სოფელ იორმუღანლოში 13 წლის გოგო, სავარაუდოდ, “ოჯახის შექმნის” მიზნით გაიტაცეს. არსებული ინფორმაციით, გამტაცებელი 16 წლის თანასოფლელი ბიჭია. “ოჯახის შექმნა” ბრჭყალებში იმის გამოა, რომ 13 წლის ბავშვი არ შეიძლება იყოს “ცოლი” და მას არ შეიძლება ჰყავდეს “ქმარი”.
გატაცებული ბავშვის მამა მთავარ არხთან ამბობს, რომ 3 დღეა მისი შვილი გატაცებულია და პოლიცია ეძებს, თუმცა უშედეგოდ.
“პოლიციელები მეუბნებიან, რომ სამი დღე და ღამეა ეძებენ და არ არის. მამამ იცის, სად არის, მაგრამ მეუბნებიან, ჩვენც არ ვიცითო. არ ვიცით, ღამე რანაირად “მოიპარეს”. ისინი მეუბნებიან, რომ ჩემი გოგო არის წასული, 13 წლის გოგო როგორ წავა?! თუ ჩემი გოგო იყო წასული, მოაბრუნონ. პოლიციაში აქვთ რაღაც წერილი, ის ჩემი ბავშვის არ არის. ვითომ ჩემმა გოგომ დაწერა, მოდი და წამიყვანეო, ჩემი ბავშვის წერილი არ არის”, — ამბობს მოზარდის მამა.
მედია აპრილს საქართველოს შინაგან საქმეთა სამინისტროში უთხრეს, რომ სამძებრო სამუშაოები შეტყობინების მიღებისთანავე დაიწყეს და მიმდინარეობს გამოძიება სისხლის სამართლის კოდექსის 143-ე მუხლით, რაც თავისუფლების უკანონო აღკვეთას გულისხმობს.
ბავშვთა ქორწინება საქართველოში ამ დრომდე პრობლემაა, მიუხედავად იმისა, რომ ეს სისხლის სამართლის დანაშაულია. ქალთა უფლებადამცველები საკანონმდებლო ხარვეზებზე, მეტწილად კი, არსებულ პრაქტიკაზე მიუთითებენ და სახელმწიფოსგან მყისიერ რეაგირებას ითხოვენ.
ადრეულ ქორწინებად მიიჩნევა ოფიციალური ან არაოფიციალური კავშირი ორ ადამიანს შორის, რომელთაგან ერთ-ერთს მაინც არ მიუღწევია 18 წლის ასაკისათვის. ვინაიდან 18 წელს მიუღწეველი პირი ჯერ კიდევ ბავშვია, ეს გულისხმობს, რომ მას ინფორმირებული გადაწყვეტილების მიღება არ შეუძლია და მისი თანხმობა ქორწინების თაობაზე გაუაზრებელია. ამის გათვალისწინებით, ბავშვობის ასაკში ქორწინება იძულებით ქორწინებად განიხილება. გარდა ამისა, ხშირია შემთხვევები, როცა ქორწინება გარიგებას ან საზიანო პრაქტიკებს უკავშირდება. გაეროს მოსახლეობის ფონდის თანახმად, ადრეული ქორწინება ადამიანისა და ბავშვის უფლებების დარღვევად უნდა განვიხილოთ.
- ამ თემაზე ვრცლად წაიკითხეთ მედია აპრილის სტატია: ბავშვთა ქორწინება საქართველოში: “მამამ გადაწყვიტა, რომ მისი მეგობრის შვილს გავყოლოდი ცოლად”
ადრეული/ბავშვთა ქორწინება დანაშაულია. თუ ხართ არასრულწოლვანი და გაიძულებენ ქორწინებას ან გაქვთ ინფორმაცია სხვა არასრუწლოვანზე ძალადობის შესახებ, შეგიძლიათ მიმართოთ პოლიციას.
-
უფასო, 24-საათიანი ცხელი ხაზი. შეგიძლიათ მოითხოვოთ ანონიმურობა — 112
-
ცხელი ხაზი, რომელიც მოქალაქეებისთვის საკონსულტაციო მომსახურების გაწევის მიზნით ფუნქციონირებს — 116 006
-
დაუკავშირდით გაეროს ბავშვა ფონდს — (995 32) 2 25 11 30
-
საფარი — 599 407 603
-
ძალადობისგან დაცვის ეროვნული ქსელი/Anti-Violence Network of Georgia – 032 272 67 17
-
წამების მსხვერპლთა ფსიქოსოციალური და სამედიცინო რეაბილიტაციის ცენტრი (GCRT) – 032 222 06 89;