ტელეკომპანია ფორმულას ინფორმაციით, მათ ჟურნალისტს, ია სართანიას მეტროში თავს დაესხნენ.
ჟურნალისტი ჰყვება, რომ კაცი მას ჯერ ფიზიკურად რამდენჯერმე შეეხო, შემდეგ კი ხელი ჰკრა, სიტყვიერი შეურაცხყოფა მიაყენა და აგინებდა. ია სართანიას თქმით, კაცი ტატუებზე მიუთითებდა და ჰომოფობიურ ლექსიკით მიმართავდა.
შეგახსენებთ, რომ, ბოლო პერიოდში, ეს ჟურნალისტებზე თავდასხმის პირველი შემთხვევა არ არის. რუსული კანონის საპროტესტო აქციაზე სპეცრაზმი მედია აპრილის ჟურნალისტს, გიორგი ბასხაჯაურს დაესხა თავს.
ბასხაჯაურის თქმით, მას სამართალდამცავებმა სცემეს და ჰომოფობიური ნიშნით “პიდარასტს“ ეძახდნენ. მას ცხვირის ხაზოვანი მოტეხილობა აქვს, რის გამოც სამედიცინო ჩარევა დასჭირდა. გარდა ამისა, ექიმის თქმით, გიორგი ბასხაჯაურს აქვს მრავლობითი სისხლჩაქცევები.
ბასხაჯაურის გარდა, სპეცრაზმი ფიზიკურად გაუსწორდა კიდევ 2 გამოცემის, პუბლიკასა და ტაბულას ჟურნალისტებს, ალექსანდრე ქეშელაშვილსა და გიორგი ბადრიძეს.