58 იუთუბერი საერთო ვიდეო მიმართვას ავრცელებს და რუსულ კანონს ეწინააღმდეგება. ჰიტა, ფოქსი ელენიკო, ლაშა გელაშვილი, ბენი, GI2GI, გიორგი დანელია, საეჭვო კაცი, კაცები, ჰანგრი მენისა და ოქტოპუსის წევრები, თაკო საზინა და სხვები ერთხმად ამბობენ, რომ ეწინააღმდეგებიან ყველაფერს, რაც ევროპას გვაშორებს, ქვეყანაში არეულობას იწვევს და ასევე, გმობენ ძალადობას, რომელიც ბოლო კვირებში მიმდინარე აქციებისას არაერთხელ ვიხილეთ.
“არა ძალადობას! არა ამ კანონს, რომელიც ამდენ პრობლემას იწვევს და ის ახალგაზრდები, ვინც ქუჩაში დგანან, თუ ნაციონალები და უცხოეთის აგენტები გგონიათ, ჩემი აზრით ვერ ხედავთ ვერაფერს, რადგან ამ ადამიანებს თავისი ქვეყანა უყვართ და მზად არიან ბრძოლისთვის. ყოველგვარი იარლიყის მიწებება უადგილოა, ზედმეტია”, — ამბობს ჰიტა.
ოქტოპუსის წევრი გიორგი კალატოზი კი ამბობს, რომ იუთუბერები არიან ერთად, არიან ხალხის გვერდით.
გიორგი დანელიას თქმით, “როცა ვხედავთ, რომ ეს კანონი გვაშორებს ევროპას, თვითონ ევროპისგან ვიგებთ ამას, ყველაფერი ნათქვამია. სხვა რა ენაზეღა უნდა ვთქვათ, რომ არ გვინდა ეს კანონი?!”
ანანო ტოტიაური ამბობს, რომ ყველამ ჩვენი წილი პასუხისმგებლობა უნდა ავიღოთ და დავდგეთ ერთად ჩვენი ქვეყნისთვის.
“იუთუბერები ვართ იქ, სადაც უნდა ვიყოთ — ერთმანეთის გვერდით, ხალხის გვერდით. ეს კანონი უნდა გავიწვიოთ და ასევე, ძალადობა არანაირად მართლდება — არც მაგრამით, არც პოლიტიკურ პარტიებზე მიწერით”, — ამბობს საეჭვო კაცი.
რობერტო მავანის თქმით, ვერ ხვდება, რა საჭირო იყო კანონის ხელახლა ინიციირება და საზოგადოების კიდევ ერთხელ გახლეჩა — “არ გვინდა ეს კანონი, ერთად დავდგეთ, ძალა ერთობაშია!”.
კაცები ამბობენ, რომ ეს კანონი გვაშორებს უკეთეს მომავალს და გვაახლოებს ნაცნობ წარსულს.
“ქართული ოცნების” მიერ ხელახლა ინიციირებული კანონის წინააღმდეგ პროტესტი ორ კვირაზე მეტია გრძელდება. მრავალათასიანი მშვიდობიანი შეკრებები არაერთხელ დაარბიეს, კანონის წინააღმდეგი არიან ევროპელი და ამერიკელი ლიდერები, ევროკავშირის სტრუქტურები, ორგანიზაციები, მედია საშუალებები, ყველა ასაკისა და სხვადასხვა პოზიციის მქონე მოქალაქეები. მიუხედავად ამისა, ქართული ოცნება კანონის მიღებაზე უარს არ ამბობს და მას ორი მოსმენით მხარი უკვე დაუჭირეს. ბოლო კვირების განმავლობაში ვნახეთ სასტიკი ძალადობა მოქალაქეებზე, პოლიტიკოსებსა და ჟურნალისტებზე, ათეულობით ადამიანის დაკავება, აქციებზე იყენებენ ცრემლსადენ გაზს, წიწაკის სპრეის, წყლის ჭავლსა და რეზინის ტყვიებს, თუმცა ამ უკანასკნელის გამოყენებას უარყოფენ. წინ კანონის მესამე მოსმენაა, რომელიც დაახლოებით ორ კვირაში გაიმართება.