მუსიკის სამყაროსთვის ქვიარ არტისტების შემოქმედება უმნიშვნელოვანესია, ვინაიდან ქვიარ კულტურის ბუნების უნიკალურობა, მრავალფეროვნება, ექსპერიმენტულობა და სიახლეებისკენ სწრაფვა სწორედ ის მახასიათებლებია, რომლებიც ხარისხიანი მუსიკალური პროდუქტების შესაქმნელ გადამწყვეტ კომპონენტებად შეგვიძლია მივიჩნიოთ.
2023 წელი ქვიარებისთვის ბევრი გამოწვევითა თუ სირთულით იყო სავსე, თუმცა ქვიარებსა თუ მათ მხარდამჭერთა რიგებს სულ უფრო მეტი ადამიანი, მათ შორის, მუსიკოსი, უერთდება — ზოგიერთი მათგანი თავს უსაფრთხოდ გრძნობს, რომ საკუთარი სექსუალობა თუ გენდერული იდენტობა საჯარო გახადოს, ხოლო ზოგსაც სურს, რომ მხარდამჭერთა რიგებში ირიცხებოდეს, რადგან მათ იციან, რომ ქვიარ სივრცეები მიმღებლობითა და სიყვარულითაა სავსე.
მედია აპრილი გთავაზობთ იმ 10 სიმღერის ჩამონათვალს, რომლებიც ღიად ქვიარმა მუსიკოსებმა მსმენელს 2023 წელს შესთავაზეს. სავარაუდოა, რომ მათგან რამდენიმე კარგად ნაცნობია თქვენთვის, რადგან საყოველთაოდ ცნობილი ჰიტია, ხოლო ზოგი სიმღერა ან/და მუსიკოსი კი — ნაკლებად. თუმცა არ გამოვრიცხოთ, რომ შესაძლოა, ისინი თქვენს ფლეილისტშიც დიდი ხნით მოხვდეს.
“So You Are Tired” — Sufjan Stevens
ორი დეკადის განმავლობაში, მისტერიული ინდი მუსიკოსის სუფიან სტივენსის ცნობისმოყვარე მსმენელები მუდმივად კითხვის ნიშნის ქვეშ აყენებდნენ მის სექსუალობას. კითხვებს განსაკუთრებით ის ამძაფრებდა, რომ არტისტის მთელი შემოქმედება, ემოციურად და ფიზიკურად, ინტიმური ურთიერთობების ჭრილში, როგორც კაცებთან, ასევე ქალებთანაა დაკავშირებული.
სიმღერა “So You Are Tired” ალბომ “Javelin”-ის ნაწილია. სწორედ ამ ალბომის მეშვეობით დაქამინგაუთდა მუსიკოსი. სუფიანმა დაწერა, რომ ეს ალბომი მისი ცხოვრების სინათლეს, მის პარტნიორსა და საუკეთესო მეგობარს, ევანს რიჩარდსონს ეძღვნებოდა, რომელიც 2023 წლის აპრილში გარდაიცვალა. სიმღერა დაკავშირებულია ცხოვრების სხვადასხვა ეტაპის დასრულებასთან, იქნება ეს ურთიერთობა, ავადმყოფობა, მეგობრობა თუ ზოგადად ცხოვრება.
სიმღერაში არტისტის სიტყვებს ერთგვარი ეგზისტენციალური წონა და, ამასთანავე, უცნაურად სიმშვიდე აქვს, როცა იმგვარ გულისგამგმირავ სტროფებს გვიმღერის, როგორებიცაა: “მე კვლავ შენზე შეყვარებული ვიყავი, როცა ვიცოდი, რომ ეს უკვე დასრულებული იყო”. სიმღერის მეოცნებე ბგერებისა და ამაღელვებელი ფონური ვოკალის მეშვეობით, არტისტი ოსტატურად გვაქცევს გავლენის ქვეშ და იმგვარ ემოციებს გვაგრძნობინებს, რომლებიც შესაძლოა, განსაცდელად რთულია, თუმცა საჭიროა, რომ განვიცადოთ.
“True Blue” — Boygenius
სიმღერა “True Blue” ჯგუფის სადებიუტო სტუდიური ალბომიდანაა (“The Record”). ჯგუფის სამივე წევრს, ჯგუფის დაარსებამდე, ერთმანეთის შემოქმედების აღფრთოვანება და აღიარება აერთიანებდა. სწორედ ეს მეგობრობა გახდა იმგვარი სათაურების შთაგონება, რომლებსაც ტრიოს შესახებ ყველგან შეხვედრებით და რომლებიც წევრების ქვიარ მეგობრობის ექსტაზურ სიხარულზე გვაუწყებენ.
ეს ალბომიც თავიდან ბოლომდე ტრიოს ქვიარ მეგობრობას ეძღვნება, რომელიც ურთიერთობების ტრადიციული გაგების მიღმაა — მასში რომანტიკულ სიყვარულსა და პლატონურ აღფრთოვანებას შორის ხაზები მკრთალია.
როგორც ბენდის ერთ-ერთი წევრი, ჯულიენი ამბობს, მისთვის უმთავრესია, რომ ჯგუფის სიმღერებმა იმ ადამიანებამდე მიაღწიოს, რომლებიც ახლები არიან ქვიარ კულტურის შეცნობაში და პირველ ნაბიჯებს დგამენ თავიანთი ნამდვილი პიროვნების შეცნობაში.
“მინდა, ხელები შემოვხვიო მათ და ვუთხრა, რომ ყველაფერი კარგად იქნება”, — ამბობს ჯულიენი.
“Rush” — Troye Sivan
როგორც ავსტრალიელი პოპ მომღერალი, ტროი სივანი აცხადებს, მან წინა რამდენიმე წელი იმის აღმოჩენაში გაატარა, რომ უყვარს “ხალხი… საზოგადოება და სექსი” და, ასევე, წვეულებები. სიმღერა “Rush” სწორედ მომღერლის ამ აღმოჩენაზე ფოკუსირდება და მოიცავს ყველაფერს, რაც ადამიანებს, სექსსა და წვეულებებს უკავშირდება.
ეს არის სიმღერა, რომელიც ტროის მომავალ ალბომში “Something to Give Another” იქნება შეტანილი. როგორც მუსიკის კრიტიკოსები წერენ, 28 წლის მომღერალს თვალისმომჭრელი, ეშმაკური ქვეტექსტებით სავსე პოპ სიმღერების შექმნის გამოცდილება უკვე ჰქონდა, ხოლო ამ სიმღერით მან მოახერხა შეენარჩუნებინა ეს ნიშა და ამავე დროს, ზაფხულის მგზნებარე, ამაღელვებელი და ემოციებით დახუნძლული ჰიმნი შეექმნა. მელბურნის სმიტ სტრიტზე გეი კლუბებში გატარებული ღამეებით შთაგონებული ვიდეო კლიპი ჰომოეროტიკისა და ჰომორომანტიკისგან გამოწვეულ ექსტაზსა და ბედნიერებას ასახავს.
“What Was I Made For” — Billie Eilish
ბალადები ბილი აილიშის შემოქმედებაში ახალი არ არის, თუმცა სიმღერამ “What was I made For” მსმენელის მოლოდინს გადააჭარბა — ის კომერციულად წარმატებული აღმოჩნდა და მოსმენების რაოდენობის მიხედვით, ავსტრალიაში, ირლანდიაში, შვეიცარიასა და გაერთიანებულ სამეფოში პირველ ადგილს მიაღწია. გარდა ამისა, გრემის 66-ე დაჯილდოებაზე რამდენიმე ნომინაციაშია წარდგენილი.
სიმღერის ვიდეო კლიპი, რომლის რეჟისორი თავად აილიშია, უწყვეტი კადრია. ვიდეოში სადაც ჩანს აილიში, რომელიც ყვითელ კაბაშია გამოწყობილი ფილმ “Barbie”-ის სტერეოტიპული ბარბის მსგავსად. როგორც სათაური და ტექსტი გვაუწყებს, სიმღერა ეგზისტენციალური ხასიათისაა და კითხვას სვამს იმის თაობაზე, რა არის ჩვენი, ადამიანების მიზანი. სიმღერა დაწერილია სპეციფიკურად ფილმისთვის “Barbie”, როცა მთავარი გმირი დაბნეულად, დაკარგულად და გაურკვევლობაში მყოფად გრძნობს თავს ნამდვილ სამყაროში გადასვლის შემდეგ.
აილიშმა 2023 წელს ერთ-ერთ ინტერვიუში ისაუბრა თავის სექსუალობაზე, თუმცა, როგორც მოგვიანებით აღმოჩნდა, მას არ სურდა ამ გზით დაქამინგაუთება. მისი თქმით, უმჯობესი იქნებოდა, მის შემოქმედებაზე გაეკეთებინათ აქცენტი და არა — სექსუალობაზე, რადგან, აილიშის აზრით, იმთავითვე ცხადი იყო, რომ მას ქალებიც იმავენაირად იზიდავს, როგორც — კაცები.
“Flowers” — Miley Cyrus
მაილი საირუსმა მიმდინარე წელს, შესაძლოა ითქვას, თავისი შემოქმედების ერთ-ერთი ყველაზე მნიშვნელოვანი ჰიტი გამოუშვა და მისი მსმენელების გარდა, მთელი სამყარო გაჩერდა იმისთვის, რომ მაილის ახალი სიმღერისთვის მოესმინა. სიმღერა მაილის მერვე სტუდიური ალბომიდანაა (“Endless Summer Vacation”) და ბევრი რეკორდი მოხსნა. მაგალითისთვის, დებიუტი აშშ-ის მუსიკალურ ჩარტებში ბევრი კვირის განმავლობაში პირველ ადგილს იკავებდა.
სიმღერაში მოთხრობილია გაწყვეტილი სიყვარულის ამბავი, რომელიც, როგორც ფანები იუწყებიან, მაილის ყოფილ ქმართანაა დაკავშირებული. ლირიკა ამბობს, რომ მას ისე ვერავინ შეიყვარებს, როგორც საკუთარ თავი და რომ მას თავად შეუძლია ყვავილები უყიდოს საკუთარ თავს. მიუხედავად იმისა, რომ სიმღერა, შესაძლოა, გულგატეხილობაზე, სევდასა და იმედგაცრუებაზე ყოფილიყო, მომღერალმა, ამ გზის არჩევის ნაცვლად, არჩევანი საკუთარი თავისა და სხვა ქალების გაძლიერებასა და მხარდაჭერაზე შეაჩერა და მთელ სამყაროს თვითზრუნვის ახალი ჰიმნი შესთავაზა.
“not_me_though” — Jaboukie
ჯაბუკი იანგ-უაიტი თავის გულშემატკივრებს სხვადასხვა ამპლუაში უნახავთ — ამერიკელმა პერფორმერმა კომიკოსობიდან და მწერლობიდან ჯერ კინოში გადაინაცვლა, ხოლო შემდგომ თავისი სადებიუტო ალბომი “All Who Can’t Hear Must Feel” გამოუშვა.
არტისტის მეოთხე და ერთ-ერთი ყველაზე გამორჩეული სიმღერის “not_me_tho” ვიდეო კლიპი, რომელსაც სამოყვარულო, დაბალი რეზოლუციით გადაღებული კამერის ესთეტიკა აქვს, გვიჩვენებს ნიუ-იორკის ქუჩებში გენერატორზე მომუშავე სარბენ ბილიკზე დამდგარ პერფორმერს, რომელიც თეთრ წინდებსა და შავ ქვედაბოლოში, ქუსლებზე შემდგარი მოძრაობს.
ჯაბუკის ამ სიმღერის ტექსტს ანტიკაპიტალისტური შეგონებებიც ახლავს და გვიყვება, როგორ ცდილობს ყველა “აძვრეს თოკზე”, რაც კაპიტალისტურ სამყაროში, რეალიზებასთან და წარმატების მიღწევასთან არის დაკავშირებული. ჯაბუკი ამბობს, რომ ამ თოკითვე იხრჩობენ ადამიანები თავს და რომ ის თავისუფალი “hoe”-ა, თუმცა ლირიკის ქვეტექსტებს რომ თავი დავანებოთ, ჩათვალეთ, გარანტირებული გაქვთ, რომ სიმღერის მელოდია ბევრი დღის განმავლობაში იცხოვრებს და იტრიალებს თქვენს გონებაში.
“Scream” — Kevin Abstract
სიმღერას, რომელიც კევინ აბსტრაქტის სოლო ალბომიდანაა (“Blanket”), არტისტის მსმენელები ერთგვარ ქვიარ რომანტიკულ ფილმს ადარებენ. სიყვარული, რომელზეც არტისტი მღერის, უსაზღვრო და ძნელად აღმოსაჩენია. მისამღერით მუსიკოსი სვამს კითხვას: “მეტისმეტად მოხუცები ხომ არ ვართ იმისთვის, რომ ახალგაზრდები ვიყოთ?”. ამ კითხვით მას სიმღერის ყველაზე ემოციურ და ღრმა ნაწილში ჩავყავართ.
სწორედ ამ სიმღერაში ავლენს კევინი თავის მუსიკალური დიაპაზონს — გასაოცრად მარტივად იღებს როგორც დაბალ, ასევე, მაღალ ნოტებს და აუდიტორიას უმტკიცებს, რამდენად დინამიკური შეუძლია იყოს. გიტარისა და ფეიერვერკების ხმის ფონზე, ტეხასელი არტისტი მოზარდობის ნოსტალგიით შთაგონებულ ტკბილ-მწარე მომენტების სერიას ჩამოგვითვლის: მათ შორისაა, საბურავებისგან შექმნილი საქანელები და “სუფთა ბიჭები”, რომლებსაც “ათლეტების სუნი აქვთ”. სიმღერის ტექსტი პარტნიორთან კევინის პირველ შეხვედრას უკავშირდება. არტისტი გვყვება, როგორ შეხვდა მას და როგორ გაჩნდა მათ შორის კავშირი პირველივე შეხვედრიდან.
“Fear Evil Like Fire” — Yves Tumor
სიმღერა “Fear Evil Like Fire” ალბომიდან “Praise a Lord Who Chews but Which Does Not Consume; (Or Simply, Hot Between Worlds)” არის. სიმღერის მეშვეობით, ალტერნატიული როკის სუპერვარსკვლავმა ზედმეტი ძალისხმევის გარეშე, სხვადასხვა ჟანრის კომბინაციით, მისი შემოქმედებისთვის ერთ-ერთი ყველაზე დასამახსოვრებელი ნამუშევარი შემოგვთავაზა – სიმღერა დარქ ვეივისა და პოსტ-პანკის ერთგვარი სინთეზია და მსმენელის ყურებსა და გონებას პირველი მოსმენიდან აკავებს. არ გამორიცხოთ, რომ ბევრი დღის განმავლობაში აგეკვიატოთ კიდეც.
დაზუსტებით ძნელია, იცოდეთ, რაზეა ეს სიმღერა, თუმცა ძალიან ცხადი და ხელშესახებია იმ ემოციებისა და განცდების შეგრძნება, რომლებიც მისი მოსმენისას ზღვავდება და სხვადასხვა ადამიანისთვის სხვადასხვა მოგონება ან სურვილი მოაქვს: ზოგისთვის ეს მეოცნებე, სიზმრისმაგვარი კადრებით სავსე მზის ამოსვლა და ზოგისთვისაც კლუბში ყოფნისას თავდავიწყებით ცეკვის ეპიზოდებია.
“Hollywood Baby” by 100 gecs
ლორა ლესისა და დილან ბრედის დუოს მომავლის დუეტადაც მოიხსენიებენ, თუმცა სიმღერას “Hollywood Baby” პოპ-პანკის ნოსტალგიაც მოაქვს, რომელიც მუსიკალური ინდუსტრიაში ბოლო დროს განსაკუთრებით გავრცელდა. ამის ხარისხიანად გაკეთება რთულია, თუმცა, როგორც მუსიკის ექსპერტები აფასებენ, დუეტმა ეს ნამდვილად მოახერხა. ეს ვოკალისტის მღელვარე ხმის, პოპ-პანკ რიფების, მეტალის დასარტყამების მკვეთრი ხმოვანებითა და ამყოლი მელოდიურობითაა გამოწვეული. დუეტის ეს სიმღერა ალბომ “10,000 gecs”-ის ნაწილია.
მნიშვნელოვანია აღინიშნოს ვოკალისტის გენდერული დისფორია, რომლის გავლენითაც ლესი nightcore style-ში მღერას ამჯობინებს, თუმცა ეს მას არ უზღუდავს შესაძლებლობებს. უფრო მეტიც, კვლავ აძლევს საშუალებას, აჩვენოს შესანიშნავი ვოკალური მოდულაცია, როგორც ეს სხვა არაბინარული მუსიკოსების შემთხვევაში ხდება.
დუეტს ქრონიკულად ონლაინ მყოფ ადამიანებს შორის განიხილავენ, რადგან ისინი ინტერნეტ მიმებს მთელი შემოქმედების განმავლობაში რეფერენსებად იყენებდნენ და აუდიტორიისთვის კიდევ უფრო მარტივს ხდიდნენ, დაენახათ, რომ დუოს წევრები სწორედ მათი მსმენელების მსგავსები არიან.
“Contact” — Kelela
სიმღერა მუსიკოსის მსმენელთათვის დიდი ხნის ნანატრი მეორე სტუდიური ალბომის, “Raven”-ის ნაწილია. მუსიკოსის უნიკალურმა ჟღერადობამ, რომელიც ტრადიციული R&B-ის, ფუტურისტულ-ელექტრონული და ალტერნატიული მუსიკის ელემენტებს აერთიანებს და “საზღვრების გამწევად” ხასიათდება, აუდიტორიის აღიარება მალევე დაიმსახურა. Kelela ქმნის იმგვარ მელოდიებს, რომლებიც უცნაურიცაა, მშვიდიც, გამორჩეულიც და ამაღელვებელიც — ამის აღსაწერად იმგვარი ნაცვალსახელების გამოყენება შეგვიძლია, რომელთა კომბინაციაში ყოფნა, ერთი შეხედვით, უცნაურია. ყოველივე ამის გათვალისწინებით, მუსიკოსს ჟანრის პიონერადაც მოიხსენიებენ, რომელიც ცნობილია, როგორც alt-R&B.
მუსიკოსის მეოთხე სიმღერაზე ბევრი შეფასება დაიწერა. მათ შორისაა, ღამეული ელემენტების ერთობლიობა, რომელიც მოიცავს კლუბამდე წასვლისთვის მომზადებას, ე.წ. pregame-ს, რაც უშუალოდ წვეულებაზე მისვლამდე ალკოჰოლის მიღებასა და შესაბამისი განწყობის შექმნას გულისხმობს. ამასთანავე, სიმღერა კლუბის შიდა გარემოსა და იქ აღქმულ დეტალებს გადმოგვცემს: სითბო, რომელიც სხეულებს მყისიერად გვიფარავს, როდესაც გადატვირთულ საცეკვაო ოთახში შევდივართ და კულმინაციური მომენტი, რომელსაც შეყვარებულთან ერთად ცეკვის ეიფორიულ-ფსიქოდელიური შეგრძნებები აგვირგვინებს.
მუსიკოსი და პროდიუსერი გამორჩეულია იმითაც, რომ არაერთხელ დაუსვამს აქცენტები ისეთ მნიშვნელოვან საკითხებზე, როგორებიც მუსიკის ინდუსტრიაში ქვიარ შავკანიან ქალად ყოფნის გამოცდილებებს უკავშირდება.