სერიალების მოყვარულებმა, რომლებიც მიიჩნევენ, რომ ქვიარ რეპრეზენტაცია მნიშვნელოვანია და სხვადასხვა სერიალში ინკლუზიურ რეპრეზენტაციას სულმოუთქმელად ელიან, ბოლო წლებში არაერთი მნიშვნელოვანი ნამუშევარი იხილეს. მიუხედავად იმისა, რომ ქვიარ მრავალფეროვნების ასახვა ჯერ კიდევ არაა სათანადო დონეზე და ძირითადად გეი ან ლესბოსელ (თუმცა, უფრო ხშირად გეი კაცებს) პერსონაჟებს ვხედავთ.

რაც არ უნდა იყოს, ის ფაქტი, რომ ქვიარ ადამიანების გამოცდილებების ასახვა ბევრად მომატებულია, ძალიან კარგია. წელს უკვე არაერთი სერიალი გამოვიდა ან ახალი სეზონით დაბრუნდა. სტატიაში კი ნახავთ 5 სერიალს, რომელსაც 2024 წლამდე დარჩენილ თვეებში უნდა ველოდეთ.

თანამგზავრები (Fellow Travelers)

27 ოქტომბერს ახალი მინისერიალი — თანამგზავრები იწყება, რომელშიც მთავარ როლებს ბრიჯერტონის ვარსკვლავი, ჯონათან ბეილი და ამერიკული საშინელებათა ისტორიის მსახიობი, მეთ ბომერი ასრულებენ. თანამგზავრები თომას მალონის 2007 წლის მხატვრულ ნაწარმოებს ეფუძნება და გვიყვება სასიყვარულო ისტორიას, რომელიც 50-იან წლებში იწყება და ათწლეულების განმავლობაში გრძელდება.

სერიალის მთავარი პერსონაჟების სიყვარულის ისტორია შემთხვევითი შეხვედრით იწყება და პირადი თუ ზოგადსაკაცობრიო გამოწვევების ფონზე მიმდინარეობს, როგორიცაა — 1960-იანი წლების ვიეტნამის ომი, 70-იანი წლების დისკო ჰედონიზმი და ნარკოტიკებზე მოთხოვნის ზრდა, შემდეგ კი 80-იანი წლების აივ/შიდსის კრიზისი.

Gen V

Gen V, რომლის პრემიერა 29 სექტემბერს იგეგმება, სუპერგმირების შესახებ გადაღებული სერიალის, ბიჭების (The Boys) “სპინ-ოფია”, რომელიც, გავრცელებული ინფორმაციით, ბევრად გამბედავი, დაძაბული და ქვიარ რეპრეზენტაციით გამორჩეული იქნება. სერიალი განსაკუთრებული მონაცემების მქონე ახალგაზრდა გმირებზე მოგვიყვება, მათ შორის, გენდერის შეცვლის უნარის მქონე ჯორდანზე. ახალგაზრდა გმირები გოდოლკინის უნივერსიტეტში საკუთარი უპირატესობის დასამტკიცებლად იბრძვიან, თუმცა როცა სასწავლებლის ბნელი საიდუმლოების შესახებ შეიტყობენ, მოუწევთ გადააფასონ, რა არის გმირობა.

აშერთა ოჯახის დაქცევა (The Fall of the House of Usher)

12 ოქტომბერს Netflix-ზე ედგარ ალან პოს ნაწარმოებების შთაგონებით შექმნილი ახალი სერიალის — აშერთა ოჯახის დაქცევა პრემიერაა დაგეგმილი. სერიალის აღწერიდან ვიგებთ, რომ ეს იქნება ეპიკური საშინელებათა ამბავი სიხარბის შესახებ, რომელიც ტრაგიკულ მომენტებსაც გვპირდება.

“Netflix-ის სერიალი სასტიკი და-ძმის, როდერიკ და მედლინ აშერისა და მათი შვილების ამბავს მოგვიყვება. ოჯახმა წარმატებული სააფთიაქო ბიზნესი, ერთგვარი ფუფუნების, პრივილეგიისა და ძალაუფლების იმპერია ააგო, თუმცა როცა ოჯახის წინამძღოლი სიკვდილის პირას მივა, საიდუმლოებებს ნელ-ნელა ფარდა ეხდება და იმპერიაც ნგრევას იწყებს”, — ვკითხულობთ სერიალის აღწერაში.

ამასთან, ცნობილია, რომ საშინელებათა და დრამატულ სერიალში ქვიარ პერსონაჟებსაც ვიხილავთ — ასე რომ, 12 ოქტომბერს უნდა დაველოდოთ.

ჩვენი დროშა სიკვდილს ნიშნავს (Our Flag Means Death)

ჩვენი დროშა სიკვდილს ნიშნავს რეჟისორ დევიდ ჯენკინსის რომანტიკული კომედიის ჟანრის სერიალია, რომელიც წარმატებული პირველი სეზონის შემდეგ მეორე სეზონით 5 ოქტომბერს ბრუნდება. სერიალი მეკობრედ ქცეული ჯენტლმენისა (რის დარბი) და მისი ეკიპაჟის ფათერაკების შესახებ გვიყვება, რომლებიც სახელის მოხვეჭას ცდილობენ და მათი გზა დიდებულ მეკობრეთა კაპიტან შავწვერასთან (ტაიკა ვაიტიტი) გადაიკვეთება.

სერიალმა ქება დაიმსახურა, რადგან ქვიარ რეპრეზენტაციით გამორჩეულია — ჩვენი დროშა სიკვდილს ნიშნავს, რომლის მოქმედება მე-18 საუკუნის დასაწყისში ხდება, რამდენიმე ქვიარ ურთიერთობაზე ჰყვება და ასევე, არაბინარულ მეკობრესაც გვაცნობს. ერთგული ფანები კიდევ უფრო მრავალფეროვან, დრამატულ და ამაღელვებელ სასიყვარულო ამბებს ელიან.

ლოკი (Loki)

მარველის ცბიერი, ფლიდი ანტიგმირის, ლოკის შესახებ გადაღებული სერიალის პირველი სეზონი წარმატებული იყო, თან მარველის დიდი ხნის ფანებმა, რომლებიც ფანტასტიკურ სამყაროში ქვიარ პერსონაჟის გამოჩენას ელოდნენ, სასიამოვნო სიახლე გაიგეს — ლოკიმ პირველ სეზონში ფაქტობრივად ღიად თქვა, რომ ბისექსუალია. მიუხედავად იმისა, რომ მისი იდენტობის ეს ნაწილი სერიალში ჯერ არ გაშლილა.

ახლა კი, 5 ოქტომბერს, სერიალის პრემიერის დღეს უნდა დაველოდოთ — თვალი ვადევნოთ ლოკის თავგადასავლებს და იმედი გვქონდეს, რომ ამ სეზონში მაინც ვიხილავთ ლოკის ქვიარ ურთიერთობის ხაზს.