სერიალების მოყვარულები ვთანხმდებით, რომ თითზე ჩამოსათვლელი შოუების დასახელება შეიძლება, რომელთა დასრულება გაგვიხარდა და ამოვისუნთქეთ კიდეც. უმეტესად პირიქით ხდება — გვიჭირს დავემშვიდობოთ ისტორიებსა და ადამიანებს, რომლებმაც ჩვენ თვალწინ, ეკრანებზე გაიარეს ყველაზე რთული და სახალისო მომენტები, შეუყვარდათ, გული ეტკინათ, წარმატებას მიაღწიეს და ამ ყველაფრის ნაწილად ჩვენც გვაგრძნობინეს თავი. კი, სერიალებს მსგავსი, ხანდახან არაჯანსაღი მიჯაჭვულობა ნამდვილად ახასიათებს.
დღეს ისეთ სერიალებზე ვისაუბრეთ, რომლებშიც ქვიარ ისტორიები ვითარდებოდა და რომელთა დასასრულისთვის ან გაწყვეტისთვის ემოციურად მზად არ ვიყავით. მეტიც, გულის სიღრმეში გვგონია, რომ სიუჟეტი განვითარების საშუალებას იძლეოდა და ცოტა მეტი მონდომება იყო საჭირო იმისთვის, რომ ამ ისტორიებს კიდევ დიდხანს ეცოცხლათ.
Heartstopper — გულის გამჩერებელი
– Hi…
– Hi…
– Hi…
– Hi…
—
– გამარჯობა…
– გამარჯობა…
– გამარჯობა…
– გამარჯობა…
თუ ამ სიტყვებზე ეკრანზე მფრინავი ქაღალდის ჩიტები და უხერხული ღიმილით შეფაკლული სახეები გახსენდება, მაშინ სწორ ადგილას მოხვდი.
გულის გამჩერებელი ერთ-ერთი ყველაზე თბილი სერიალია, რომლის ყურების დროსაც შეგრძნება გიჩნდება, რომ ეკრანიდან მხარდაჭერა და სიყვარული იღვრება. თუ ეს შეფასება გადაჭარბებული გგონიათ, ჩართეთ სერიალი და თავად გაიცანით ჩარლი, ნიკი, ტაო, ელი, ტარსა, აიზეკი და მრავალი სხვა.
ეს აბზაცი, შესაძლოა, სპოილერად ჩათვალოთ, ამიტომ სჯობს, თავი დაიზღვიოთ. სერიალის მაყურებლებმა ჩარლისთან ერთად გავიარეთ ბულინგის და თვითდამკვიდრების პერიოდი, ნიკთან ერთად ვირბინეთ რაგბის მოედნებზე და ტოქსიკური მასკულინობის ყველა მითი გავანადგურეთ, ელთან ერთად ვხატეთ მრავალფეროვანი ნამუშევრები და ტაოსთან ერთად დავიზაფრეთ მეგობრების დაკარგვის შიშით.
ჩვენი საყვარელი პერსონაჟების დაბრკოლებებით, მაგრამ თანადგომითა და უამრავი ბედნიერი მომენტით სავსე ცხოვრება მხოლოდ 3 სეზონით შემოიფარგლა. ამ ეპიზოდებში ვნახეთ, რამდენს ნიშნავს ოჯახის მხარდაჭერა და როგორი ძალაა მეგობრები, რომელიც, თავიანთი პრობლემების მიუხედავად, შენ გვერდით არიან.
როცა გაირკვა, რომ სერიალს აღარ აგრძელებდნენ, მაყურებლების არმიას უკმაყოფილება არ დაუმალავს, მაგრამ ისტორიის დასასრულად ფილმის შეთავაზებამ სიტუაცია გაანეიტრალა. Heartstopper Forever უკვე გამოვიდა და გვიამბობს, რა გზას გაივლიან პერსონაჟები იქამდე, სანამ კოლეჯში სწავლის გასაგრძელებლად სხვადასხვა ქალაქსა და შტატში აღმოჩნდებიან. სპოილერისთვის თუ მზად ხართ, გეტყვით, რომ ეს სიყვარულის ისტორიები მანძილს უძლებს.
მიუხედავად იმისა, რომ ერთი შეხედვით ამბავი დასრულდა და უპასუხო კითხვები არ დარჩა, ერთგული ფანები დამეთანხმებიან — ნიკის და ჩარლის ისტორია იძლეოდა იმის საშუალებას, კიდევ რამდენიმე რომანტიკული სეზონი გვენახა.
Anne with an E — ენი
რომ გვკითხონ, რას არ აპატიებდით არასდროს Netflix-ს, პასუხი იქნება: ენის ისტორიის გაწყვეტა (90-იანების “მეგობრობის დღიურ” გამოვლილი თაობა ამ ხუმრობას მიხვდება, ბოდიში Gen Z-ს). ეს იყო და არის ყველაზე კეთილშობილი, თბილი და სიყვარულით სავსე ისტორია. ისტორია მკაცრ წესებში და სტერეოტიპებში გაზრდილ ადამიანებზე, რომლებიც ყოველ დღე იცვლებიან და იზრდებიან წითური, ჭორფლებიანი, ფარფატა, შეუპოვარი გოგოს წყალობით და მისთვის უკეთესი გარემოს შესაქმნელად.
ეს არ არის მხოლოდ საბავშვო ისტორია, მაგრამ იმ ბავშვების ისტორია ნამდვილად არის, რომლებიც ზრდასრულებს საკუთარი თავის საუკეთესო ვერსიის პოვნაში ეხმარებიან. სიუჟეტში საუბარია ყველაფერზე: ოჯახი, მეგობრობა, სიყვარული, ბულინგი, ბავშვთა უფლებები, ქალთა უფლებები, სიტყვის თავისუფლება, რასიზმი, კლასობრივი განსხვავება, სექსუალური იდენტობა, ოჯახი… ამ სიის გაგრძელება უსასრულოდ შეიძლება და აქვე გეტყვით იმასაც, რომ არცერთი ეს საკითხი არ არის ზედაპირულად, ან “ვალის მოხდის მიზნით” წარმოჩენილი და ყველა ემოცია, რომელსაც პერსონაჟები განიცდიან, ძალიან გულწრფელი და რეალურია.
აქვე არიან უკეთილშობილესი პერსონაჟები: ენი, დაიანა, გილბერტი, მეთიუ, მარილა, კოლი, რეიჩელი, დეიდა ჯოზეფინა, მისის სტეისი… შესანიშნავი ხედები, ენის უსაზღვრო ფანტაზია, განსაკუთრებული მიმღებლობა და სიყვარული.
სერიალში ყველაფერია იმისთვის, რომ უამრავი დადებითი ემოციით აივსოთ და სრულიად უპატიებელია მისი შეწყვეტა, განსაკუთრებით იმის ფონზე, რომ წიგნები, რომელსაც ის ეფუძნება, სიუჟეტის გაგრძელების საშუალებას იძლეოდა.
სპოილერები! შეგვეძლო გვენახა ენი მასწავლებლის, გილბერტი კი ექიმის როლში. სამწუხაროდ ასე არ მოხდა, ისტორია გმირების სასიყვარულო კოცნით დაგვისრულეს და ისიც კი არ გაგვაგებინეს, რა ბედი ეწია მიკმაკის ტომის შეუპოვარ გოგოს, კაქუეთს, რომელიც რასისტულ სასულიერო სასწავლებელში იყო გამომწყვდეული.
Sense 8 — მერვე გრძნობა
Sense 8 (მერვე გრძნობა) არის ერთ-ერთი ყველაზე მრავალფეროვანი სერიალი, რომელიც შემქმნელებმა მოულოდნელად შეწყვიტეს და მაყურებლის რისხვას თავი ვერ დააღწიეს. სიუჟეტი ერთმანეთისგან სრულიად განსხვავებულ, მაგრამ გაურკვეველი ძალით ერთმანეთთან დაკავშირებულ რვა ადამიანს (კლასტერს) აერთიანებს და მოიცავს ყველაფერს — სამეცნიერო ფანტასტიკას, დრამას, რომანტიკას, ტრილერს, ეროტიკას.
ერთი სერიის განმავლობაში უყურებთ კადრებს სხვადასხვა კონტინენტიდან, ერთმანეთისგან სრულიად განსხვავებული რეალობებიდან. აქ მცირეოდენი სპოილერები იწყება! — ჩიკაგოში, სეულში, ნაირობიში, მუმბაიში, ბერლინსა და სხვა ქალაქებში მყოფი მთავარი გმირები ერთმანეთს მენტალურად უკავშირდებიან და შეუძლიათ დაინახონ, მოისმინონ და იგრძნონ ყველაფერი, რასაც ერთი მათგანი გრძნობს. მიუხედავად იმისა, რომ ყველა პერსონაჟს განსხვავებული ისტორია, კულტურა, პროფესია, რელიგია და სექსუალური ორიენტაცია აქვს, მათი კავშირი აჩვენებს, რომ ემოციები და სურვილები ხშირად უნივერსალურია.
ასე, ერთმანეთის ტკივილისა და სიხარულის გაზიარებით, 8 ერთმანეთისთვის უცხო ადამიანი ერთი ოჯახი ხდება და საფრთხესა და გამოწვევებსაც ერთად უმკლავდება. სიუჟეტის მთავარი თემებია მეგობრობა, მხარდაჭერა, ემპათია, ქვიარ იდენტობა, ოჯახი და გადარჩენისთვის ბრძოლა. ამავდროულად, მაყურებლისთვის სასიამოვნო მოულოდნელობებითაა სავსე — თუ ერთ კადრში ფანტასტიკურ ხედებს და რომანტიკულ ვახშამს ხედავთ, მზად უნდა იყოთ, რომ რამდენიმე წამში სხვა ქალაქში კლასტერის რომელიმე წევრი გადარჩენისთვის იბრძვის.
როგორც უკვე აღვნიშნეთ, სერიალის გაწყვეტა ფანებმა გულთან ძალიან ახლოს მიიტანეს, ამიტომ მათ დასაშოშმინებლად სპეციალური ფინალური სერიაც გამოვიდა, მაგრამ ამ სერიალის დანაკლისი დღემდე იგრძნობა. მაყურებელს ისევ აინტერესებს, როგორ გრძელდება ნომისა და ამანიტას, ლიტოსა და ჰერნანდოს ქვიარ სასიყვარულო ისტორია, ასევე, კალასა და ვოლფლანგის კულტურული და რელიგიური ბარიერებით დატვირთული ურთიერთობა.
Sex Education — სექსუალური განათლება
ეს ნამდვილად ის სერიალია, რომელზეც შეგვიძლია ვთქვათ, რომ ყველა ასაკის მაყურებელს ბევრი რამ გვასწავლა და ბევრი მნიშვნელოვანი პრობლემური საკითხი სულ სხვა კუთხით დაგვანახა. სერიალმა გამოავლინა, რამდენი კითხვა არსებობს მოზარდებში და სად ეძებენ ისინი პასუხებს, როცა საჭირო ინფორმაციაზე წვდომა არ აქვთ. ასევე, დაგვანახა, როგორ შეიძლება შეიცვალონ ის ადამიანებიც კი, რომლებიც თავიდან ტოქსიკურ და ძალადობრივ გარემოს ქმნიან. ვნახეთ ბევრი არაჯანსაღი ურთიერთობა და მათი გავლენა ადამიანებზე, ამასთან, რაც ყველაზე მთავარია, აქაც ვნახეთ რამხელა ძალა აქვს მეგობრობას.
სერიალი ფარავდა ისეთ თემებს, როგორიცაა თვითგამორკვევა, სექსუალური შევიწროება, ფიზიკური და ფსიქოლოგიური ძალადობა, ტოქსიკური გარემო ოჯახში. Sex Education მნიშვნელოვან საკითხებზე ხშირად უცნაური იუმორით და განსაკუთრებული სიმსუბუქით საუბრობდა, თან ისე, რომ ეს არ ამცირებდა საკითხის მნიშვნელობას.
გავიცანით ოტისი, მეივი, ერიკი, ეიმი, ადამი და კიდევ არაერთი პერსონაჟი, რომლებიც 4 სეზონის განმავლობაში გვიზიარებდნენ თავიანთ პრობლემებს და გვაჩვენებდნენ, რომ ადამიანები არ არიან უბრალოდ კარგები ან ცუდები და ყველას თავისი მრავალფეროვანი ბუნება აქვს.
მართალია, პერსონაჟები გაიზარდნენ, მათი ყოველდღიურობა შეიცვალა და უკვე ზრდასრული ცხოვრების დაწყება მოუწიათ, მაგრამ მონდომების შემთხვევაში, სცენარისტები იპოვიდნენ გზას, ეს ისტორია არ დასრულებულიყო და როგორც სექსუალური განათლების, ასევე, ცხოვრებისგან მეტი გამოცდილების მიღების შესაძლებლობაზე უფრო მეტი გაგვეგო.
Young Royals – ახალგაზრდა მონარქები
“För vi var en revolution
Om än bara för varandra
Det ska inte vara en revolution
Att älska någon annan
Men du var min revolution
Innan allt föll samman
Föll samman, föll samman”
შეიძლება შვედური არ იცით, მაგრამ თუ Young Royals ნანახი გაქვთ, ეს სიმღერაც არაერთხელ გექნებათ მოსმენილი და გულიც აგიჩუყდებოდათ, როგორ მღერის სიმონი ვილჰელმთან ურთიერთობაზე, როგორც “რევოლუციაზე”. მცირეოდენი სპოილერები: ან იქნებ, რეალურ რევოლუციაზეც, რადგან ვილჰელმი ახალგაზრდა პრინცი და შვედეთის მომავალი მეფეა, სიმონი კი მუშათა კლასს წარმოადგენს, რომელიც აქტიურად აკრიტიკებს მდიდარ ელიტას და სოციალურ უსამართლობას. ეს მოცემულობა წყვილის ურთიერთობას მუდმივად თან სდევს, თუმცა პირველივე სერიაში სიმონის სიმღერისას გაღიმებული ვილის ნახვა უკვე იძლეოდა ვარაუდის საფუძველს, რომ ის სიყვარულისთვის იბრძოლებდა.
თუ ამ შვედური თინეიჯერული დრამის აქტიური მაყურებელი იყავით, მაშინ მისი ფინალის მოახლოება აუცილებლად გატკენდათ გულს. ეს ისტორია არ არის მხოლოდ სიყვარულზე — აქ პერსონაჟები ცდილობენ საკუთარი თავის პოვნას, პასუხისმგებლობების წნეხში გადარჩენას და კლასობრივი სხვაობების დაძლევას. მნიშვნელოვან როლს თამაშობს ოჯახის მოლოდინები, მეგობრობა, ნდობა, ღალატი და მაყურებელი ხშირად დგება არჩევანის წინაშე, როცა დაპირისპირებულ პერსონაჟებს თანაუგრძნობს.
მიუხედავად იმისა, რომ სერიალის შექმნელებს თავიდანვე 3 ნაწილი ჰქონდათ ჩაფიქრებული, ფანები ფიქრობენ, რომ 3 სეზონი ნამდვილად არ იყო საკმარისი ვილჰელმისა და სიმონის ისტორიის დასასრულებლად.
სპოილერებისთვის მზად ხართ? ფანებს აინტერესებთ, როგორი იქნებოდა ვილჰელმი ტახტიდან გადადგომის შემდეგ, ან როგორი იქნებოდა წყვილის ცხოვრება სამეფო ოჯახისგან შორს. ფინალმა აჩვენა, რომ მათ ახალი ნაბიჯი გადადგეს, მაგრამ დატოვა დანაკლისი იმისა, რა ელოდათ წინ, შესაბამისად, კითხვები და პრეტენზიები აქაც ბევრი იყო.
ყველა ვთანხმდებით, რომ ერთგული მაყურებელი იმსახურებს კმაყოფილების შეგრძნებას საყვარელი ისტორიის დასრულების შემდეგ. თუმცა ისიც უნდა ვთქვათ, რომ სერიალების ეპოქაში, მაყურებლები სცენარისტებზე მეტი მონდომებით ავითარებენ თეორიებს და წერენ პერსონაჟების ბედს, ამიტომ ბევრისთვის მოსაწონი დასასრული უკვე იშვიათობად იქცა.