შვილების თანდასწრებით ოჯახში ძალადობაში ბრალდებული შსს-ს თანამშრომელი დაკავებული არ არის
სპეციალური საგამოძიებო სამსახურის ინფორმაციით, არასრულწლოვანის თანდასწრებით ოჯახში ძალადობისა და მუქარის ფაქტებზე, მხილებულია შინაგან საქმეთა სამინისტროს განსაკუთრებულ დავალებათა დეპარტამენტის თანამშრომელი ა.ბ. როგორც უწყებაში მედია აპრილს განუცხადეს, ბრალდებული დაკავებული არ არის. მიზეზების შესახებ განმარტებას საგამოძიებო სამსახურში ამ დროისთვის არ აკეთებენ.
უწყების ინფორმაციით, გამოძიებით დადგინდა, რომ კაცი, არასრულწლოვანი შვილების თანდასწრებით, 2023 და 2024 წლებში, ცოლზე ფიზიკურად ძალადობდა და მას სიცოცხლის მოსპობითა და ქონების განადგურებით ემუქრებოდა.
“2023 წლის ოქტომბრისა და დეკემბრის თვეში, ბრალდებულმა თავის მეუღლესთან ურთიერთშელაპარაკებისას, არასრულწლოვანი შვილების თანდასწრებით, მასზე ფიზიკურად რამდენჯერმე იძალადა და სხეულის სხვადასხვა არეში დაზიანებები მიაყენა. 2024 წლის თებერვალში, ბრალდებული მეუღლეს სოციალურ ქსელ Facebook-ით კომუნიკაციისას, სახლის დაწვით და სიცოცხლის მოსპობით დაემუქრა”, — აღნიშნულია სპეციალური საგამოძიებო სამსახურის მიერ გავრცელებულ განცხადებაში.
უწყებაში აცხადებენ, რომ დაზარალებულის მიმართვისთანავე, გადაუდებელი საგამოძიებო მოქმედებები ჩაატარეს და მოიპოვეს მტკიცებულებები, რის შემდეგაც, საქართველოს პროკურატურის მიერ გამოტანილი დადგენილების საფუძველზე, კაცს ბრალი წარუდგინეს საქართველოს სისხლის სამართლის კოდექსის 126-ე პრიმა მუხლის მე-2 ნაწილის “ბ” ქვეპუნქტით და 11 პრიმა 151-ე მუხლის მე-2 ნაწილის “დ” ქვეპუნქტით. ეს მუხლები გულისხმობს არასრულწლოვანის თანდასწრებით ოჯახში ძალადობასა და ოჯახის წევრის მიმართ სიცოცხლის მოსპობისა და ქონების განადგურების მუქარას. სპეციალური საგამოძიებო სამსახურის ინფორმაციით, საქმეზე გამოძიება გრძელდება.