სპეციალური საგამოძიებო სამსახური აგრძელებს გამოძიებას მარტში დაკავებული 43 წლის კაცის, გ.ქ.-ის საქმეზე. კაცს, რომელსაც, უწყების ინფორმაციით, 200-მდე ქალის 5000-ზე მეტი ინტიმური შინაარსის ფოტო და ვიდეო მასალა ჰქონდა, ბრალდება პირადი ცხოვრების საიდუმლოს ხელყოფის, ასევე, სექსუალური ხასიათის სხვაგვარი ქმედების იძულების დამატებით 11 ეპიზოდზე წარედგინა.
სპეციალური საგამოძიებო სამსახურის ინფორმაციით, კაცი, რომელიც ქალებს “ნუკრი ჯაოშვილის” სახელით ეცნობოდა, ბინაში მოტყუებით მიყვანილ დაზარალებულებთან ე.წ. საცდელ ფოტოსესიას აწყობდა, რა გზითაც მოტყუებით მოიპოვებდა მათ ინტიმური შინაარსის ფოტო-ვიდეო ფაილებს, შემდეგ კი ცდილობდა კომუნიკაციის გაგრძელებას და, რიგ შემთხვევებში, პირადი ცხოვრების საიდუმლოს ამსახველი ინტიმური ფოტოების გავრცელების მუქარით, აიძულებდა სქესობრივი კავშირის დამყარებას.
“ბრალდებული, ასევე, დაზარალებულებს სასმელში გაურკვეველ ნივთიერებას უყრიდა და უმწეო მდგომარეობაში მყოფ მსხვერპლებთან სქესობრივ კავშირს ამყარებდა, რა დროსაც იგი ფარულად, უკანონოდ ახდენდა დაზარალებულებთან სქესობრივი კავშირის ვიდეო გადაღებას და დაარქივებას”, — აღნიშნავენ უწყებაში.
მათივე ინფორმაციით, გამოძიების მიერ შესწავლილ კომპიუტერულ მოწყობილობებში არსებული ელექტრონული ინფორმაციის, მათ შორის, ფოტო/ვიდეო მასალის, ბრალდებულსა და დაზარალებულებს შორის არსებული მიმოწერების და ჩატარებული სხვა საგამოძიებო მოქმედებების შედეგად იდენტიფიცირდა 11 დაზარალებული, რის შედეგადაც მოპოვებული მტკიცებულებების საფუძველზე საქართველოს პროკურატურის მიერ გამოტანილი დადგენილებით, კაცს ბრალდება პირადი ცხოვრების საიდუმლოს ხელყოფის, ასევე, სექსუალური ხასიათის სხვაგვარი ქმედების იძულების დამატებით 11 ეპიზოდზე წარედგინა.
სპეციალურმა საგამოძიებო სამსახურმა გ.ქ. 2024 წლის 22 მარტს დააკავა. უწყების ინფორმაციით, გამოძიებამ დაადგინა, რომ კაცი ინტერნეტ სივრცეში, მათ შორის Facebook-ის სხვადასხვა ჯგუფში, ყალბი გვერდების გამოყენებით ანაზღაურების სანაცვლოდ ახალგაზრდა გოგოებს იწვევდა ქალის თეთრეულის სარეკლამო ფოტოსესიისთვის, დაინტერესებულ პირებს ეცნობოდა სააგენტოს ფოტოგრაფად, ყალბი სახელითა და გვარით “ნუკრი ჯიოშვილი” და საკუთარ ბინაში ფოტოსესიებს უწყობდა, რა დროსაც ინტიმური შინაარსის ფოტოებს უღებდა. ერთ-ერთ შემთხვევაში მან ამ გზით უკანონოდ მოიპოვა 19 წლის გოგოს ფოტოები, რის შემდეგაც ამ მასალის გავრცელებით ემუქრებოდა, თუ გოგო არ შეასრულებდა მის მოთხოვნებს — არ შეხვდებოდა, სქესობრივ კავშირს არ დაამყარებდა და ახალ ინტიმური შინაარსის ფოტო/ვიდეო მასალას არ გადაუგზავნიდა. უარის შემდეგ კი ფეისბუქის ერთ-ერთ ყალბ პროფილზე 19 წლის გოგოსთვის გადაღებული ერთ-ერთი ფოტო და გააგრძელა მუქარა.
საგამოძიებო სამსახურის ცნობით, უწყებამ გამოძიება დაზარალებულის მიმართვის საფუძველზე, პროკურატურასთან თანამშრომლობით ჩაატარა. ბრალდებული კაცის ჩხრეკის შედეგად ამოღებულია 200-მდე ქალის 5000-ზე მეტი ინტიმური შინაარსის ფოტო და ვიდეო მასალა, მათ შორის ფარულად გადაღებული ვიდეოკადრები, რომელსაც კაცი წლების განმავლობაში უკანონოდ მოიპოვებდა. გარდა ამისა, მისი მობილური ტელეფონის შესწავლის შედეგად, აღმოაჩინეს სხვა დაზარალებული ქალების მიმართ ინტიმური შინაარსის სურათების გავრცელების მუქარის და შანტაჟის შემცველი მესიჯებიც.
სპეციალურ საგამოძიებო სამსახურში აცხადებენ, რომ საქმეზე გრძელდება გამოძიება, რომლის ფარგლებშიც ყველა მსხვერპლის შემთხვევა იქნება შესწავლილი და მათი უფლებები დაცული.
იმ შემთხვევაში, თუ ხართ დაზარალებული ან გაქვთ ინფორმაცია ამ დანაშაულის შესახებ, უწყებას შეგიძლიათ მიმართოთ ცხელ ხაზზე — 199. განცხადებით მიმართვა შესაძლებელია სპეციალური საგამოძიებო სამსახურის ცენტრალურ და რეგიონულ ოფისებში:
- თბილისში (მ. ასათიანის ქ. №9);
- თელავში (მის: ერეკლე II-ის გამზირი, №16);
- ქუთაისში (მის: ი. აბაშიძის გამზირი N 22);
- ზუგდიდში (მის: კოსტავას ქ. N 58);
- ბათუმში (მის: გ. მაზნიაშვილის ქ N 54).