საშობაო რომანტიკული ფილმები ერთმანეთს ჰგავს — როგორც წესი, მთავარი გმირი ბავშვობის სახლში უნდა დაბრუნდეს, მარტო ყოფნით გატანჯული მოულოდნელად მომხიბლავ ადამიანს გადაეყაროს ან ძველ “ქრაშს” ხელახლა შეხვდეს, ცოტა გაუგებრობაც საჭიროა, ბოლოს კი ყველაფერი სიყვარულის გამარჯვებით, ნაძვის ხესთან შეკრებით და საჩუქრების გახსნით მთავრდება. მიუხედავად იმისა, რომ სადღესასწაულო ფილმებში მოულოდნელი არაფერი ხდება, მაინც სიამოვნების ჟრუანტელი გვივლის, როცა გაურკვევლობის დასასრულს მთავარი პერსონაჟები ერთმანეთს კოცნიან, ყველა ძველ წყენას მიუტევებენ, ოჯახი ერთიანდება და საახალწლო მუსიკა ისმის.

კიდევ ერთი დეტალი გამოგვრჩა, რაც ყველა საახალწლო ფილმს აერთიანებს — ჰეტერო ოჯახები, პერსონაჟები, სიყვარულის ამბები, მაგრამ ამ სტატიაში ასე არ არის. აქ 5 საშობაო (მეტწილად) ფილმს აღმოაჩენთ, რომლებშიც ქვიარ პერსონაჟებს უყვარდებათ, ოჯახურ გარემოში ტკბილად ატარებენ შობას და ახალი წლიდან ახალი გეგმების დაწყობას აპირებენ.

სტატიაში მცირე სპოილერებს კი იპოვით, მაგრამ რაკი, ზოგადად, საშობაო ფილმები ერთი დიდი სპოილერია, ეგ არაფერი.

Single All the Way

ფილმის მთავარი გმირი, პიტერი ისე უსაშველოდ მარტოხელაა, რომ ოჯახის წევრები თავს აბეზრებენ და წელიწადში 1-2-ჯერ შეხვედრისასაც კი არ აძლევენ მოსვენებას. ამიტომ, საშობაოდ გადაწყვეტს, სახლში დაბრუნებისას საუკეთესო მეგობარი, ნიკიც თან წაიყვანოს და ოჯახი დაარწმუნოს, რომ მარტო აღარ არის. დაბრუნებულს კი დედაც სიურპრიზს ახვედრებს — პაემანს ფიტნეს ინსტრუქტორ ჯეიმსთან. ოჯახი ორად იყოფა — დედა ჯეიმსთან ურთიერთობას უჭერს მხარს, დანარჩენი წევრები კი პიტერს და ნიკს შორის სიყვარულის ნაპერწკალს დაეძებენ. და მაინც, გაბედავს ნიკი მრავალწლიანი მეგობრობის შემდეგ რომანტიკულ გადახვევას თუ ახალგამოჩენილ სექსუალურ კაცს აირჩევს?

თუ უსაშველოდ მარტოხელა ხარ ან სიყვარული უკვე ნაპოვნი გყავს, ჩაუჯექი(თ) ფილმს ერთ ზედმეტად საყვარელ ოჯახზე, რომელიც შობას ერთად ატარებს და ცდას არ აკლებს, რომ მარტოხელა შვილს სიყვარულის პოვნაში დაეხმაროს.

Happiest Season

ჰარპერი შობას ოჯახთან ერთად ხვდება. რა თქმა უნდა — შობა ხომ ოჯახური დღესასწაულია, თანაც პოლიტიკოს მამას ამომრჩევლის მოსაზიდად გაპრიალებული, ოჯახური ფოტოები სჭირდება. ჰარპერი გადაწყვეტს, რომ შეყვარებული, ები თან წაიყვანოს და ოჯახს გააცნოს, რაც კარგი აზრი იქნებოდა, მშობლებმა და დებმა მისი სექსუალური ორიენტაციის შესახებ რომ იცოდნენ, მაგრამ ეს ასე არ არის. ჰარპერი საშობაო საჩუქარივით ლამაზად შეფუთულ ოჯახს ვერ უტყდება, ამიტომ გადაწყვეტს, რომ ებისთან ურთიერთობა დამალოს და უბრალოდ ისე წარუდგინოს, როგორც თანამცხოვრები. ალბათ გასაგებია, რომ ეს გეგმა საბოლოოდ დიდ აურზაურს გამოიწვევს, მთავარ გმირებს გულიც გაუტყდებათ, ბავშვობის ტრავმების წყებაც გველის და ბედნიერებისა და სრულყოფილების გადაფასებაც. მოკლედ, წინ რომანტიკულ-კომედიური საშობაო გაუგებრობა გელით.

The Christmas Setup

როცა მარტოხელა ხარ და საშობაოდ სახლში ბრუნდები, რა უნდა ინატრო იმაზე მეტი, ვიდრე ის, რომ სკოლის დროინდელ “ქრაშს” აქეთ ჩაუვარდე გულში. მაგრამ ყველაფერი ისე მარტივად არაა, როგორც ჩანს — ჰიუგოს ნიუ იორკში შემდგარი კარიერა და სამომავლო გეგმები ელის, ამიტომ ურჩობს, სიყვარულს გაურბის, მაგრამ ცხელი შოკოლადის ხათრით ვინ არ დაივიწყებს ყველა ბარიერს?!

რომანტიკული ამბების იქით, The Christmas Setup-მა შეიძლება ბავშვობის საყვარელ საშობაო მოგონებებზე, რიტუალებზეც დაგაფიქროთ, რომლებიც ნელ-ნელა დავიწყებას ეძლევა, ნადგურდება. და კიდევ, სხვა რომ არაფერი, იმის ნახვაც ღირს, რამდენად გარიყულად გრძნობს თავს ჰეტერო შვილი გეი ვაჟისა და მამის განსაკუთრებული ურთიერთობიდან — აი, ეს კი ნამდვილად რაღაც ახალია.

Spoiler Alert

ეს მთლად საშობაო ფილმი არც არის, უფრო ურთიერთობის ამბავია დასაწყისიდან მის ნაადრევ (ფრთხილად, სპოილერი!) დასასრულამდე, მაგრამ როგორც ფილმის შობაზე შეყვარებული მთავარი გმირი ამბობს — “ნაძვის ხეებით თუ გადათვლი, წლები სწრაფად გადის”. ამ ფილმში საახალწლო განწყობის დანიშნულებაც ესაა — წარსულისთვის თვალის გადავლება, გადაფასება, შეჯამება და გეგმის დასახვა: “რა უნდა აკეთო?”. ურთიერთობის დასრულებისასაც ხომ მსგავს პროცესს გავდივართ.

კიტი და მაიკლი ერთმანეთს გეი ჰიმნების ფონზე, ბარში ხვდებიან, ახლოვდებიან, უხერხულობას და დაბნეულობას ნელ-ნელა გადალახავენ და მრავალწლიან ურთიერთობას იწყებენ, რომელსაც გულისტკენაც სდევს თან, ამაღელვებელი მომენტებიც და კრიზისიც. თუმცა, ყველაფერი უფერულდება, როცა აღმოჩნდება, რომ კიტს ავთვისებიანი სიმსივნე აქვს და გადარჩენის შანსი არც ისე მაღალია. როცა სიკვდილი ახლოსაა, მიტევებაც უფრო მარტივია, ზრუნვაც და ვერნათქვამი სიტყვების გაჟღერებაც. ფილმს უნდა უყურო, რომ გაიგო, კიტი და მაიკლი “ბოლო ნაძვის ხის” გადათვლას მოასწრებენ თუ ყველაფერი შობამდე დასრულდება.

Anna and the Apocalypse

სასკოლო წვეულებისთვის სამზადისი, სადღესასწაულო დეკორაციები, ოჯახური ურთიერთობები, მუსიკალური ნომრები — Anna and the Apocalypse-ში საშობაო ფილმებისთვის დამახასიათებელ ყველა დეტალს ნახავთ და ცოტა მეტსაც — ზომბებს, რომლებიც მთავარ გმირებს შესაჭმელად დასდევენ. ეს ფილმი იმათთვის არის, ვისაც საახალწლოდ რომანტიკული ამბების გაგონებაც არ უნდათ, მაგრამ სიცილზე უარს არ იტყოდა.

აქ სადღესასწაულო დეკორაციები ზომბიდ ქცევისგან თავდაცვის იარაღია, ნაძვის ხეების მიღმა საფრთხე იმალება, დისფუნქციური ოჯახი და მარტოსულობა კი უფრო ტკბილია, ვიდრე მთავარი პერსონაჟები ერთ რიგით შობას ჩათვლიდნენ. რაც მთავარია, ფილმი კიდევ ერთხელ გვახსენებს, რა არის შობის “მუღამი” — ადამიანური კავშირების, კომფორტის პოვნა და ბედნიერების სხვებისთვის გაზიარება. თუ ფილმის ყურებისას კარგად, ძალიან კარგად დააკვირდებით, იმავეს ამბობს ძირს გაგორებული თოვლის ბაბუას მოკვეთილი თავი ზომბების ენაზე.