შინაგან საქმეთა სამინისტროს ინფორმაციით, სარეკლამო სააგენტო ლიმონის დირექტორი, გიორგი ოკმელაშვილი დაკავებულია. მას პოლიციელებისთვის იდაყვისა და მუშტის დარტყმას ედავებიან. გამოძიება სისხლის სამართლის კოდექსის 353-ე პრიმა მუხლის პირველი ნაწილით მიმდინარეობს, რაც სამსახურებრივი საქმიანობის შესრულების დროს პოლიციელზე თავდასხმას გულისხმობს და 7 წლამდე ვადით თავისუფლების აღკვეთას ითვალისწინებს.
“გამოძიებით დადგინდა, რომ გ.ო.-მ მიმდინარე წლის 13 მაისს, თბილისში, პარლამენტის მიმდებარე ტერიტორიაზე გამართულ საპროტესტო აქციაზე, ფიზიკური შეურაცხყოფა მიაყენა შინაგან საქმეთა სამინისტროს თანამშრომლებს. კერძოდ, აქციის მიმდინარეობისას, დაკავებულმა იდაყვისა და მუშტის დარტყმით პოლიციის თანამშრომლებს სახის არეში დაზიანებები მიაყენა. ჩატარებული საგამოძიებო მოქმედებების შედეგად, გ.ო. სამართალდამცველებმა თბილისში დააკავეს”, — აცხადებს უწყება.
შსს კვლავ არაფერს ამბობს სააგენტო ლიმონში ჩხრეკის ჩატარების მიზეზებზე, სადაც პოლიცია გადაღების დროს შევიდა და ამ დროს ტერიტორიაზე იმყოფებოდნენ ბავშვებიც.
აღსანიშნავია, რომ რუსული კანონის საპროტესტო აქციების მიმდინარეობისას შსს-ის წარმომადგენლებმა მოქალაქეებზე არაერთხელ იძალადეს. არსებობს კადრებიც, სადაც ჩანს, როგორ უსწორდებიან მათ ფიზიკურად. გარდა ამისა, უცნობი პირები ფიზიკურად გაუსწორდნენ არაერთ აქტივისტს, პოლიტიკოსს, აქციის მონაწილეს. არც ერთ ამ საქმეზე ამ დრომდე არავინ დაუკავებიათ.