პრემიერმინისტრმა, ირაკლი ღარიბაშვილმა ევროკავშირის კანდიდატი ქვეყნის სტატუსის მინიჭება თავდაპირველად ქვეყანას ფეისბუქპოსტზე ერთი სიტყვით მიულოცა, რის შემდეგაც ბრიფინგი გამართა და ვრცლად ისაუბრა. მილოცვების სიაში აღმოჩნდა ქართველი ხალხი და მმართველი გუნდი. ტრადიციულად, ღარიბაშვილს არ დავიწყებია პარტიის დამფუძნებელი ბიძინა ივანიშვილი.
“თანამემამულენო, დიდი სიამაყით და სიხარულით გილოცავთ ისტორიულ გადაწყვეტილებას. საქართველო გახდა ევროკავშირის წევრობის კანდიდატის ქვეყანა. გილოცავთ ყველას.
მე მინდა თითოეულ მოქალაქეს მოგილოცოთ ისტორიული დღე. ეს ნამდვილად არის ჩვენი ქვეყნის და ჩვენი ხალხის გამარჯვება. ეს ნამდვილად არის ღირსეულად მოპოვებული დამსახურებული სტატუსი, რომელიც ჩვენ ხელისუფლებამ, ჩვენს ხალხთან ერთად და ჩვენი ხალხისთვის მოიპოვა. ჩვენ ვიბრძოლეთ, ჩვენ გავიმარჯვეთ”, — ასე დაიწყო სიტყვით გამოსვლა ღარიბაშვილმა და პარტნიორებისადმი მადლიერებით გააგრძელა.
მან პერსონალური მადლობა გადაუხადა ევროკომისიის პრეზიდენტს, ურსულა ფონ დერ ლაიენს და ევროპული საბჭოს პრეზიდენტს, შარლ მიშელს. თან იქვე დააყოლა, რომ მიშელმა პირადად დაურეკა და მიულოცა ეს ისტორიული დღე და ქართველი ხალხისადმი მილოცვაც დააბარა. მადლობების სიაში მოხვდა ევროკომისარი ოლივერ ვარჰეი და 27 ქვეყნის ლიდერები.
მალევე პრემიერი მილოცვებს დაუბრუნდა და განსაკუთრებულად მიულოცა ეს გადაწყვეტილება პარტიას და მთავრობის თითოეულ წევრს, პარლამენტს, საჯარო მოხელეებს. რის შემდეგაც პარტიის დამფუძნებელზე, ბიძინა ივანიშვილზე გადავიდა.
“მე მინდა მივულოცო ჩვენი პარტიის დამფუძნებელს, ბატონ ბიძინა ივანიშვილს, რომლის მმართველობამაც მოიტანა სწორედ დღევანდელი დღე და ეს გამარჯვება და ეს წარმატება. 2012 წლიდან მოყოლებული ჩვენმა პოლიტიკურმა გუნდმა მიაღწია მაქსიმუმს და შეიძლება ითქვას, დღევანდელი დღე არის ერთგვარი დაგვირგვინება ჩვენი წარმატებული მმართველობისა”, — განაცხადა ღარიბაშვილმა.
დასასრულს პრემიერმა თქვა, რომ ხვალ, 15 დეკემბერს, 5 საათზე თავისუფლების მოედანზე საზეიმო ღონისძიებები გაიმართება.
ამავე თემაზე: