არასამთავრობო ორგანიზაციები ერთობლივ განცხადებას ავრცელებენ და აღნიშნავენ, რომ “რუსულ კანონთან ბრძოლა გადამწყვეტ ფაზაში შედის”, ამიტომ მოქალაქეების სიმრავლე მნიშვნელოვანია.
“მნიშვნელოვანია, რომ ჩვენი სიმრავლე, სიძლიერე და ერთსულოვნება ქვეყნის ევროპული მომავლისთვის კიდევ ერთხელ ყველამ ერთად დავანახოთ, როგორც კონსტიტუციის მიღმა გასულ ხელისუფლებას, ასევე საერთაშორისო საზოგადოებას”, — აღნიშნულია განცხადებაში და გაჟღერებულია მოწოდება პოლიციისა და შსს-ის სხვა თანამშრომლების მიმართაც — “მოვუწოდებთ პოლიციელებს და შინაგან საქმეთა სამინისტროს სხვა თანამშრომლებს, არ შეასრულონ უკანონო ბრძანება და არაძალადობრივი პროტესტის მიმართ არ გამოიყენონ ძალა. ეს პროტესტი ყველა ჩვენთაგანის ევროპული, მშვიდობიანი და ბედნიერი მომავლის უზრუნველყოფას ემსახურება”.
განცხადების ავტორები წერენ გუშინ, 30 აპრილს, პარლამენტთან განვითარებულ მოვლენებთან დაკავშირებით და აცხადებენ, რომ შინაგან საქმეთა სამინისტრო რუსული კანონის საწინააღმდეგო მშვიდობიანი აქციის დაშლა სრულიად უსაფუძვლოდ, გაფრთხილების გარეშე დაიწყო.
“შსს-მ დემონსტრანტების მიმართ გამოიყენა არაპროპორციული ძალა – დემონსტრანტების ნაწილი არის ნაცემი, გამოიყენეს რეზინის ტყვიები, ცრემლსადენი გაზი, წიწაკის სპრეი და წყლის ჭავლი. დააკავეს მშვიდობიანი დემონსტრანტები. სცემეს და სხეულის სხვადასხვა სახის დაზიანება მიღეს, მათ შორის, გოგოებმა, ქალებმა და ბავშვებმა. სახალხო დამცველის შეფასებითაც, აქციას ჰქონდა მშვიდობიანი ხასიათი და არ იყო მისი შეწყვეტისა ან მის წინააღმდეგ ძალის გამოყენების საფუძველი. ყველა დაკავებულს ეყოლება ადვოკატი და გაეწევა ყველა საჭირო დახმარება”.
განცხადებაში აღნიშნულია ისიც, რომ პროტესტი გასცდა რუსული კანონის გაპროტესტების ფარგლებს და სახელმწიფოს პასუხმა უკანონო და ბრუტალური სახე მიიღო.
“მმართველი პარტიის დამფუძნებლის მიერ დადებული პირობა არჩევნების შემდეგ რეპრესიების დაწყების შესახებ, როგორც ჩანს, უკვე ხორციელდება რუსულ სტილში. თუმცა, ხალხის რეაქცია ცხადყოფს, რომ ყველაფერ რუსულს ქართველი ხალხი ადეკვატურ პასუხს გასცემს”, — აღნიშნულია განცხადებაში.
აქცია — კი ევროპას! არა რუსულ კანონს! დღეს ისევ იმართება. პროტესტი 17:00 საათზე — პარლამენტის უკან არის დაგეგმილი.
გუშინ, 30 აპრილს რუსული კანონის საპროტესტო აქცია პარლამენტში მიმდინარე პლენარული სხდომის პარალელურად დაიწყო და პირველი აპრილის დილამდე გაგრძელდა. სხდომაზე რუსულ კანონს მეორე მოსმენით მუხლობრივად განიხილავდნენ. აქციის მონაწილეებმა პარლამენტის სხვადასხვა შესასვლელისკენ გადაინაცვლეს, საიდანაც ქართული ოცნების დეპუტატები უნდა გამოსულიყვნენ, თუმცა პოლიციამ ჩიტაძის ქუჩა ჩაკეტა. შსს-მ მოქალაქეებს მოუწოდა, დაეტოვებინათ პარლამენტის შენობის შესასვლელი და გამოსასვლელი სივრცეები, შემდეგ კი იძულებით სცადა გათავისუფლება.
მოგვიანებით, გავრცელდა კადრები, რომლებშიც მკაფიოდ ჩანდა, როგორ ძალადობდა სპეცრაზმი მოქალაქეებზე და გაფრთხილების გარეშე, სხვადასხვა სპეციალურ საშუალებას იყენებდა. ტერიტორიაზე გაუშვეს წყლის ჭავლიც. ამ შემთხვევაში იმ განსხვავებით, რომ რამდენიმე წამით ადრე ადგილზე შეკრებილები გააფრთხილეს. დაშავებულები არიან აქციის მონაწილეები, ჟურნალისტები და დეპუტატები. მთელი ღამის განმავლობაში აქციის მონაწილეების მიმართ პერიოდულად იყენებდნენ წყლის ჭავლსა და ცრემლსადენ გაზს, თუმცა მოქალაქეები ტერიტორიზე რჩებოდნენ.
შსს-მ დაკავებულების შესახებ ინფორმაცია მხოლოდ პირველი მაისის დილით გაავრცელა და თქვა, რომ 63 ადამიანს წვრილმან ხულიგნობისა და პოლიციის მოთხოვნისადმი დაუმორჩილებლობას ედავებიან. უწყება ამტკიცებს, რომ რუსული კანონის წინააღმდეგ აქციაზე შეკრებილი მშვიდობიანი მოქალაქეები სამართალდამცველებს სიტყვიერად და ფიზიკურად დაუპირისპირდნენ და მათი მიმართულებით სხვადასხვა საგანი ისროლეს. დღესვე ცნობილი გახდა, რომ სპეციალურ საგამოძიებო სამსახურში აქციის მონაწილეებზე ძალადობის საქმეზე გამოძიება დაიწყო.