წინააღმდეგობას მრავალი ფორმა აქვს და, შეიძლება ითქვას, რომ ერთ-ერთი ყველაზე საინტერესოა წინააღმდეგობა ხელოვნებაში. თავის მხრივ, ხელოვნებაც მრავალი სახის არსებობს, განსაკუთრებით, ინტერნეტისა და ტექნოლოგიების ეპოქაში. ხანდახან სოციალურ ქსელში გავრცელებული ერთ ილუსტრაცია ისეთი შთაგონების წყარო ხდება, რომ შეუძლია ადამიანების ცხოვრება შეცვალოს.
იმისთვის, რომ შექმნა კარგი ნამუშევარი, რომლითაც სათქმელის გადმოცემასა და კონკრეტულ აუდიტორიასთან მიტანას შეძლებ, მხოლოდ ხედვა და ფანტაზია შეიძლება საკმარისი არ იყოს. გარდა პროფესიული ცოდნისა, მნიშვნელოვანია, შენ ირგვლივ მიმდინარე ამბები იცოდე, ასევე, მუდმივად თვალს ადევნებდე სიახლეებს შენს სფეროში და კომუნიკაცია გქონდეს სხვა პროფესიონალებთან.
“შემოქმედებით წინააღმდეგობაში” — ასე ჰქვია დიზაინის ფესტივალს, რომელიც 16 მაისს გაიმართა. ღონისძიება AD Black Sea გუნდის მიერ არის ორგანიზებული და ის წელს განსხვავებული ფორმატით ვიხილეთ. ორგანიზატორების თქმით, ეს გადაწყვეტილება ქვეყანაში არსებული სოციალური და პოლიტიკური მდგომარეობისა გამო მიიღეს. მთავარი იდეის გარშემო გაერთიანდნენ სტუდენტები, დამწყები და გამოცდილი დიზაინერები, ილუსტრატორები, კრეატიული ინდუსტრიის წარმომადგენლები.
ლექცია-სემინარები, პანელური დისკუსიები, ადგილობრივი და უცხოელი წამყვანი დიზაინერებისა და ილუსტრატორების ვორკშოპები, ასევე, ადგილზე შესრულებული დავალებები და ბევრი მსჯელობა — ეს არის 2025 წლის თბილისის დიზაინის ფესტივალის მოკლე მიმოხილვა, რომელიც რამდენიმე სხვადასხვა ფორმატს აერთიანებდა. დაინტერესებულ ადამიანებს მათთვის სასურველ აქტივობაში შეეძლოთ მონაწილეობა.
პანელურ დისკუსიაზე სხვადასხვა სფეროს წარმომადგენელმა სპიკერებმა აუდიტორიასთან ისაუბრეს ისეთ საკითხებზე, როგორებიცაა საბჭოთა არქიტექტურა, ფოტოგრაფიის მნიშვნელობა, ბრენდინგი, სოციალური დიზაინი და სხვა.
აღსანიშნავია ისიც, რომ პარალელურად მიმდინარე რამდენიმე ვორქშოპზე მონაწილეებმა პრაქტიკული დავალებებიც შეასრულეს, რომლის ფარგლებშიც, ლოგოები, სიმბოლოები, ბრენდინგი, სტრატეგიები, წიგნის ილუსტრაციები, ტოპოგრაფიები და პოსტერები შექმნეს.
მონაწილეებს საშუალება მიეცათ, გაეცნოთ ამ სფეროში მომუშავე და უკვე წარმატებული პროფესიონალები და მათი ცოდნა და გამოცდილება გაეზიარებინათ.
წინა წლისგან განსხვავებით, ფესტივალი ნაკლებად მასშტაბური იყო და ძირითადი აქცენტი საგანმანათლებლო აქტივობებზე გაკეთდა. დასწრება მსურველებს უფასოდ, მხოლოდ წინასწარი რეგისტრაციის საფუძველზე შეეძლოთ.
“თუ ბათუმის კრეატივის ფესტივალი უფრო ფართოა და კრეატივის ძალიან ბევრ ასპექტს მოიცავს, გვინდოდა, ეს კონკრეტული ყოფილიყო უფრო მეტად დიზაინზე ფოკუსირებული, რომელიც, ასევე, თავის მხრივ, ძალიან ფართო და დიდი ინდუსტრიაა და ვფიქრობთ, რომ საქართველოში საჭიროა ბევრი ასეთი ღონისძიება, რათა ქართველი დიზაინერები უკეთესი პროფესიონალები გახდნენ, მეტი ისწავლონ, მეტი შთაგონება მიიღონ”, — ამბობს მედია აპრილთან ფესტივალის აღმასრულებელი დირექტორი თამარ ცინცაძე.
გასულ წელს ფესტივალზე მოწვეული იყო ავსტრიელი გრაფიკული დიზაინერი სტეფან ზაგმაისტერი. სტეფან ზაგმაისტერი დიზაინის თითქმის ყველა მნიშვნელოვანი საერთაშორისო ჯილდოს მფლობელი, TED-ის ერთ-ერთი ყველაზე ხშირად მიწვეული სპიკერი, ბესტსელერი ავტორი და თანამედროვე დიზაინის ერთ-ერთი ყველაზე საკულტო ფიგურაა.
წელს კი პლატფორმა ქართველ და პოლონელ პროფესიონალებს დაეთმოთ.
“შარშან ჩვენი ღონისძიება დაემთხვა რუსული კანონის აქციებს და მაგ ტალღაზე გადავიდა. წელსაც, პრინციპში, იმავე რეალობაში ვართ. ჩვენი ფესტივალი ყოველთვის ემსახურებოდა და მოემსახურება მომავალშიც საქართველოს კრეატიული ინდუსტრიის განვითარებას და ჩვენთვის მნიშვნელოვანია, რომ დასავლური ღირებულებები და თავისუფლება, როგორც ამ ინდუსტრიაში, ისე ქვეყანაში იყოს დაცული და ჩვენ ჩვენი პროფესიით რისი გაკეთებაც შეგვიძლია, ამას ვაკეთებთ ყოველთვის. წლევანდელი დიზაინის ფესტივალი, სამწუხაროდ, ისეთი მასშტაბური ვერ გამოგვივიდა, ზუსტად იმავე მიზეზების გამო, რაც ქვეყანაში მიმდინარე მოვლენებს უკავშირდება, თუმცა გადავწყვიტეთ, რომ მაინც გაგვეკეთებინა აქტივობების სერია, რომელიც ქართულ დიზაინ კომუნას მისცემდა შთაგონების წყაროს და პროფესიული ზრდის შესაძლებლობას”, — აღნიშნავს თამარ ცინცაძე.
თამარი ხაზს უსვამს, რომ პოლონეთი, ზოგადად, დიზაინის სკოლითა და ძალიან ძლიერი პროფესიონალებით გამოირჩევა. ვორქშოპები და სხვადასხვა აქტივობაც სწორედ პოლონური გრაფიკული დიზაინის ასოციაციასთან თანამშრომლობით დაიგეგმა.
“ყველა სხვა AD Black Sea-ის ღონისძიებისგან განსხვავებით, წლევანდელი უფასო იყო, რადგან ჩვენთვის ძალიან მნიშვნელოვანი იყო, რომ ასეთ რთულ დროს, როცა სხვა პრიორიტეტი და საფიქრალი აქვს ხალხს, მიგვეცა შესაძლებლობა, საიდანღაც მაინც აეღოთ შთაგონების წყარო და ამიტომ მივიღეთ ეს გადაწყვეტილება”, — ამბობს თამარი.
ფესტივალზევე დაანონსდა დიზაინ პროექტი “დიზაინერები კრეატიულ წინააღმდეგობაში”, რომელიც პირველ ივლისს გაიმართება. მას კურატორობას ერთ-ერთი ყველაზე გავლენიანი გრაფიკული დიზაინერი — პოლა შერი გაუწევს.