ბოლი წლებში სატელევიზიო შოუებში ქვიარ პერსონაჟების წარმომადგენლობა იზრდება. თავიდან მათი ისტორიები მსგავსი იყო და ჰომოფობიურ გარემოში უფლებებისთვის ბრძოლაზე, ქამინგაუთის სირთულეებზე გვიამბობდა. თუმცა დროთა განმავლობაში პოპულარულ სერიალებში ისეთი პერსონაჟებიც ვნახეთ, რომელთა სხვადასხვა კუთხით გაცნობა, პროფესიული უნარების შეფასება, წარმატებების და წარუმატებლობის გაზიარება შევძელით.
დღეს გვინდა, განსაკუთრებული ყურადღება ქვიარ წყვილებზე გავამახვილოთ, რომელთა სიყვარულის ისტორიები რადიკალურად განსხვავებული, მაგრამ ამავდროულად ძალიან საინტერესოა. გაითვალისწინეთ, მასალა შეიცავს სპოილერებს.
არიზონა და კელი — Grey’s Anatomy
ABC-სა და შონდა რაიმსის პროექტი Grey’s Anatomy ცნობილია ადამიანის უფლებებზე, დისკრიმინაციულ მიდგომებზე, სექსიზმსა და ჰომოფობიაზე ყურადღების გამახვილებით. 20-სეზონიანი, ერთ-ერთი ყველაზე ხანგრძლივი სერიალის ისტორიაში არაერთი ლგბტ პერსონაჟი ვნახეთ, მაგრამ ჩვენი განსაკუთრებული სიყვარული არიზონასა და კელის ერგო.
ორი წარმატებული ექიმის ურთიერთობა თანამშრომლობით იწყება და მაყურებლის თვალწინ თავბრუდამხვევ სასიყვარულო ისტორიად იქცევა. წინააღმდეგობების მიუხედავად, ის და არიზონა ბედნიერ ოჯახს ქმნიან და წლების განმავლობაში ჰარმონიულად თანაცხოვრობენ.
ფანების იმედგაცრუებას საზღვარი არ ჰქონდა, როცა წყვილი დაშორდა და ორივემ ახალი ურთიერთობა დაიწყო. თუმცა, პერსონაჟები სერიალიდან წასვლის შემდეგ, სცენარისტმა იმედი მოგვცა, რომ ოდესმე მათ ისევ ერთად ვიხილავთ.
ბილი და ფრენკი — The Last Of Us
პოსტაპოკალიპტურ სამყაროში, სადაც ადამიანები გადარჩენისთვის ბრძოლის გამო ყველაფერზე არიან წამსვლელი, ბილისა და ფრანკის სიყვარულის ისტორია ერთადერთი ნათელი წერტილი იყო.
ორმა რადიკალურად განსხვავებულმა ადამიანმა ერთმანეთი ყველაზე რთულ დროს იპოვა და იმ გარემოში არამხოლოდ არსებობა, არამედ ბედნიერად ცხოვრება შეძლო. დარწმუნებული ვარ, ნამდვილმა ფანებმა იმ მარწყვის სუნიც კი იგრძნეს, რომელიც სამყაროს დასასრულის ფონზე მათ პატარა ბაღში გაიზარდა.
ნომი და ამანიტა — Sense8
Sense8 სერიალების იმ რიცხვში შედის, სადაც ქვიარები ყველაზე ფართოდ არიან წარმოდგენილი. დარწმუნებული ვარ, ვერავინ შეძლებს დაივიწყოს პრაიდფესტივალის და ბედნიერი წყვილების კადრები, რომელსაც ამ შოუში ნახავს. ამის ფონზეც კი ფავორიტი წყვილის შერჩევა რთული არ არის.
ნომი ტრანსგენდერი ქალია, რომელიც ტელეპათიურად ერთმანეთთან დაკავშირებული 8 ადამიანის კლასტერის წევრია. ის 7 სხვა ადამიანთან ერთად გადარჩენიისთვის იბრძვის. შეყვარებული ამანიტა კი ნომის პირველი და მთავარი მხარდამჭრია.
ბრიმსლი და რეინოლდსი —Queen Charlotte: A Bridgerton Story
პოპულარული რომანტიული მელოდრამის, ბრიდჯერტონის პრეისტორია დედოფალი შარლოტასა და მეფე ჯორჯის სიყვარულზე გვიამბობს, რასაც ფონად 2 ერთგული მსახურის, ბრიმსლისა და რეინოლდსის ისტორია ახლავს.
სტერეოტიპებით სავსე ეპოქაში, სადაც ქალებისადმი მთავარი მოთხოვნა სარფიანად დაქორწინებინა იყო, გეი წყვილს ურთიერთობის დამალვა უწევს. მიუხედავად, იმისა რომ ბრიმსლი და რეინოლდსი მეფესა და დედოფალთან მეგობრობენ, მათ უსაფრთხოების განცდა მაინც არ აქვთ. ამიტომ ამ ვნებიანი სიყვარულის ისტორია ძირითადად დახურულ ოთახში, ყველასგან მალულად განვითარდა.
კონორი და ოლივერი — How To Get Away With Murder
კრიმინალური დრამის თავბრუდამხვევი სიუჟეტი ყოველდღე უფრო და უფრო გაურკვეველი და ჩახლართული ხდება. ამ სერიალში მართლა რთულია გაიგო, როდის და რას ფიქრობენ ადამიანები, ან რატომ იღებენ კონკრეტულ გადაწყვეტილებებს.
ერთადერთი, რაც კითხვის ნიშნის ქვეშ არ დგება კონოროსა და ოლივერის სიყვარულია. ერთმანეთის მხარდასაჭერად წყვილი არაერთ რისკზე მიდის და მშვიდად ცხოვრების დიდი სურვილის მიუხედავად, თავგადასავლებით, სისხლითა და დანაშაულით სავსე გზას გადიან.
Მიჩი და კემი — Modern Family
ამ წყვილზე რაც არ უნდა ვთქვათ, ვერცერთი სიტყვა ვერ აღწერს, რამდენად მნიშვნელოვან როლს თამაშობენ სერიალში. წარმოგიდგენიათ გლორიას, ჯეის, ფილის, კლერის და სხვების ცხოვრება კიმის ტეხასური იუმორისა და მიჩის “ქალაქური” აუტანლობის გარეშე? რა თქმა უნდა, არა.
მიჩის და კიმის სიყვარულის ისტორია დიდ და ხმაურიან ოჯახში ვითარდება, სადაც საკუთარ პატარა ოჯახს ქმნიან შვილებთან, ლილისთან და რექსფორდთან ერთად. მიუხედავად იმისა, რომ სერიალში აგრესიული ჰომოფობიური გარემო არ ჩანს, იუმორნარევი ფორმით ნაჩვენებია სტერეოტიპები და დაბრკოლებები, რომელსაც გეი მამები აწყდებიან.