ფეხბურთელი გოგოების სექსუალურ შევიწროებაში მხილებულ 2 მწვრთნელს საფეხბურთო საქმიანობა აეკრძალა. ინფორმაციას ორგანიზაცია პარტნიორობა ადამიანის უფლებებისთვის ავრცელებს, რომელიც სასამართლოში ქალი ათლეტების ინტერესებს იცავდა.
“[საქართველოს ფეხბურთის ფედერაციის სადისციპლინო და საფეხბურთო დავების განმხილველმა] კომიტეტმა გადაწყვეტილების მიღების დროს შეაფასა დისკრიმინაციის შესაძლო რისკის პრევენციის საჭიროება და მწვრთნელების ინტერესი, განახორციელონ საფეხბურთო საქმიანობა. თუმცა, თითოეულ შემთხვევაში, უპირატესობა დისკრიმინაციისგან დაცვის კონსტიტუციურ უფლებას მიანიჭა”, — ნათქვამია PHR-ის განცხადებაში და აღნიშნულია, რომ გადაწყვეტილება პრეცედენტულია.
2023 წლის 4 ივლისს, ქუთაისის საქალაქო სასამართლომ მართვეს მწვრთნელის მხრიდან 9 ქალი ათლეტის მიმართ სექსუალური შევიწროება დაადგინა. ნიკეს მწვრთნელის მხრიდან კი 3 ათლეტი გოგოს, მათ შორის არასრულწლოვანების, სექსუალური შევიწროება 2022 წლის 18 თებერვალს თბილისის საქალაქო სასამართლომ, ხოლო 2023 წლის 22 ივნისს თბილისის სააპელაციო სასამართლომაც დაადგინა.
12 ოქტომბერს PHR-მა საქართველოს ფეხბურთის ფედერაციას მწვრთნელებისთვის უფლებამოსილების შეჩერების მოთხოვნით მიმართა, სანამ გადაწყვეტილება კანონიერ ძალაში შევიდოდა.
კლუბ მართვეს ყოფილ მწვრთნელს უფლებამოსილება 19 ოქტომბერს შეუჩერეს. ახლახან გავრცელებული ინფორმაციის თანახმად კი, საქმიანობა ორივე მწვრთნელს აეკრძალა.