სტიქიის ზონებიდან ხალხი დახმარებას ითხოვს — ბოლო ინფორმაცია გურიიდან და აჭარიდან

გურიასა და აჭარაში, სადაც დიდთოვლობის გამო რამდენიმე სოფელი გარესამყაროსაა მოწყვეტილი, კვლავ რთული ვითარებაა. ვრცელდება ინფორმაცია დაღუპულებსა და დაშავებულებზე, მოსახლეობა დახმარებას ითხოვს. ზოგიერთი სოფლის მაცხოვრებლები ამბობენ, რომ ისევ საკვების, წყლის, მედიკამენტებისა და ელექტროენერგიის გარეშე არიან.

მოქალაქეები წერენ, რომ სტიქიის პროგნოზირება შესაძლებელი იყო და უწყებების გულგრილობასა და უმოქმედობაზე მიუთითებენ. სტიქიის შედეგად დაშავებულთა დასახმარებლად, თვითორგანიზებით შეიქმნა ჯგუფი “მოხალისეები გურიისთვის”, სადაც ეძებენ გზებს, ადამიანების დასახმარებლად და ცვლიან ინფორმაციებს ადგილზე არსებული მდგომარეობაზე.

ამავე ჯგუფში არ წყდება იმ ადამიანების პოსტები, ვინც დახმარებას ითხოვს. არაერთმა დაწერა, რომ ვერ უკავშირდებიან ოჯახის წევრებსა და ახლობლებს, რომლებიც სხვადასხვა სოფელში არიან ჩარჩენილები.

"არავინაა.. გავგიჟდიი 2 ბავშვით მარტო ვარ სახლშიი.. სახლი უკვე დაწეულია, ცალი კედელი გაიღუნა გადავირიე რაარის ეს ვინმემ მოგვეშველეთ არც გზაა არც დენია აწი ტელეფონებიც გაგვეთიშება... დახმარებასაც ვეღარ ვითხოვთ", — წერს ლიკა მამალაძე.

ბოლო მონაცემებით, მოხალისეებმა მისი მისამართი გაარკვიეს და დახმარებას ცდილობენ. მოქალაქეები ასევე ავრცელებენ ინფორმაციას თავიანთი ახლობლების ბოლო ადგილსამყოფელზე, რომელთანაც დაკავშირებას ცდილობენ.

"მეგობრებო, ჩემი მეგობრის მამა არის რეინჯერი და ჩარჩა მთაში, ქობულეთის მუნიციპალიტეტში, კინტრიშის ნაკრძალის ტერიტორიაზე, სოფელი ცხემვანში. არც შუქი აქვს, ტელეფონიც დაუჯდა. რაციით ბოლოს გუშინ წინ დაუკავშირდნენ და ამის მერე კონტაქტზე არ გასულა არავინ. ჩამოყვანას ეცადნენ მაგრამ უშედეგოთ (ტექნიკა არ არის შესაბამისი ალბათ). რითი შეგვიძლია დავეხმაროთ? თოვლმავალებით შესაძლოა წესით გამოყვანა", — წერს ნიკა ჩხატარაშვილი.

არაერთი ინფორმაცია გავრცელდა სახურავების ჩამონგრევის საშიშროებაზეც, რადგან გადათოვლა არ შეუძლიათ. ზოგიერთ ადგილობრივს საკუთარ ეზოში გასვლა და ჭიშკრამდე გზის გაკვალვაც უჭირს თოვლის საფარის გამო.

 "გთხოვთ, დამეხმაროთ სახლის გადათოლვაში სოფ. გომი ვარ მარტო სახლი ჩამოინგრევა სავარაუდოდ მალე", — წერს ჯგუფის კიდევ ერთი წევრი.

“სიკეთის ქალაქმა” ამავე ჯგუფში დაწერა, რომ ოზურგეთის რაიონის სოფელ ზედა ბახვში მესამე დღეა ვერ უკავშირდებიან 80 წლის ქალს, რომელიც სახლში სამ მცირეწლოვან ბავშვთან ერთად ცხოვრობს. კომენტარებში მოქალაქეებმა აღნიშნეს, რომ მეზობლებმა მათი ნახვა შეძლეს, დაკავშირება კი ელექტროენერგიის არქონია გამოა შეუძლებელია. ამ ეტაპზე ინფორმაციის დაზუსტება ვერ ხერხდება.

"მესამე დღეა ვერ ვუკავშირდებით. 80 წლის ბებიას სამი ობოლი ბავშვი ჰყავს... მესამე დღეა კავშირი აღარ მაქვს... სახლი უკანა მხარეს ავარიულია... სახლის ფანჯრები ქალს თოკით ჰქონდა საწოლზე გამობმული ისე აკავებდა... ძალიან გთხოვთ იქნებ მოხერხდეს ამ ბებოს და ბავშვების დახმარება. გულიკო დოლიძე. ოზურგეთის რაიონის სოფელი ზედა ბახვი... მშვიდობაური ჰქვია იმ დასახლებას..."

კიდევ ერთი მოქალაქე მაიკო კაჭკაჭიშვილი წერს, რომ სოფელ ფამფალეთში, თიხნარის დასახლებაში სახლში, რომელსაც ავარიული სახურავი აქვს, ჩაკეტილია მისი ოჯახის წევრი და დახმარებას ითხოვს.

"მიშველეთ!!! ბიძაჩემი არის სახლში ჩაკეტილი რომელსაც ავარიული სახურავი აქვს იმხელა თოვლი ადევს რომ ყოველ წუთს შეიძლება ჩამოინგრეს ცალი ფეხი არ აქვს და ეზოშიც ვერ გადის!! მეზობლებიც ვერ ეხმარებიან!!! აქედან ვერ ჩავდივართ გადაკეტილია გზა!! ველაპარაკე გამგებელს და ფეხებზე დამიკიდა... ბათუმის მერიაშიც ვთხოვე მაგრამ რეაგირება არ მოხდა!! რა გავაკეთო დამეხმარეთ!!! ოზურგეთის რაიონი სოფელი ფამფალეთი თიხნარას დასახლება კაკო ინწკირველი! ასე ბედის ანაბარა ადამიანების დატოვება რომელ ქვეყანაშია კიდევ?"

გუშინ, 24 თებერვალს გავრცელდა ინფორმაცია, რომ გურიის ერთ-ერთ სოფელში ადამიანი დაიღუპა, რაც დღეს რწმუნებულმა დაადასტურა. ასევე, დღეს გავრცელდა ინფორმაცია, რომ გურიის სოფელ ჯაფარეულში დაიღუპა ქალი, რომელიც ასაკოვან დედას უვლიდა. ინფორმაცია ნეტგაზეთს ნატანების თემში ოზურგეთის მერის წარმომადგენელმა, ვალერიან ვაჩეიშვილმა დაუდასტურა.

მოქალაქეების დასახმარებლად მოხელისეთა ჯგუფის შექმნის გარდა, თანხის შეგროვებაც დაიწყეს. ბოლო ინფორმაციით, რომელიც ჟურნალისტმა, ნანუკა ჟორჟოლიანმა რამდენიმე საათის წინ გაავრცელა, “ნანუკას ფონდში” გურიის ანგარიშზე შეგროვებულია 82 988 ლარი.

გურიასა და აჭარაში არსებულ ვითარებაზე ინფორმაციის მიღება ძირითადად ფეისბუქგვერდებზე ადგილობრივი წარმომადგენლობების მიერ გავრცელებული ინფრომაციითაა შესაძლებელი. დღეს ირაკლი კობახიძემ ამ საკითხზე ჟურნალისტების კითხვებს არ უპასუხა.

ლანჩხუთის მერიის ფეისბუქგვერდზე წერენ, რომ ამ დრომდე ელექტროენერგია არ მიეწოდება მამათის, აკეთის, ჭანჭათის, ჩონჩხათის, ღრმაღელის, ორაგვისა და არჩეულის მოსახლეობას. ასევე, აღნიშნავენ, რომ ცენტრალური გზები მაღალი გამავლობის მანქანებისთვის იწმინდება და ტექნიკა მუშაობს აცანა-მამათის, ორმეთის, ლესა-გულიანის, ჩონჩხათის, ქალაქის, ჩიბათის, შუხუთისა და სუფსის მიმართულებით.

“შექმნილია საგანგებო შტაბი, რომელიც 24-საათიან რეჟიმში მუშაობს. ამოქმედებულია ცხელი ხაზი და საჭიროების შემთხვევაში შეგიძლიათ დარეკოთ: 599 111 437; 591 19 23 66; 599 05 87 00“, — წერია განცხადებაში.

რაც შეეხება აჭარას, რამდენიმე საათის წინ გავრცელდა ინფორმაცია, რომ ქობულეთის მუნიციპალიტეტის სოფელ ხუცუბანში გარდაცვლილი იპოვეს 50 წლის კაცი, რომელიც თოვლში იყო ჩავარდნილი. ინფორმაცია მედია აპრილს ქობულეთის მერიის საზოგადოებასთან ურთიერთობის სამსახურში დაუდასტურეს.

“სახლიდან გვიანობამდე იყო გასული. რომ არ დაბრუნდა, იფიქრეს, სადაც იყო წასული, იქ დარჩა. სამწუხაროდ, დიდთოვლობის გამო ელექტროენერგიაზე შეზღუდვა გვაქვს რიგ სოფლებში და შესაბამისად, ვერ დაუკავშირდნენ. დილით იპოვეს გარდაცვლილი”, — განუცხადეს მედია აპრილს.

დღეს გავრცელდა ინფორმაცია, რომ ბათუმში, გამსახურდიას #11-ში კულტურული მემკვიდრეობის დაცვის ზონაში, ორსართულიანი ისტორიული სახლი ჩამოინგრა.

დიდთოვლობის გამო საქართველოს რკინიგზამ კიდევ რამდენიმე რეისი გააუქმა, კერძოდ: 

მიმდინარე მოვლენებს დღეს გამოეხმაურა სახალხო დამცველის აპარატი. განცხადებაში აღნიშნულია, რომ გურიასა და სხვა რეგიონებში დიდთოვლობით გამოწვეულმა მძიმე პრობლემებმა კიდევ ერთხელ გამოავლინა სტიქიურ მოვლენებთან დაკავშირებით, პრევენციული და შემდგომი ღონისძიებების არაეფექტიანობა.

“აღნიშნული პირდაპირ უკავშირდება ადამიანის სიცოცხლის, ჯანმრთელობის, უსაფრთხო გარემოში ცხოვრებისა და საკუთრების უფლებების დაცვის ინტერესებს და მათ დაცვაზე საქართველოს სახალხო დამცველი მანდატის ფარგლებში განაგრძობს ზედამხედველობას”, — აღნიშნავს აპარატი.

განცხადება გაავრცელა ახალგაზრდა იურისტთა ასოციაციამაც. როგორც საია წერს, გურიასა და აჭარაში მიმდინარე მოვლენები ცხადჰყოფს, რომ ქართული ოცნება კვლავ ვერ/არ ასრულებს სახელმწიფოს პოზიტიურ ვალდებულებას, დაიცვას მოქალაქეების ჯანრთელობა, სიცოცხლე და უსაფრთხოება.

გუშინ, მთელი დღის განმავლობაში ოფიციალური განცხადება არ გაკეთებულა “საქართველოს მთავრობის” ფეისბუქგვერდზე. დღეს კი დაწერეს, რომ “დასავლეთ საქართველოში დიდთოვლობის შედეგად დაზარალებული მოსახლეობის დახმარების პროცესში თავდაცვის ძალები ჩაერთვებიან”.

საგანგებო სიტუაციების მართვის სამსახურის ინფორმაციით, სამაშველო სამუშაოებში 600-მდე მეხანძრე-მაშველი და ათეულობით სპეციალური ტექნიკაა ჩართული, მათ შორის თოვლის ბურანები. წერენ, რომ ამ დროისთვის დახმარება გაეწია ათობით ადამიანს აჭარისა და გურიის სხვადასხვა სოფლიდან და მოხუცები, ბავშვები და სამედიცინო დახმარების საჭიროების მქონე პირები უსაფრთხო ადგილას არიან გადაყვანილები. უწყების ცნობითვე, უსაფრთხო ადგილას გამოიყვანეს, თოვლსა და ნამქერში ჩარჩენილი სატრანსპორტო საშუალებები, რომლებიც დიდთოვლობისა და ამინდის გაუარესების გამო გადაადგილებას ვეღარ ახერხებდნენ.

გარემოს ეროვნული სააგენტოს ცნობით, საქართველოში რთული მეტეოროლოგიური პირობები 27 თებერვლამდე შენარჩუნდება.

“ნალექი, უმეტესად თოვლის სახით, ზოგან ძლიერი, ნისლი, ქარბუქი, გზებზე ლიპყინული, ელექტროგადამცემ ხაზებზე შემოყინულობა, გორაკ-ბორცვიან ზონებში შესაძლებელია მეწყრული პროცესების განვითარება. ქვეყნის მაღალმთიან რაიონებში ნარჩუნდება ზვავსაშიშროება. დიდთოვლობის, ხილვადობის გაუარესების, ქარბუქის, ლიპყინულის და ზვავსაშიშროების გამო საავტომობილო გზების ცალკეულ მონაკვეთებზე შესაძლებელია შეიზღუდოს ტრანსპორტის მოძრაობა (საფრთხის დონე მაღალი)”, — ნათქვამია ინფორმაციაში.

ამ ეტაპზე არცერთი უწყება არ იძლევა სანდო და დადასტურებულ ინფორმაციას იმ მოქალაქეებზე, რომლებიც ჩამონგრეულ სახლებზე, გაუწმენდავ გზებზე და საკვების გარეშე დარჩენაზე წერენ და დახმარებას ითხოვენ. ამის პარალელურად, კი სოციალურ ქსელებში ვრცელდება ინფორმაცია, რომ სტიქიის ზონაში მაცხოვრებლებს უცხო პირები ურეკავენ და ამ საკითხზე კრიტიკული პოსტების გამო შეურაცხყოფას აყენებენ.