შინაგან საქმეთა სამინისტრომ ბრიფინგი გამართა იმის სათქმელად, რომ “საკმაოდ ლმობიერები” არიან და ევროპული და ამერიკული სტანდარტით მოქმედებენ. ნათქვამის გასამყარებლად გაავრცელეს ვიდეოებიც, რომლებშიც ასახულია სხვადასხვა ქვეყანაში აქციების დაშლის პროცესი.
“ყველა ქვეყანაში პოლიციას აქვს უფლება კანონის შესაბამისად იმოქმედოს და უფლებამოსილების ფარგლებში, საზოგადოებისთვის ხშირად მიუღებელი და უმკაცრესი ზომები გამოიყენოს. აქვე მინდა აღვნიშნო, რომ ბოლო პერიოდში საქართველოში, კერძოდ თბილისში მიმდინარე შეკრება-მანიფესტაციები არაერთხელ გასცდა შეკრებისა და მანიფესტაციების შესახებ კანონმდებლობით მიღებულ ზომებს. ვნახეთ შტურმი საკანონმდებლო ორგანოზე, პიკეტირების მცდელობა პარლამენტზე და ასევე, ძალადობის არაერთი შემთხვევა სამართალდამცველების მისამართით”, — ნახსენებია განცხადებაში და ნათქვამია ისიც, რომ რუსული კანონის საწინააღმდეგო პროტესტისას “პროპორციული ძალა” გამოიყენეს და “საკმაოდ ლმობიერები” იყვნენ.
შსს გვიმტკიცებს თითქოს, სამართალდამცველების მხრიდან დემონსტრანტების მიმართ ძალის გადამეტებისა და კანონსაწინააღმდეგო ქმედებების შესახებ დეზინფორმაცია ვრცელდება. თუმცა არაერთი კადრი არსებობს, სადაც ჩანს როგორ ურტყამს სპეცრაზმი აქციის მონაწილეებსა და პოლიტიკოსებს.
“გვსურს ხაზგასმით აღვნიშნოთ, რომ პოლიცია შეკრება-მანიფესტაციების დროს, ყოველთვის მოქმედებს საერთაშორისო სტანდარტების მიხედვით. შინაგან საქმეთა სამინისტროში შემუშავებული ინსტრუქციები, რომელიც არეგულირებს შეკრება-მანიფესტაციების მართვას, სრულ შესაბამისობაშია ეუთო/ოდირის სახელმძღვანელო პრინციპებთან. შესაბამისად, სამართალდამცველების მხრიდან სპეციალური ღონისძიებების განხორციელება ხდება საერთაშორისოდ აღიარებული სტანდარტების შესაბამისად-თანმიმდევრულად და განვითარებული მოვლენების საპასუხოდ, ანალოგიურად მოქმედებდა პოლიცია ბოლო პერიოდში მიმდინარე აქციების დროსაც”, — განაცხადეს შსს-ში და ჩამოთვალეს ევროპის ის ქვეყნები, სადაც განსაკუთრებულ დავალებათა დეპარტამენტს სწავლება გაუვლიათ.
განცხადების ბოლოს აღნიშნეს ისიც, რომ აქციებზე “ძალადობრივი ქმედებების აღკვეთისას”, გამოიყენებენ “მკაცრ ზომებს, ისევე, როგორც ამერიკასა და ევროპის წამყვან ქვეყნებშია მიღებული”.
ბოლო კვირების განმავლობაში სამართალდამცავმა უწყებებმა პროტესტის დასაშლელად გამოიყენეს წიწაკის სპრეი, ცრემლსადენი გაზი, წყლის ჭავლი, რეზინის ტყვიები (ფოტოებისა და დაზიანებების ამსახველი მასალების მიუხედავად, რეზინის ტყვიების გამოყენებას უარყოფენ). ხშირად აღნიშნულ ზომებს წინასწარი გაფრთხილების გარეშე იყენებდნენ, თანაც მშვიდობიანი პროტესტისას. აქციებზე დააკავეს ათობით ადამიანი, სცემეს მოქალაქეებს, ჟურნალისტებს, პოლიტიკოსებს.
ამასთან, უცნობი პირები ფიზიკურად უსწორდებიან აქციის მონაწილეებს, გარდა ამისა, დაფარული ნომრებით რეკავენ პროტესტის მონაწილე ადამიანებთან და მათ შეშინებას მუქარითა და გინებით ცდილობენ. დღეს “ქართული ოცნების” თავმჯდომარე შალვა პაპუაშვილმა დააანონსა რეესტრის შექმნაც, სადაც, შესაძლოა, ადამიანები კრიტიკული აზრის გამო აღმოჩნდნენ.