ლოს-ანჯელესში ყოველწლიური მუსიკალური პრემიის, Grammy-ის 68-ე ცერემონია გაიმართა.
წლის საუკეთესო პოპ ვოკალური ალბომის ნომინაციაში გამარჯვება მოიპოვა მომღერალმა, ლედი გაგამ, ალბომისთვის — MAYHEM. ამ ალბომის ერთ-ერთი სიმღერა Abracadabra ერთგვარ ჰიტად იქცა ქვიარ თემისთვის და არამარტო.
წლის საუკეთესო სიმღერისთვის კი პრიზი ბილი აილიშმა დაიმსახურა კომპოზიციისთვის — Wildflower. ორივე მათგანი ღიად ქვიარი არტისტია და აქტიურად უჭერენ მხარს LGBTQIA+ ადამიანების უფლებებს.
გამარჯვების შემდეგ, ლედი გაგამ ქალ არტისტებს მიმართა:
“მუსიკოსი ქალებისთვის მინდა ვთქვა — ვიცი, ზოგჯერ, როცა სტუდიაში ბევრ კაცთან ერთად ხარ, ეს შეიძლება რთული იყოს. ამიტომ, მოგიწოდებთ, ყოველთვის მოუსმინოთ საკუთარ თავს და ყოველთვის იბრძოლოთ საკუთარი იდეებისთვის, იბრძოლოთ თქვენი სიმღერებისთვის, იბრძოლოთ საკუთარი თავისთვის, როგორც პროდიუსერებისთვის. დარწმუნდით, რომ თქვენი ხმა მკაფიოდ ესმით”.
ნომინაციაში საუკეთესო R&B შესრულება ჯილდო მიიღო 30 წლის ქვიარ არტისტმა, კელანმა (Kehlani), სიმღერისთვის — Folded.
წლის საუკეთესო არტისტად დასახელდა ოლივია დინი, ხოლო წლის საუკეთესო ჩანაწერის ნომინაციაში გამარჯვებულები გახდნენ რეპერი კენდრიკ ლამარი და მომღერალი SZA კომპოზიციისთვის — Luther.
წლევანდელი დაჯილდოების მნიშვნელოვანი ნაწილი იყო პროტესტი — არტისტები ღონისძიებაზე გულსაბნევებით გამოჩნდნენ, სადაც ეწერა: ICE out (ICE წადი). ამით მათ ამერიკის შეერთებული შტატების იმიგრაციის პოლიტიკა და საიმიგრაციო და საბაჟო სამსახურის (ICE-ის) ძალადობრივი რეიდები გააპროტესტეს. ამ რეიდების ფარგლებში, სამსახურის ფედერალურმა აგენტებმა ორი ადამიანი მოკლეს.
ზოგიერთმა მათგანმა პროტესტის საკუთარ გამოსვლაშიც დააფიქსირა. მაგალითად, გამარჯვების შემდეგ, მომღერალმა ოლივია დინმა თქვა:
“მე აქ ვარ, როგორც ემიგრანტის შვილიშვილი. მე ვარ გამბედაობის შედეგი და ვფიქრობ, რომ ეს ადამიანები იმსახურებენ დაფასებას. ჩვენ არაფერი ვართ ერთმანეთის გარეშე.”
ICE-ის ძალადობრივ ქმედებებზე ისაუბრა მომღერალმა ბილი აილიშმაც.
“მოპარულ მიწაზე არავინაა უკანონოდ. ახლა ძალიან რთულია, იცოდე, რა თქვა და რა გააკეთო. ამ ოთახში ძალიან იმედიანად ვგრძნობ თავს და მგონია, რომ უბრალოდ უნდა გავაგრძელოთ ბრძოლა, ხმის ამაღლება და პროტესტი — ჩვენი ხმები ნამდვილად მნიშვნელოვანია, ხალხი მნიშვნელოვანია და F*ck ICE, ეს არის, რაც მინდოდა, მეთქვა”.
Kehlan-მა გამარჯვების შემდეგ დარბაზში შეკრებილებს მიმართა და უთხრა, რომ ერთად უფრო ძლიერები არიან მსოფლიოში მიმდინარე უსამართლობის წინააღმდეგ. მან იმედი გამოთქვა, რომ ხელოვანები გაერთიანდებიან და ერთად ხმამაღლა გააპროტესტებენ მიმდინარე მოვლენებს. გამოსვლა კი ასე დაასრულა: F*ck ICE.
აშშ-ის საიმიგრაციო პოლიტიკა გააკრიტიკა საკუთარ გამოსვლაში კიდევ ერთმა გამარჯვებულმა, პუერტო-რიკოელმა რეპერმა, Bad Bunny (ბედ ბანი). “ICE out” – თქვა არტისტმა პრიზის მიღების შემდეგ, რასაც დარბაზში ოვაციებით შეხვდნენ. ბანი პირველი არტისტია, რომელმაც ჯილდო მთლიანად უცხო ენაზე, ესპანურენოვანი სიმღერებით შექმნილი ალბომისთვის დაიმსახურა.
Grammy-ის დაჯილდოება 1959 წლიდან ყოველწლიურად იმართება და ის არამხოლოდ მუსიკალური ღონისძიებაა, არამედ მნიშვნელოვან კულტურულ მოვლენადაც ითვლება.