სპეციალურმა საგამოძიებო სამსახურმა 19 წლის გოგოს პირადი ცხოვრების საიდუმლოს ხელყოფისა და სექსუალური ხასიათის ქმედების იძულების ფაქტზე 43 წლის კაცი დააკავა.
უწყების ინფორმაციით, გამოძიებამ დაადგინა, რომ ბრალდებული გ.ქ. ინტერნეტ სივრცეში, მათ შორის Facebook-ის სხვადასხვა ჯგუფში, ყალბი გვერდების გამოყენებით ანაზღაურების სანაცვლოდ ახალგაზრდა გოგოებს იწვევდა ქალის თეთრეულის სარეკლამო ფოტოსესიისთვის. დაინტერესებულ პირებს ბრალდებული ეცნობოდა სააგენტოს ფოტოგრაფად, ყალბი სახელითა და გვარით “ნუკრი ჯიოშვილი” და საკუთარ ბინაში ფოტოსესიებს უწყობდა, რა დროსაც ინტიმური შინაარსის ფოტოებს უღებდა.
გამოძიებით ასევე დადგინდა, რომ 43 წლის კაცმა Facebook-ზე ქალის სახელით შექმნა ყალბი პროფილი “Qristi.n.K.Jioshvili”, რომლითაც 19 წლის დაზარალებულ გოგოს დახურულ ჯგუფში ფოტოგრაფის თანაშემწედ გაეცნო და დაპირდა, რომ თეთრეულის სარეკლამო ფოტოსესია იქნებოდა კონფიდენციალური და ფოტოებში არ გამოჩნდებოდა მისი სახე. 2024 წლის მარტში ბრალდებული 19 წლის გოგოს ფოტოსესიისთვის “ნუკრი ჯიოშვილის” სახელით შეხვდა გლდანში მდებარე თავის ბინაში, სადაც მას, როგორც ფოტოგრაფს, თითქოს სტუდია ჰქონდა მოწყობილი და ქალის ინტიმური შინაარსის ფოტოები უკანონოდ მოიპოვა.
“ფოტოსესიის შემდეგ, ბრალდებული ქალთან კომუნიკაციას ტელეფონით აგრძელებდა და მისი ინტიმური შინაარსის ფოტომასალის ნათესავებთან გავრცელებით ემუქრებოდა, თუ არ შეასრულებდა მის მოთხოვნებს — არ შეხვდებოდა, სქესობრივ კავშირს არ დაამყარებდა და ახალ ინტიმური შინაარსის ფოტო/ვიდეო მასალას არ გადაუგზავნიდა. მას შემდეგ, რაც აღნიშნულზე დაზარალებულისგან უარი მიიღო, მის სარგებლობაში არსებულ კიდევ ერთ ყალბ პროფილზე საჯაროდ განათავსა ფოტოსესიის დროს დაზარალებულისთვის გადაღებული ინტიმური ხასიათის ერთ-ერთი ფოტო სურათი და განაგრძო მუქარა”, — აცხადებენ უწყებაში.
მათივე ინფორმაციით, დაზარალებულის მიმართვის შემდეგ სპეციალურმა საგამოძიებო სამსახურმა პროკურატურასთან თანამშრომლობით ჩაატარა გამოძიება, ასევე, ბრალდებულის პირადი ჩხრეკა, მის სარგებლობაში არსებული ავტომანქანის, საცხოვრებელი ადგილის და ასევე, გლდანის რაიონში მდებარე იმ ბინის ჩხრეკა, სადაც ფოტოგადაღებებს ატარებდა. უწყებაში ამბობენ, რომ მტკიცებულების სახით ამოღებულია ბრალდებულის მობილური ტელეფონები, კომპიუტერები, ფოტოაპარატი, ფოტოსესიის ჩასატარებლად შესაბამისი მოწყობილობები და ელექტრონული ინფორმაციის შესანახი სხვა ობიექტები.
“აღნიშნული მასალების შესწავლის შედეგად, გამოძიების მიერ ამოღებულია 200-მდე ქალის 5000-ზე მეტი ინტიმური შინაარსის ფოტო და ვიდეო მასალა, მათ შორის ფარულად გადაღებული ვიდეოკადრები, რომელსაც ბრალდებული წლების განმავლობაში უკანონოდ მოიპოვებდა. გარდა ამისა, ბრალდებულის მობილური ტელეფონის შესწავლის შედეგად, ნანახი იქნა სხვა დაზარალებული ქალების მიმართ ინტიმური შინაარსის სურათების გავრცელების მუქარის და შანტაჟის შემცველი მესიჯები. გამომძიებლებმა უკვე მოახდინეს რამდენიმე დაზარალებული ქალის იდენტიფიცირება, რომელთა ინტერესებს და უფლებებსაც ასევე დაიცავს საგამოძიებო სამსახური”, — აღნიშნავენ უწყებაში.
მათივე ინფორმაციით, საგამოძიებო სამსახურის თქმით, გრძელდება გამოძიება, რომლის ფარგლებშიც შესწავლილი იქნება ბრალდებულის ყველა დანაშაულებრივი ეპიზოდი და დაკავებულს ბრალდება კანონით დადგენილ ვადაში წარედგინება.