სერიალზე არ ვრცელდება და რა თქმა უნდა, დედოფალი შარლოტას ისტორიასაც (Queen Charlotte: A Bridgerton Story) მოიცავს.
It’s a Sin — ეს ცოდვაა
ახლა ვისაუბროთ სერიალზე, რომელიც ერთ-ერთი ყველაზე მხიარული და, ამავდროულად, ტრაგიკული შოუა. ბრიტანული მინი სერიალის სიუჟეტი 1980-იანი წლების ლონდონში ვითარდება, აქაც აივ-შიდსის ეპიდემიის მძვინვარებისას და ესეც გვიამბობს, როგორც დისკრიმინაციაზე, გარიყვასა და დანაკარგებზე, ასევე, მეგობრობაზე, თანადგომაზე, სიყვარულსა და თავისუფლებისთვის ბრძოლაზე.
ამ სერიალით გაიცნობთ 5 მეგობარს — რიჩის, ჯილს, როსკოს, კოლინს და ეშს. ძალიან განსხვავებულ — ამბიციურ, ენერგიულ, მზრუნველ და მორიდებულ ახალგაზრდებს, რომლებიც ერთმანეთის ოჯახი ხდებიან. გაიგებთ მათ ოცნებებსა და გეგმებზე, იგრძნობთ ტკივილს, რომელსაც ოჯახების იძულებით დატოვებისას განიცდიან და ბედნიერებას, რომელსაც ახალ ოჯახში პოულობენ.
Brooklyn nine-nine — ბრუკლინი 9-9
ეს სიტკომი ქვიარ-ფემინისტური შინაარსის ნამდვილად არ არის, მაგრამ ასეთ პერსონაჟებზეც გვიამბობს და ძალიან სახალისოა, ამიტომ ბონუსად განიხილეთ.
სიუჟეტი ვითარდება ნიუ-იორკის პოლიციის განყოფილებაში, სადაც დეტექტივები სტანდარტული, მკაცრი საპოლიციო წესებით არ მოქმედებენ და კრიმინალს მხიარული, ხშირად აბსურდული მეთოდებით ებრძვიან. სერიალში გაიცნობთ კაპიტან რეიმონდ ჰოლტს, რომელიც ღიად გეი შავკანიანი პერსონაჟია და დისკრიმინაციული გარემოს მიუხედავად, მაინც აღწევს კარიერულ წარმატებას ერთ-ერთ ყველაზე დახურულ სისტემაში.
ასევე, ბისექსუალ დეტექტივ როზა დიაზს, რომელიც შიშის ზარს სცემს განყოფილებაში სხვა დეტექტივებს, მაგრამ ძალიან მზრუნველი, ერთგული მეგობარია და, თუ კარგად დააკვირდებით, საკმაოდ უცნაური, მაგრამ კარგი იუმორის გრძნობაც აქვს.
სადაც უცნაურ იუმორს ვახსენებთ, იქ არც ჯინა ლინეტი და დეტექტივი ჯეიკ პირალტა უნდა დავტოვოთ უყურადღებოდ და ემი სანტიაგო და დევიდ ბოილიც ვახსენოთ, რომელებსაც ხშირად საერთოდ არ ესმით მათი იუმორი.
თუ მასალის ბოლოს აღმოაჩინეთ, რომ ყველა ეს სერიალი ნანახი გაქვთ და ახალი ვერაფერი შემოგთავაზეთ, გული არ გაიტეხოთ, მანამდე ჩვენს სხვა მასალებში ეძებეთ რაიმე სასურველი ან დაგველოდეთ, სანამ ახალი რეკომენდაციებით დაგიბრუნდებით: